އިންތިޚާބީ ރައީސް ޑރ. މުޙއްމަދު މުއިއްޒުގެ ހުވާކުރެއްވުމުގެ ރަސްމިއްޔާތު ހުއްޓުވުމަށް އެމްޑީޕީއިން ކުރި މަސައްކަތްތައް ނާކާމިޔާބުވިކަމަށްޓަކައި ހަމްދު ކުރައްވާކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވުމަށް އެމްޑީޕީ ރައްދުދެއްވައިފިއެވެ.
މަޖިލީހުގެ ނައިބުރައީސް ނެތިވެސް ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދެވޭނެކަމަށް ސުޕްރީމް ކޯޓުން ކަނޑައަޅާފައިވާއިރު، އެ ކޯޓުންވަނީ އިންތިހާބީ ރައީސްގެ ހުވައާއި މެދު ސުވާލު އުފައްދައި ޤަވައިދު މާނަ ނުކުރެވޭނެކަމަށްވެސް ބުނެފައެވެ. ރައީސް ނަޝީދު ކުރެއްވި ޓްވީޓެއްގައި ވިދާޅުވީ، އެމްޑީޕީއިން ހުވާކުރުމުގެ ރަސްމިއްޔާތު ހުއްޓުވުމަށް ރޭވަމުންދިޔަކަމަށެވެ. އެހެންނަމަވެސް އެ ރޭވުން ފެއިލްވެފައިވާކަމަށާއި، އެހެންކަމުން އެކަމަށް ހަމްދުކުރައްވާކަމަށް ވިދާޅުވިއެވެ.
ރައީސް ނަޝީދު ވިދާޅުވީ، ހުވާ ކުރެއްވުމުގެ މަސައްކަތްތައް ދަނީ ރަނގަޅަށްކަމަށެވެ. އެމަނިކުފާނަށް ރައްދުދެއްވައި، ރައީސް އިބްރާހިމް މުހައްމަދު ޞާލިހުގެ ކޮއްކޯފުޅު ޢަލީ ނިޔާޒު ކުރެއްވި ޓުވިޓެއްގައި ވިދާޅުވީ، މިއަދުގެ ސުޕްރީމް ކޯޓުގެ ހުކުމާއެކު، އިންތިހާބީ ރައީސް ހުވާ ކުރުމުގެ ރަސްމިއްޔާތުގެ ރިޔާސަތު ބަލަހައްޓަނީ މަޖްލިސް މެމްބަރުންގެ އިތުބާރު ނެތް ރިޔާސަތެއް ކަމުގައިވާނަމަ އެކަމަށް އެމްޑީޕީން އިހުތިޖާޖު ކުރާނެ ކަމަށެވެ. އަދި އިހުތިޖާޖު ކުރާނެ ގޮތުގެ ތަފްސީލު ނިންމާނީ އެމްޑީޕީގެ ޕީޖީ ގްރޫޕުން ކަމަށް ވެސް ނިޔާޒު ވިދާޅުވިއެވެ.
ރައީސް ނަޝީދުގެ ޓްވީޓަށް އެމްޑީޕީގެ އަންހެނުންގެ ރޫހުގެ ރައީސް މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމް ވެސް ރައްދު ދެއްވިއެވެ. ރައީސް ނަޝީދަށް އިތުބާރު ނެތް ރައީސްގެ ގޮތުގައި ނިސްބަތްކުރައްވާ އޭނާ ވިދާޅުވީ، އެމަނިކުފާނު އެ ޖަލްސާގައި ނެތިއްޔާ ކަންކަން ރަނގަޅަށް ދާނެކަމަށެވެ. އޭނާ ވިދާޅުވީ، އިތުބާރު ނެތް ރައީސްއަކު ބައިންދައިގެން ރީތިކޮށް ކަންކަން ގެންދިއުމަށް ސުޕްރީމް ކޯޓުގެ ހުކުމުގެއެއް ނެތްކަމަށެވެ. ރައީސް ނަޝީދު އުޅުއްވަނީ އެމަނިކުފާނުގެ އިތުބާރު ނެތްކަމުގެ ވޯޓަށް ފިއްލަވައިގެންކަމަށެވެ. އޭނާވަނީ ކިހާ ދުވަހެއް ފިއްލަވައިގެން އުޅޭވޭނެތޯ ސުވާލު ކުރައްވާފައެވެ.
