ފަސް އަހަރުގެ ރިޔާސީ ދައުރު އަންނަ ހުކުރު ދުވަހަށް ފުރިހަމަވާއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ދެކަނބަލުން ރިޔާސީ ގަނޑުވަރު, މުލިއާގެ ދޫކުރައްވާ އެހެން ގެކޮޅަކަށް ދިރިއުޅުން ބަދަލުކުރައްވައިކަމުގެ ޚަބަރާއެކު ނޮޅިވަރަމް ދާއިރާގެ ކުރީގެ މެންބަރު ޙުސައިން އަރީފް އަސަރުގަދަ "އާޅެމެއް" ވިދާޅުވެއްޖެއެވެ.
ރައީސް ޞާލިޙުގެ ދެކަނބަލުން މުލިއާގެއަށް ދިރިއުޅުން ބަދަލުކުރެއްވީ 2018 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ވެރިކަމާ ހަވާލުވެވަޑައިގަތުމަށްފަހު އެ މަހުގެ 30 ވަނަ ދުވަހުއެވެ. އެނގިފައިވާ ގޮތުގައި، ރައީސް ޞާލިޙުގެ ދެކަނބަލުން ބަދަލުވެވަޑައިގަތީ ފަޒްނާގެ އާއިލީ ބޭފުޅުން ދިރިއުޅުއްވަމުން އަންނަ މ. ސަނީ އިން އަށެވެ.
އަރީފުގެ އާޅެމުގައި ފާޅުކުރައްވާފައިވާ ޝުޢުރުގައި ހަނދާން އައުކޮށްދެއްވީ، ވެރިކަމަކީ ދާއިމީ އެއްޗެއް ނޫންކަމާއި، މިއަދު ނިމިގެންދާނެކަމާއި ދެންއޮތީ މާދަމާ ކަމެވެ. އަދި އޭނާ ރައީސް ޞާލިޙަށް ހަނދާން ކޮށްދެވީ، ގެއަށް ވަޑައިގެން އިންނަވައި، އަމިއްލަ ނަފުސާމެދު ވިސްނާ ފިކުރުކުރެއްވުމަށެވެ.
ދެން އޭނާ ކުރިމަތިކުރެއްވީ، ސުވާލުތަކެކެވެ. ރައީސް ޞާލިޙްގެ ވެރިކަމުގައި ކިތައް ގޯސްކަންތައް ކުރެއްވިތޯއާއި، އެ ގޯސްކަންތައް ފުހެލެވިދާނެތޯއާއި ރަނގަޅު ކުރެވިދާނެ ތޯއެވެ.
"އިބޫ ޞާލިޙެވެ. ވެރިކަމަކީ ދާއިމީ އެއްޗެއް ނޫނެވެ.
މިއަދު މިދަނީއެވެ! ދެންއޮތީ މާދަމާއެވެ.
ގެއަށް ގޮސް އެކަނި އިނދެ ނިކަން ރަނގަޅަށް އަމިއްލަ ނަފުސާމެދު ވިސްނާ ފިކުރު ކޮށްލަބަލާށެވެ.
އިބޫ ޞާލިޙުގެ ވެރިކަމުން ފާއިތުވި ދުވަސްތަކުގައި ކިތައް ކަންތައް ގޯސްކޮށް ކުރިން ތޯއެވެ؟
މިއަދު އެ ގޯސް ކަންތައް ފުހެލައި ނުކުރާ ކަމަށް ހެދިދާނެތޯއެވެ ؟ ނޫނީ އެކަންތައް އަލުން ރަނގަޅު ކުރެވިދާނެ ތޯއެވެ؟
ވަޤުތު ފާއިތުވުމުން އެއްކަމެއްވެސް އަލުން އަނބުރާ ރަނގަޅު ނުކުރެވޭނެއެވެ!
ޙަޔާތަކީ މިފަދަ އެއްޗެކެވެ." އަރީފް ވިދާޅުވިއެވެ.
އޭނާގެ އާޅެން ނިންމަވާލެއްވީ، ޙަޔާތަކީ، ވަޤުތު ފާއިތުވުމުން އެއްކަމެއްވެސް އަލުން އަނބުރާ ރަނގަޅު ނުކުރެވޭނެ އެއްޗެއްކަން ހަނދާންކޮށްދެއްވަމުންނެވެ.
އަރީފަކީ ރައީސް ޞާލިޙް ވެރިކަމަށް ގެނައުމަށްޓަކައި އެތަކެއް ޤުރުބާނީތަކެއް ވެވަޑައިގެންނެވި ބޭފުޅެކެވެ. ރައީސް ޔާމީންގެ ވެރިކަން ނިމުމަކަށް ގެނައުމުގެ މަސަައްކަތް ފުރަތަމަ ފެށިފައިވަނީ ރައްޔިތުންގެ މަޖިލީހުގެ ތެރެއިންނެވެ. އަރީފަކީ ސަރުކާރު ހިންގާ ކޯލިޝަންގެ މެންބަރެއްގެ ގޮތުގައި ހުންނަވައި، ރައީސް ޔާމީންގެ ސަރުކާރާ ދެކޮޅަށް ނިކުންނެވި 12 މެންބަރުންގެ ތެރޭގައި ހިމެނިވަޑައިގެންނެވި ބޭފުޅެކެވެ.
އަރީފް ވަނީ މީގެ ކުރިންވެސް ރައީސް ޞާލިޙްގެ ވެރިކަމާމެދު ނުރުހުންފާޅުކުރައްވަމުން ގެންދަވާފައެވެ. އަދި ރައީސް ޞާލިޙް ވެރިކަމަށް ގެނައުމުގެ ފެށުންކަމުގައިވެގެންދިޔަ "މަޖިލިސް ހަޅުތާޅު" ގައި ޙަރަކާތްތެރިވި 12 މެންބަރުންނާ ރައީސް ޞާލިޙްގެ ވެރިކަމުގެ ތެރޭގައި އެއްވެސް ގުޅުމެއް ބާއްވާފައި ނުވާކަން ފާހަގަކުރެވެއެވެ.
