ހދ. މަކުނުދޫގައި ގޭސް ސިލިންޑަރެއް ގޮވައި ހިނގި ހާދިސާގައި މަރުވި ދެމީހުންގެ ހަށިގަނޑު މާލެ ގެނައުމުގެ މަސައްކަތް ފަށަފިއެވެ. މިދެމީހުންގެ ހަށިގަނޑު މާލެ ގެނައުމަށް މިހާރު ކުޅުދުއްފުށްޓަށް ގެންގޮސްފައިވާ ކަމަށް މަކުނުދޫ ކައުންސިލުން ހާމަކުރައްވައެވެ.
މަކުނުދޫގައި އިއްޔެ ގޭސް ސިލިންޑަރެއް ގޮވައި ހިނގި މިޙާދިސާގައި މަރުވެފައިވަނީ އެރަށު އެއަރޕޯޓު ބިން ހިއްކުމުގެ މަސައްކަތް ކުރަމުންދާ ބިގްފިޝް މޯލްޑިވްސްގައި މަސައްކަތްކުރާ އިންޑިޔާގެ ދެ މުވައްޒަފުންނެވެ. މަރުވި ދެމީހުންގެ ހަށިގަނޑު ވަނީ ކާކުކަން ނޭނގޭ ވަރުވެފައެވެ.
މިމީހުންގެ ހަށިގަނޑުތައް ޤައުމަށް ފޮނުވުމާ ގުޅޭގޮތުން ފުލުހުން ވިދާޅުވެފައިވަނީ، އެކަމަށް ގޮތެއް ނިންމާނީ ފުލުހުންގެ ތަޙުޤީގު ތެރެއިން ބަލަންޖެހޭ ކަންކަން ބެލުމަށްފަހުގައިކަމަށެވެ.
އިއްޔެ ހަވީރު 4:15 ހާއިރު މަކުނުދޫގައި ހިނގި މިޙާދިސާ ގޮވާފައިވަނީ އެރަށު ބަނދަރުގެ ދެކުނު ފަރާތުގައި ހުންނަ މަސް މާރުކޭޓު ކައިރީގައި އޮތް ގޭސް ސިލިންޑަރެއްކަމަށް ފުލުހުން ވިދާޅުވެއެވެ.
މި ޙާދިސާއާއި ގުޅިގެން އިތުރަށް ބަލަންޖެހޭ ކަންކަން ބަލާ ތަޙްޤީޤުކުރުމަށް ފުލުހުންގެ ފޮރެންސިކް ޓީމެއް އެރަށުގައި ހަރަކާތްތެރިވަމުންދާ ކަމަށެވެ. މީގެ އިތުރުން އެމްއެންޑީއެފުންވެސް މިކަމުގައި ދަނީ ހަރަކާތްތެރިވަމުންދާ ކަމަށްވެސް ހާމަކުރައްވާފައިވެއެވެ.