އިންތިހާބީ ރައީސްގެ ހުވާ ޤަބޫލު ނުކުރާނެކަމަށް އެމްޑީޕީން ނެގި ނުކުތާއަށް ހުކުމުގައި ބުނެފައި ވަނީ، ގާނޫނު އަސާސީން ލާޒިމު ކުރާ އެއްވެސް ކަމަކަށް ހުރަސް އެޅޭ ގޮތަށް ރައްޔިތުންގެ މަޖިލީހުގެ ގަވައިދުގެ އެއްވެސް މާއްދާއެއް މާނަ ނުކުރެވޭނެ ކަމަށެވެ. ސްޕްރީމް ކޯޓުގެ ފަނޑިޔާރު މަހާޒް ޢަލީ ޒާހިރުގެ ރައުޔުގައި ވިދާޅުވެފައި ވަނީ، މަޖިލީހުގެ ގަވައިދުގެ 205 ވަނަ މާއްދާގައި ވާގޮތަށް ނޯޓިސް ދީ މުއްދަތު ހަމަވުމުން ވޯޓު ނެގުން ތާވަލު ކުރަން ޖެހޭނެ ކަމަށެވެ.
މި ޤަރާރު އޮއްވައި އިތުރު އެހެން ކަމަކަށް ބަހުސް ކުރެވިގެން ނުވާނެކަމަށާއި، އެއީ މަޖިލީހުގެ މައްޗަށް ލާޒިމު ކުރާ އިޖުރާއަތެއްކަމަށް ފަނޑިޔާރު މަހާޒް ވިދާޅުވިއެވެ. ޤާނޫނު އަސާސީން ލާޒިމުކަމެއް ކުރުމަށް މަޖިލީހުގެ ގަވައިދުގެ އެއްވެސް މާއްދާއަކުން ހުރަހެއް ނޭޅޭނެކަމަށާއި، ދައުލަތުގެ އެއްވެސް އޮފިޝަލަކަށް ވެސް އެފަދަ ބާރެއް ލިބިގެން ނުވާކަން ފަނޑިޔާރު ފާހަގަކުރެއްވި އެވެ. އެއާއި އެކު ބަޖެޓުގެ މަސައްކަތް ނުވަތަ ވަޒީރުންނަށް ރުހުން ދިނުން ވެސް ހުއްޓިގެން ނުވަނެކަމަށާއި، މިއީ ސީދާ ގާނޫނު އަސާސީގެ ވަކި މާއްދާތަކުން ލާޒިމު ކުރާކަމެއްކަން ފަނޑިޔާރު މަހާޒް ފާހަގަކުރެއްވިއެވެ.
ގުޅުންހުރި:
އީވާ ނެތަސް ނަޝީދު ވަކި ކުރުމުގެ މައްސަލަ ކުރިއަށް ގެންދެވޭނެ: ސުޕްރީމް ކޯޓް
އިންތިޚާބީ ރައީސް ހުވާ ކުރުމުގެ ޖަލްސާއަށް އެއްވެސް ހުރަހެއް ނެތް: ސުޕްރީމް ކޯޓް
ކިޔުންތެރިންގެ ޚިޔާލުތައް:
އަޅުގަނޑު ގަބޫލެއް ނުކުރަން ނަސްރެއް ލިބުނުކަމަކަ ލިބުނީނާކާމިއާބެއް އަހެރެމެންގެ ކުރިމަތީގައި މަބިކުފާނުގެ ސަޕޯޓުކުޑަވުން