ކަސްޓަމްސްގެ ކޮމިޝަނަރ ޖެނެރަލް ޝަރީފް ރިޓަޔާ ކުރައްވައިފި

މޯލްޑިވްސް ކަސްޓަމްސް ސާވިސަސްގެ ކޮމިޝަނަރު ޖެނެރަލް، ޢަބްދުﷲ ޝަރީފު ވަޒީފާއިން ރިޓަޔާ ކުރައްވައިފިއެވެ.

ކަސްޓަމްސް އިން އެކްސްގައި ކުރި ޕޯސްޓެއްގައި ވިދާޅުވީ، 2020 ވަނަ އަހަރުން ފެށިގެން ކޮމިޝަނަރު ޖެނެރަލްގެ ހައިސިއްޔަތުން ޕްރޮސީޖާތައް އޮޓޮމޭޓް ކުރުމާއި، ބޯޑަރު ސެކިއުރިޓީ ވަރުގަދަކުރުމާއި، އެމްސީއެސްގައި އިންޓެގުރިޓީ ޗެމްޕިއަން ކުރުމުގައި އިސްކޮށް އުޅުއްވި ކަމަށެވެ.

ކޮމިޝަނަރ ޖެނެރަލް އޮފް ކަސްޓަމްސްގެ މަޤާމުން ޝަރީފު ވަކިވެވަޑައިގަތުމަށް ނިންމެވުމާއި ގުޅިގެން، ކަސްޓަމްސްގެ އިސް މުވައްޒަފުންގެ ފަރާތުން ވަނީ، ކަސްޓަމްސްގެ ކުރިއެރުމަށް ޝަރީފު ކޮށްދެއްވާފައިވާ މަސައްކަތްތައް ފާހަގަކޮށް ޚާއްސަ ހަނދާނީ ފިލައެއް އަރުވާފައެވެ.

"Today marks the retirement of Commissioner General @AbdullaSh4reef, who dedicated 28 remarkable years to Customs. As CG since 2020, he led our focus on automating procedures, fortifying border security, and championing integrity at MCS. Wishing him a fulfilling retirement!" pic.twitter.com/t2OmYmaO2n

— Maldives Customs Service (@CustomsMv) November 6, 2023

އޭނާ ރިޓަރ ކުރައްވާފައި މިވަނީ އެ ކަސްޓަމްސްގައި މަަސައްކަތްކުރައްވާތާ 28 އަހަރަށް ފަހުގައެވެ. މަޤާމަށް ޝަރީފު އައްޔަން ކުރެއްވީ، އޭރު އެ މަޤާމު ފުރުއްވަމުން ގެންދެވީ އަޙުމަދު ނުޢުމާން އަވަހާރަވުމާއި ގުޅިގެން، ވަގުތީގޮތުން ކަސްޓަމްސްގެ ހިންގެވުމާއި ހަވާލުވެ ހުންނެވުމަށްފަހުގައެވެ. އޭގެ ކުރިން އޭނާ ހުންނެވީ ކަސްޓަމްސްގެ ޑެޕިއުޓީ ކޮމިޝަނަރުގެ މަގާމުގައެވެ. ޝަރީފްއަކީ ކަސްޓަމްސްގެ ތެރޭގައި އެކި މަގާމުތައް ފުރުއްވާފައިވާ ބޭފުޅެކެވެ.

ޝަރީފް ކަސްޓަމްސްގެ ޚިދުމަތާއި ގުޅިވަޑައިގަތީ، 1993 ވަނަ އަހަރުގެ ޖަނަވަރީ މަހުގެ 12 ވަނަ ދުވަހު، ކަސްޓަމްސް އޮފިސަރ ގްރޭޑް 1 ގެ މަޤާމުންނެވެ. އޭރު އޭނާގެ ޢުމުރަކީ އެންމެ 22 އަރެވެ. އެގޮތުން އެޑި ޑިވިޝަންތަކާއި ހަވާލުވެވަޑައިގެން ޚިދުމަތްކުރެއްވިއެވެ.

ޝަރީފްއަކީ ކަސްޓަމްސްގެ ތެރެއިން ކުރި ހޯއްދަވަމުން ގޮސް ކޮމިޝަނަރާ ހަމައަށް އައި ފުރަތަމަ ކޮމިޝަނަރު ވެސްމެއެވެ. އޭގެ ކުރިން އެ މަގާމަށް މީހުން އައްޔަން ކުރަމުންދިޔައީ ސިޔާސީ ގޮތުންނެވެ.