ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިޔަށް ނުގެންދެވޭތީ މަޖިލީހުގެ ޤަވައިދު މާނަކުރަން ސުޕްރީމްކޯޓަށް ހުށައެޅި މައްސަލާގައި ރައްޔިތުން މަޖިލީހުގެ ފަރާތުން ވަކާލާތުކުރައްވާނީ ބަންޑާރަ ނައިބުގެ އޮފީހުންކަމަށް އެ އޮފީހުން ވަނީ ވިދާޅުވެފައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައިގެ ޚުލާސާއެއް
- އެންމެ ފުރަތަމަ ވެއްދީ މިދިޔަ ޖޫން މަހު؛
- ޖުމްލަ 54 މެމްބަރުންގެ ސޮޔާއެކު ހުށަހެޅި މައްސަލައާއެކު މަޖިލިސް މަރުތަޅު އެޅި އެތަކެއް ދުވަހެއް ހޭދަވި؛
- ނަމަވެސް ރިޔާސީ އިންތިހާބުގެ ފުރަތަމަ ބުރުން ބަލިވުމުން، ރައީސް ނަޝީދަށް ދޫ ދިނުން ނޫން ގޮތެއް ނުފެނި މަޖިލީހުގެ މެޖޯރިޓީ އޮންނަ އެމްޑީޕީން އެ މައްސަލަ އަނބުރާ ގެނައި؛
- ދެވަނަ ބުރަށް ރައީސް ނަޝީދުގެ ތާއިދުވެސް ރައީސް ޞާލިހަށް ނުލިބުނު؛
- އިންތިހާބުން ބަލިވަޑައިގަތުމާއެކު މި މަހުގެ 12 ވަނަ ދުވަހު އެމްޑީޕީން ރައީސް ނަޝީދު ވަކިކުރަން މައްސަލަ ހުށަހަޅައިފައި.
ބަންޑާރަ ނައިބު މީގެކުރިން ދެއްވި ލަފާފުޅު
ދިވެހިރާއްޖޭގެ ސުޕްރީމްކޯޓްގައި ބަންޑާރަ ނައިބުގެ އޮފީހުން މަޖިލިސް ތަމްސީލުކުރައްވާއިރު މި މައްސަލާގައި ބަންޑާރަ ނައިބު ލަދާ ދެއްވާފައިވަނީ މަޖިލީހުގެ ނިންމުމާއި ދެކޮޅަށެވެ. އެގޮތުން އަންނަ އަހަރަށް ދައުލަތުން ލަފާ ކުރާ ބަޖެޓް ހުށައެޅުމުގެ ޖަލްސާއަށް ފިނޭންސް މިނިސްޓަރ އިބްރާހިމް އަމީރު ވަޑައިގެންފައި ނުވަނީ ބަންޑާރަ ނައިބު އިބްރާހިމް ރިއްފަތު އެގޮތަށް ލަފާދެއްވުމުންނެވެ.
ޖަލްސާތައް ބޭއްވިފައި ނުވަނީ ކީއްވެ؟
ރައްޔިތުންގެ މަޖިލީހުގެ ރައީސްކަމުން، ރައީސް ނަޝީދު ވަކިކުރުމަށް އެމްޑީޕީގެ 49 މެންބަރުން ސޮއިކުރައްވާ ހުށައެޅި މައްސާލައިގެ 14 ދުވަހުގެ ނޯޓިސް ހަމަވެ، އެ ޤަރާރާއި ގުޅޭ ޖަލްސާއެއް ބޭއްވުމަށް މިދިޔަ މަހުގެ 29 ވަނަދުވަހު ފުރަތަމަ ފަހަރަށް އެޖެންޑާކުރިއެވެ. އެހެންނަމަވެސް މަޖިލީހުގެ ނާއިބް ރައީސް، ގަލޮޅު އުތުރު ދާއިރާގެ މެމްބަރު އީވާ ޑެންގީއަށް ފަރުވާ ހޯއްދެވުމަށް ސަލާމްގައި ހުންނެވުމުން މިހާތަނަށް އެ ޖަލްސާ ބޭއްވިފައެއް ނުވެއެވެ.
