އެއްވެސް ރައްޔިތަކަށް ދީފައިވާ އެއްޗެއް އަތުނުލުން ކަމަށާއި ނަމަވެސް، ބޭއިންސާފުން ކަމެއް ކޮށްފައިވާ ނަމަ، އެކަން ނުބަލައި ދޫކޮށްލުމަކީ އެންމެ ރަނގަޅު ގޮތް ނޫން ކަމަށް އިންތިޚާބީ ރައީސްގެ އޮފީހުން ބުނެފިއެވެ.
އިންތިޤާލީ މަރުހަލާގެ ތަރުޖަމާނު މުޙައްމަދު ފިރުޒުލް ވިދާޅުވީ ރައްޔިތުން އެހާމެ ބޭނުން ޖެހިފައިވާ ކަމެއްގައި އުސޫލުން ބޭރުން ކަންކަން ކުރުމަކީ ކަންބޮޑުވާ ކަމެއް ކަމަށެވެ. ޝަރުތު ހަމަވާ މީހުންނަށް ވެސް ފްލެޓް ދޫކުރުން އަންނަ ސަރުކާރާ ހަވާލުކުރުމަށް، އިންތިހާބީ ރައީސް ޑރ. މުހައްމަދު މުއިއްޒު އެދިވަޑައިގަންނަވާ ކަމަށް ވެސް ވިދާޅުވިއެވެ.
އިންތިހާބީ ރައީސްގެ ވައުދުފުޅަކީ ސަރުކާރުން އެއްވެސް ރައްޔިތަކަށް ދީފައި އެއްޗެއް އަތުނުލުން ކަމަށާއި ނަމަވެސް، ބޭއިންސާފުން ކަމެއް ކޮށްފައިވާ ނަމަ، އެކަން ނުބަލައި ދޫކޮށްލުމަކީ އެންމެ ރަނގަޅު ގޮތް ނޫން ކަމަށް ފިރުޒުލް ވިދާޅުވި އެވެ. އެހެންވެ، ބޭއިންސާފުން އަމަލުކޮށްފައިވޭތޯ އާ ސަރުކާރުން ބަލާނެ ކަމަށް އޭނާ ވިދާޅުވިއެވެ.
ފިރުޒުލް ވިދާޅުވީ، މި ސަރުކާރުގެ "ގެދޮރުވެރިޔާ" ސްކީމްގެ ދަށުން 4،000 ފްލެޓް ލިބޭ މީހުންގެ ލިސްޓުގައި ޝަރުތު ހަމަނުވާ މީހުން އުސޫލުން ބޭރުން ހިމަނާފައިވާ ނަމަ، އެކަމުގައި ޝާމިލްވާ މީހުންގެ މައްސަލަތައް ބަލައި، ފިޔަވަޅު އަޅާނެ ކަމަށެވެ.
"ނުހައްޤު ނުގަވައިދުން އުސޫލުން ބޭރުން ކަންތައްތަކެއް ކޮށްފައި ހުރި ކަމަށްވާ ނަމަ، ޝަރުތު ހަމަވާ މީހުންނަށް ދީފައިވާ ނަމަ، އެހެން ވެސް ކަންތައްތައް ހުރި ކަމަށްވާ ނަމަ، ފިޔަވަޅު އެޅުމުގެ ފުރުސަތު އޮންނާނެ ވާހަކަ ދަންނަވާލަން."
"ސިޔާސީ ވިސްނުމެއްގައި ވަކި ފަރާތަކަށް ޓާގެޓްކޮށްގެން ކުރެވޭ ކަމެއް ނޫން، އެ ވިސްނުމަށް އެއްވެސް ޖާގައެއް ނޯންނާނެ. އެކަމަކު އިންތިހާބީ ރައީސް ދެކެވަޑައިގަންނަވަނީ ނާއިންސާފުގެ ކުރިމަތީގައި ނާއިންސާފުން ކަންކަން ކުރިއަށް ދާއިރު އެކަމުގައި އެއްވެސް ފިޔަވަޅެއް ނާޅާ ހުރުމަކީ ވެސް އެންމެ އަދުލުވެރި ގޮތެއް ނޫން،" ފިރުޒުލް ވިދާޅުވިއެވެ.
ނުހައްގުން، ނުގަވައިދުން އުސޫލުން ބޭރުން ކަންތައްތަކެއް ކޮށްފައި ހުރި ކަމަށްވާނަމަ ފިޔަވަޅު އެޅުމުގެ ފުރުސަތު އޮންނާނެ ކަމަށްވެސް ފިރުޒުލް ވިދާޅުވިއެވެ.
ފިރުޒުލް ވިދާޅުވީ އިންތިހާބީ ރައީސް އެންމެ އިސްކަމެއް ދެއްވާ ކަމަކީ ގެދޮރުވެރިކަން ކަމަށާއި މިހާރު ހިނގަމުންދާ ގެދޮވެރިކަމުގެ މަޝްރޫއުތައް ވެސް ރައްޔިތުންނަށް އެންމެ ފައިދާވާ ގޮތަށް އާ ސަރުކާރުގައި ބަދަލުކޮށް، މަސައްކަތްތައް ނިންމާނެ ކަމަށެވެ. އަދި އިންތިހާބީ ރައީސްގެ ވައުދާ އެއްގޮތަށް ގެދޮރުވެރިކަމުގެ މައްސަލައަށް ވަށާޖެހޭ ހައްލެއް އާ ސަރުކާރުގައި ގެންނާނެ ކަމުގެ ޔަގީންކަން ދެއްވާ ކަމަށް ވެސް އޭނާ ވިދާޅުވި އެވެ.
