އިންޓަރނޭޝަލް އެއިޑް ކެމްޕެއިން (އައިއޭސީ) ފަދަ މާތް މަތިވެރި މަޤްޞަދެއްގައި ކުރިޔަށްދާ ކަމަކާ މެދު އެކިއެކި ތުހުމަތުކޮށް، އެ އަޚުންގެ އަބުރު ކަތިލައި، އެ އަޚުންނާ މެދު މުޖުތަމަޢުގައި ނަފުރަތު އުފައްދުމަކީ އެއްވެސް ގޮތަކަށް ބަލައިގަނެވޭނޭ ކަމެއް ނޫން ކަމުގައި ޝެއިޚް ޝަފީީޢު ޢަބްދުﷲ ވިދާޅުވެއްޖެއެވެ.
ޝައިޚް މިހެން ވިދާޅުވެފައިވަނީ، އިންޓަރނޭޝަލް އެއިޑް ކެމްޕެއިން (އައިއޭސީ) އަށް ލިބޭ ފަންޑުގެ ފައިސާގެ ހިސާބުތައް އާންމުކުރަމުން ނުދާކަމަށް ބުނެ ސޯޝަލް މީޑިޔާގައި ފަތުރަމުންދާ ވާހަކަތަކާ ގުޅިގެން އެކްސްގައި ޙިއްސާ ކުރެއްވި ޕޯސްޓެއްގައެވެ.
"އައިއޭސީ ގެ އެންމެ އިސްކޮށްއުޅުއްވާ ބައެއް އަޚުންނަކީ އަޅުގަނޑު ވެސް ދަންނަ ޚުލުޤުހެޔޮ ރަނގަޅު އަޚުންތަކެކެވެ. އެ އަޚުންގެ ފަރާތުން އަޅުގަނޑަށް ފެނިފައިވަނީ ތެދުވެރިކަމާއި އަމާނާތްތެރިކަމެވެ. والله أعلم! ولا أزكي على الله أحدا!" ޝެއިޚް ޝަފީޢު ވިދާޅުވިއެވެ.
ވުމާއެކު، އައިއޭސީ ފަދަ މާތް މަތިވެރި މަޤްޞަދެއްގައި ކުރިޔަށްދާ ކަމަކާ މެދު އެކިއެކި ތުހުމަތުކޮށް، އެ އަޚުންގެ އަބުރު ކަތިލައި، އެ އަޚުންނާ މެދު މުޖުތަމަޢުގައި ނަފުރަތު އުފައްދުމަކީ އެއްވެސް ގޮތަކަށް ބަލައިގަނެވޭނޭ ކަމެއް ނޫން ކަމަށް ޝެއިޚް ވިދާޅުވެފައިވެއެވެ.
އަދި އެ ކަން ހަރުއަޑުން ކުށްވެރިކޮށް، އެ ކަން ވަގުތުން ވަގުތަށް ހުއްޓައިލުމަށް ވެސް އެ ކަން ކުރާ ބަޔަކަށް ޝެއިޚް ގޮވާލެއްވިއެވެ.
އައިއޭސީ އާއި ރާއްޖޭގެ މީޑިއާތައް ގުޅިގެން ފަލަސްތީނަށް އެހީވުމަށް މިދިޔަ ހަފްތާގައި ކުރިއަށް ގެންދިޔަ ޓެލެތޯން މެދުވެރިކޮށްވެސް 12 މިލިއަނަށް ވުރެ ގިނަ ރުފިޔާ ވަނީ ހޯދާފައެވެ.