މި މައްސަލަ މަޖިލީހުގެ އިއްޔެވެސް ޖަލްސާއަށްވެސް އެޖެންޑާކުރިއެވެ. އެހެންނަމަވެސް މިފަހަަރުގެ ޖަލްސާ ކެންސަލްކުރީ އިވާ މަޖީލިހުގެ ރިޔާސަތުގައި އިންނަވަން އުޒުރުވެރިވެޑައިގަންނަވާކަމަށް ވިދާޅުވެ މަޖިލީހުގެ އަމީން އާންމުއަށް އިވާ ސިޓީއެއް ފޮނުއްވުމުންނެވެ. ސަބަބެއްކަމަށް އީވާގެ ސިޓީގައި ވިދާޅުވީ ސުޕްރީމް ކޯޓަށް ހުށަހަޅައިފައިވާ މައްސަލަގައި، ކޯޓުން ގޮތެއް ނުނިންމަނީސް، މަޖިލީހުން ވަކިގޮތެއް އިޚްތިޔާރުކޮށްގެން ކުރިއަށް ދިއުމަކީ މަޖިލީހުން ކުރިންސުރެ ޢަމަލުކުރަމުން އަންނަ ގޮތެއް ނޫން ކަމަށް ޤަބޫލުކުރައްވާކަމަށެވެ. އަދި ރައްޔިތުންގެ މަޖިލީހުން ވަކިގޮތެއް އިޚްތިޔާރުކޮށްގެން ކުރިއަށް ގެންދިއުމަކީ ސުޕްރީމް ކޯޓުގައި ބަލަމުންދާ މައްސަލައަށް ނުފޫޒަކަށްވާނެ ކަމެއް ކަމަށް ދެކެވަޑައިގަންނަވާކަމަށްވެސް އީވާ ވިދާޅުވެފައިވެއެވެ.
މަޖިލީހުގެ ޤަވާޢިދުގައި ބުނަނީ ކީކޭ؟
މަޖިލީހުގެ ޤަވާޢިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަގައި ރިޔާސަތު ބަލަހައްޓަވަންޖެހޭނީ މަޖިލީހުގެ ނައިބު ރައީސްއެވެ. މަޖިލީހުގެ ނައިބު ރައީސް ނެތް ހާލަތެއްގައި ކަންކުރަންވީ ގޮތެއް މަޖިލީހުގެ ގަވައިދުގައި ހިމަނާފައެއްނުވެއެވެ. މަޖިލީހުގެ ޤަވާއިދު އެގޮތަށް ބަޔާންކުރާތީ، ޖަލްސާ ކުރިއަށްގެންދެވޭނީ މަޖިލީހުގެ ނާއިބު ރައީސަށްކަމަށް މަޖިލީހުގެ އަމީން ޢާންމު ވަނީ ކަނޑައަޅުއްވާފައެވެ.
މަޖިލީހުގެ ޤަވާޢިދާ މެދު އެމްޑީޕީން ބުނަނީ ކީކޭ؟
އެހެންނަމަވެސް އެމްޑީޕީގެ ޤާނޫނީ ޓީމުން ވަނީ ޢަމީން ޢާންމުގެ ނިންމުން ޤާނޫނު އަސާސީގެ 82 ވަނަ މާއްދާއާއި، މަޖިލީހުގެ ޤަވާޢިދުގެ 44 ވަނަ މާއްދާއާ ޚިލާފުކަމަށް ވިދާޅުވެފައެވެ. މަޖިލީހުގެ ޤަވާއިދުގެ 44 ވަނަ މާއްދާގައި ބަޔާންކުރަނީ މަޖިލީހުގެ ރައީސާއި ނައިބު ރައީސަށް ޖަލްސާގެ ރިޔާސަތު ނުބެލެހެއްޓޭނަމަ މަޖިލީހުގެ ރައީސް ކަނޑައަޅުއްވާ މެންބަރަކު ރިޔާސަތު ބަލަހަންޓަން ވާނެކަމަށެވެ. އަދި އެ މެމްބަރަކީ މަޖިލީހުގައި މެދުނުކެނޑި އެންމެ ގިނަ ދުވަސްވީ މެމްބަރަށް ވާންޖެހޭނެކަމަށްވެސް އެ މާއްދާގައިވެއެވެ.
އަދި މަޖިލީހުގެ ގަވައިދުގެ 205 ވަނަ މާއްދާއާއި ހަވާލާދީ އެމްޑީޕީން ބުނީ މަޖިލީހުގެ ރައީސް މަޤާމުން ވަކިކުރުމުގެ ޤަރާރެއް މަޖިލީހަށް ހުށައެޅުމަށްފަހު އެވަގުތު މަޖިލީހަށް ހުށައެޅިފައިވާ އެހެން އެއްވެސް ކަމަކާމެދު ބަހުސްކުރެވޭނީ ނުވަތަ ގޮތެއް ނިންމަންވާނީ މަޖިލީހުގެ ރައީސް މަޤާމުން ވަކިކުރުމުގެ ޤަރާރާމެދު ގޮތެއް ނިންމުމަށްފަހުކަމަށެވެ. އެހެންކަމުން މަޖިލީހުގައި ކުރިޔަށް ގެންދިޔުމުގެ ފުރުސަތު ނުދޭނެކަމަށްވެސް އެޕާޓީން ވަނީ ބުނެފައެވެ.
