ޚިޔާލު ތަފާތުވުންތައް އެއް ފަރާތްކޮށް ލީޑަރުން ހިމެނޭހެން ފަލަޞްޠީނާ ގުޅޭ ކަންކަމުގައި ޙަރަކާތްތެރިވާނެ (ޤައުމީ ޙަރަކާތެއް) މިވަގުތު ރާއްޖޭގައި އޮތުން ވަރަށް މުހިންމުކަމަށް ކުރީގެ އިސްލާމިކް މިނިސްޓަރު ޑރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޑރ. ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، އިސްލާމީ އުންމަތް ހިތްދަތިވަގުތަކާ ކުރިމަތިލަމުންދާއިރު މިކަމާމެދު ސަފުތައް އެއްބައިވަންތަވުން ވަރަށް މުހިންމު ކަމަށެވެ.
"ޚިޔާލު ތަފާތުވުންތައް އެއް ފަރާތްކޮށް ލީޑަރުން ހިމެނޭހެން ފަލަޞްޠީނާ ގުޅޭ ކަންކަމުގައި ޙަރަކާތްތެރިވާނެ (ޤައުމީ ޙަރަކާތެއް)މިވަގުތު ރާއްޖޭގައި އޮތުން ވަރަށް މުހިންމު. އިސްލާމީ އުންމަތް ހިތްދަތިވަގުތަކާ ކުރިމަތިލަމުންދާއިރު މިކަމާމެދު ސަފުތައް އެއްބައިވަންތަވުން ވަރަށް މުހިންމު." ޑރ. ޝަހީމް ވިދާޅުވިއެވެ.
ޑރ. ޝަހީމް މިހެން ވިދާޅުވެފައިވާއިރު، ރިޕޯޓުތައް ބުނާގޮތުގައި އިޒްރޭލަށް ހަމާސް ޖަމާއަތުން ދިން ކުއްލި ޙަމަލާގައި، އިޒްރޭލުގެ 1500 އަށްވުރެން ގިނަ މީހުންވަނީ މަރާލައި، 200 އެއްހައި އިޒްރޭލު ރައްޔިތު ރަހީނު ކޮށްފައެވެ. ދެފަރާތުން ބަދަލުކުރަމުން އަންނަ ޙަމަލާތަކުގައި، އިޒްރޭލުގެ ބައެއް ރައްޔިތުންނަށް ހާނީއްކަވަމުން ދާއިރު، އިޒްރޭލުން މެދުކެނޑުމެއްނެތި ޣައްޒާއަށް ދެމުން އަންނަ ޙަމަލާތަކުގައި، މިހާތަނަށް ފަލަސްޠީނުގެ 3000 އަށްވުރެ ގިނަ ރައްޔިތުން ޝަހީދުވެ، ޣައްޒާގެ 500 އަށްވުރެން ގިނަ ގެދޮރު ބިމާހަމަވެފައިވެއެވެ. އަދި 150،000 އަށް ވުރެ ގިނަ ރައްޔިތުން މަގުމަތިވެ، 14،000 އަށްވުރެ މީހުންނަށް އެކިވަރުގެ ޒަޚަމްތައް ލިބިފައެވެ.