"ސަރުކާރުން ގެދޮރުވެރިކަމާ އެހެން ކަންކަމާ ގުޅޭގޮތުން ރައްޔިތުންނަށް ލިޔުމަކުން ދީފައިވާ އެއްވެސް ކަމެއް އަތުނުލައްވާނެ. އަދި އެކަންކަމަށް އޮނާ ކުރައްވާނެކަމަށް ވިދާޅުވި ސްޓޭންޑް ހަމަ ވަރަށް ސާފުކޮށް އިންތިހާބީ ރައީސް ފާހަގަކުރައްވާފައިވޭ. އަދިވެސް އެ ސްޓޭންޑްގައި އެމަނިކުފާނު ހުންނެވީ." ފިރުޒުލް ވިދާޅުވިއެވެ.
ފިރުޒުލް ވިދާޅުވީ މިހާރު ރައްޔިތުންގެ ޝަކުވާއަކީ ނުގަވައިދުން އަދި ނާ އިންސާފުން ކަންތައްތަކެއް ހާސިލް ކުރުމަށް ސަރުކާރުން މަސައްކަތް ކުރަމުންދާ ކަމުގެ ޝަކުވާ ކަމަށެވެ. ސަރުކާރުން އެކުލަވާލާފައިވާ ލިސްޓަށް އޮނާ ކުރި ނަމަވެސް ނުގަވައިދުން އުސޫލުން ބޭރުން ކަންތައްތަކެއް ހިނގާފައިވާކަމަށްވާނަ އެކަންކަން ބަލައި އެ ފަރާތްތަކާއި މެދުގައި ފިޔަވަޅު އެޅުމުގެ ފުރުސަތު އާ ސަރުކާރަށް އޮންނާނެ ކަމަށާއި އެއީ ސިޔާސީ ވިސްނުމެއްގައި ކުރާނެ ކަމެއް ނޫން ކަމަށް ވެސް ވިދާޅުވިއެވެ.
ސޯޝަލް ހައުސިން ސްކީމުގެ ދަށުން، ސަރުކާރުން ހަދާ ފްލެޓުތަކަށް ކުރިމަތިލުމަށް ހުޅުވާލުމުން 20،000 އަށް ވުރެ ގިނަ މީހުން ކުރިމަތިލިއެވެ. އެކަމަކު އޭގެ ތެރެއިން ދިރިއުޅުމުގެ ހާލަތު ނުބަލައި 4،000 މީހުން ހޮވި ގޮތާ މެދު އާންމުން ދަނީ ކަންބޮޑުވުން ފާޅުކުރަމުންނެވެ.
ހައުސިން މިނިސްޓްރީން އިއުލާން ކުރި ގޮތުގައި ފުރަތަމަ 4،000 ފްލެޓްގެ ތެރެއިން ތިން ކޮޓަރީގެ އެޕާޓްމަންޓުތައް ލިބެނީ ދާއިމީ ލިސްޓުގައި 76 އަށް ވުރެ ގިނަ ޕޮއިންޓް ލިބޭ މީހުންނަށެވެ. ދެ ކޮޓަރީގެ އެޕާޓްމަންޓުތައް ލިބެނީ 73 އަށް ވުރެ ގިނަ ޕޮއިންޓް ލިބޭ މީހުންނަށެވެ.
ފްލެޓް ލިބޭ މީހުންގެ ދާއިމީ ލިސްޓުގައި ޕޮއިންޓް ދީފައިވާ ގޮތާއި ވެރިފައިކުރަން ސަރުކާރުން ކުރި މަސައްކަތް ހާމަކުރަން ވެސް ދަނީ ގޮވާލަމުންނެވެ. އެ ޝަކުވާތަކާ އެކު ޕްލޭނިން މިނިސްޓްރީ އަށް ދިޔަ މީހުންނާ ބައްދަލުކުރައްވައި އެ މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު ވިދާޅުވީ ޕޮއިންޓް ދީފައި ވަނީ ފޯމުގައި ފުރިހަމަކޮށްފައި ހުރި މައުލޫމާތުތަކަށް ބެލުމަށް ފަހުގައި ކަމަށެވެ.
ގެދޮރިވެރިޔާގެ ސްކީމްގެ ދަށުން ދޫކުރާ ފްލެޓުގެ ދާއިމީ ލިސްޓު އިއުލާންކުރުމާ އެކު، އެއީ އިންސާފުން ބޭރުން އެކުލަވާލައި، އާންމުކޮށްފައި އޮތް ލިސްޓެއް ކަމުގެ ޝަކުވާ ބޮޑުވެ އޭސީސީ އަށް ވަނީ އެ މައްސަލަ ހުށަހަޅައިފައެވެ. ފްލެޓަށް ޕޮއިންޓް ދިނުމުގައި ހާމަ ކަމެއް އަދި އިންސާފުވެރި ކަމެއް ނެތް ކަމަށް ބުނެ އާންމުން ޕްލޭނިން މިނިސްޓްރީ ދޮށުގައި އަޑުއުފުލުމުން މިހާރު ވަނީ ޝަކުވާ ހުށަހަޅަން ފުރުސަތު ހުޅުވާލައިފަ އެވެ.