މައްސަލައަށް ތަދައްހުލުވުން
ރައީސް ނަޝީދު އިސްވެ ހުންނަވާ އުފެއްދެވި ދަ ޑިމޮކްރެޓްސްގެ ފަރާތުން މި މައްސަލައިގެ ތެރެއަށް ވަންނަން ހުށަހެޅީ، އެ ޕާޓީގެ 9 މެމްބަރުން ވަކިވަކިން އެ ފުރުޞަތަށް އެދުމުން، އެކަން ސުޕްރީމް ކޯޓުން ބަލައިނުގަތުމުންނެވެ. ޑިމޮކްރެޓްސްގެ ވަކިވަކި މެމްބަރުންނަށް ތަދައްހުލް ނުވެވޭނެ ކަމަށް ސުޕްރީމް ކޯޓުން ނިންމީ ދުސްތޫރީ މައްސަލައަކަށް ވާތީއެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލައިގައި އެމްޑީޕީން ސުޕްރީމް ކޯޓަށް ހުށަހެޅި މައްސަލައަށް ތަދައްހުލްވާން ދަ ޑިމޮކްރެޓްސްއިން ހުށަހެޅި ހުށަހެޅުން ސުޕްރީމް ކޯޓުން ބަލައިގެންފައިވެއެވެ.
އެހެންކަމުން އިއްޔެ ބޭއްވި އެ ޕާޓީގެ އިންޓެރިމް ކޮމެޓީގެ ބައްދަލުވުމުގައި ވަނީ އެ ޕާޓީގެ ފަރާތުން އެ މައްސަލައަށް ވަންނަން ނިންމައި، ސުޕްރީމް ކޯޓަށް ސިޓީ ފޮނުވައިފައެވެ. ދަ ޑިމޮކްރެޓެސްގެ އިތުރުން، ޕީ.ޕީ.އެމް ޕީ.އެން.ސީ ކޯލިޝަނުންވެސް މި މައްސަލައަށް ތަދައްހުލްވާން ހުށަހެޅުމުން އެ ފުރުޞަތު ސުޕްރީމް ކޯޓުން ވަނީ ދެއްވާފައެވެ.
މަޖިލީހުގައި ޑިމޮކްރެޓްސް އަށް ނިސްބަތްވާ ނުވަ މެންބަރުން ތަދައްހުލުވާން ސުޕްރީމް ކޯޓުން ފުރުސަތު ނުދިން ނަމަވެސް، މި މަހުގެ 17 ގައި ވެރިކަމާ ހަވާލުވާ ޕީޕީއެމް ޕީއެންސީއިން އެ މައްސަލައަށް ތަދައްހުލްވާން ހުށަހެޅުމުން އެ ފުރުޞަތު އެ ދެ ޕާޓީއަށް ދޭން ވަނީ ނިންމައިފައެވެ.
މައްސަލަ ބައްލަވާ ބެންޗު
މި މައްސަލަ ބައްލާ ފަނޑިޔާރުންގެ ބެންޗުގައި ހިމެނިވަޑާއިގަންނަވަނީ ފަނޑިޔާރު އަލްއުސްތާޛް މަޙާޒު ޢަލީ ޒާހިރު، ފަނޑިޔާރު ޑރ. އަޒްމިރާލްދާ ޒާހިރު، ފަނޑިޔާރު އަލްއުސްތާޛް ޙުސްނުއްސުޢޫދު، ފަނޑިޔާރު އަލްއުސްތާޛް ޢަލީ ރަޝީދު ޙުސައިން، ފަނޑިޔާރު ޑރ. މުޙައްމަދު އިބްރާހީމްއެވެ.
ކީއްވެ ބަންޑާރަ ނައިބު؟
މަޖިލީހުގެ ގަވައިދު މާނަކުރުމަށް އެމްޑީޕީން ހުށައެޅި މައްސަލައިގެ ފުރަތަމަ އަޑުއެހުން މިއަދު 10 ޖަހާއިރު ބޭއްވުމަށް ސުޕްރީމްކޯޓުން ވަނީ ތާވަލުކޮށްފައެވެ. މި މައްސަލާގައި މަޖިލިސް ތަމްސީލު ކުރައްވާނީ ދައުލަތުގެ ބަންޑާރަ ނައިބުގެ އޮފީހުންނެވެ. މީގެކުރިންވެސް މަޖިލީހާއި ދެކޮޅަށް ހުށައެޅޭ މައްސަލަތަކުގައި މަޖިލީހުގެ ފަރާތުން ވަކާލާތުކުރައްވަމުން އައިސްފައިވަނީ ބަންޑާރަ ނައިބުގެ އޮފީހުންނެވެ.
