ރާއްޖޭގެ ރައީސުލްޖުމްހޫރިއްޔާ ކަމުގެ ހުވާކުރެއްވުމަށް ފަހު، އެކުލަވާލައްވާ އެމަނިކުފާނުގެ ކެބިނެޓުގައި 22 މިނިސްޓަރުން ތިއްބަވާނެ ކަމަށާއި އެ ބޭފުޅުން ވާނީ ހިންގުމުގެ ހަރަދުތައް ބޮޑުނުކޮށް، ނަތީޖާ ނެރެދެއްވާނެ ބޭފުޅުންނަށް ކަމަށް އިންތިޚާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައިވަނީ، މިއަދު ފާހަގަކުރާ ރާއްޖޭގެ 55 ވަނަ ޖުމްހޫރީ ދުވަހުގެ މުނާސަބަތުގައި ޕީއެސްއެމް އަށް ދެއްވި އިންޓަވިއުގައެވެ.
މުއިއްޒު ވިދާޅުވީ މިހާރު ސޯޝަލް މީޑިއާގައި އާންމުވެފައިވާ ކެބިނެޓް މިނިސްޓަރުންގެ ލިސްޓުގެ 90 ޕަސެންޓް ރަނގަޅު ކަމަށެވެ. ނަމަވެސް އަދިވެސް ކުދިކުދި ބަދަލުތައް އަންނާނެ ކަމަށް ވިދާޅުވިއެވެ.
ޑރ. މުއިއްޒު ވިދާޅުވީ އެމަނިކުފާނުގެ ކެބިނެޓް އެކުލަވާލައްވަނީ ރިޔާސީ އިންތިހާބުގެ ކެމްޕެއިންގައި ވައުދުވެވަޑައިގެންނެވި ގޮތަށް ކަމަށާއި، އެ ވައުދުތައް ފުއްދަވައިދެއްވުމަށް އެމަނިކުފާނު ވެރިކަމަށް މި ވަޑައިގަންނަވަނީ އާންމުންނަށް ޚިދުމަތް ކުރެއްވުމަށް ކަމަށެވެ.
އެމަނިކުފާނު ވިދާޅުވީ، ކެބިނެޓާއި ސަރުކާރުގެ ކުންފުނިތަކުގެ ވެރިންނަށާއި ސަރުކާރުގެ އިސް އެހެން މަގާމުތަކުގައި ވެސް ތިއްބަވާނީ އެމީހެއްގެ މައްޗަށް އެމަނިކުފާނަށް ފަހު ބަސް ބުނެވޭ އަދި އެހެން މީހެއްގެ ހުއްދަ ހޯދަން ނުޖެހޭ ފެންވަރުގެ ގާބިލު ބޭފުޅުން ކަމަށެވެ.
ކެބިނެޓް އެކުލަވާލުމުގައި ބެއްލެވި ކަންކަމުގެ ތެރޭގައި، ދާއިރާއަކާ ގުޅޭ ނުވަތަ އެ ދާއިރާއަކުން ކިޔަވާ ވިދާޅުވެގެން ހުންނެވި ނުވަތަ އެ ދާއިރާއެއްގެ ތަޖުރިބާ ވީހާ ވެސް ރަނގަޅަށް ލިބިވަޑައިގެން ހުންނެވި ބޭފުޅުން ނެގުމާއި، ހަވާލުކުރައްވާ އެއް ޕޯޓްފޯލިއޯއެއް ހިންގޭނެ ފަދަ އަދި އެ ދާއިރާއަކާ ވީހާ ވެސް ގާތް ގުޅުމެއް އޮތް، ވީހާ ވެސް ހިންގުންތެރި، މެނޭޖުމަންޓް ވައިސް އަދި ތަޖުރިބާގެ ގޮތުން ހިންގުންތެރި ބޭފުޅުން ނެގުމާއި، ތައުލީމީ ރޮނގުން އެންމެ ދަށްވެގެން ފުރަތަމަ ޑިގްރީ ނެތް ބޭފުޅުން ނެގުމާއި، ޕީއެޗްޑީ ހޯލްޑަރުންގެ ގޮތުގައި ނުވަ ބޭފުޅުން ތިއްބެވުމާއި، މާސްޓާސް ލެވެލްގެ ބޭފުޅުން ތިއްބެވުން ހިމެނެއެވެ.
ސަރުކާރުގެ ސިޔާސީ މަގާމުތައް ވެސް 700 އަށް ވުރެ އިތުރު ނުކުރައްވާނެ ކަމުގެ ޔަގީން މުއިއްޒު އަނެއްކާވެސް ދެއްވިއެވެ.
މުއިއްޒު ވިދާޅުވީ މިނިސްޓްރީތައް އިތުރު ކުރެއްވީ އެއް މިނިސްޓްރީއެއްގެ މެންޑޭޓުގެ ދަށުން މާ ގިނަ ކަންކަން ކުރަން އުޅެގެން ނަތީޖާ ނުނެރެވޭ ކަން ތަޖުރިބާ ކުރެވިފައި ވާތީ ކަމަށެވެ. އޭނާގެ ކެބިނެޓުގައި 2-3 މިނިސްޓްރީއެއް އިތުރުވިޔަސް، ހިންގުމުގެ ހަރަދު ބޮޑުނުވާނެ ކަމަށް ވިދާޅުވިއެވެ.
"އަޅުގަނޑުމެން މިހާރު މިނިސްޓްރީތައް ވަކިކޮށްފައި އޮތީމަ، މިނިސްޓްރީތަކުގެ އަދަދު އިތުރު ވާނެ. އެއީ ފޯކަސްޑް މަސައްކަތްތަކެއް ކުރަން ވެގެން، ނަތީޖާ ނެރޭ ސީރިއަސް މަސައްކަތްތަކެއް ކުރަން ބޭނުންވާތީ، އެ މަސައްކަތް ކުރުމަށް ވަކިކޮށް ހަދާއިރުގައި ވެސް އަމިއްލަ އިމާރާތެއް ކުއްޔަށް ނަގައިގެން ރިކަރަންޓް ހަރަދު ބޮޑެއް ނުވާނެ،" މުއިއްޒު ވިދާޅުވި އެވެ.
ޖުމްހޫރީ ދުވަހުގެ މުނާސަބަތުގައި އިންތިހާބީ ރައީސް ޑރ. މުހައްމަދު މުއިއްޒު ޕީއެސްއެމް އަށް އިންޓަވިއު ދެއްވަނީ
އެމަނިކުފާނުގެ ޓީމް ވާނީ ރައްޔިތުން ފަހުރުވެރިވާ ފަދަ ނަތީޖާ ނެރެދެވޭ، ތައުލީމީ އަދި ގާބިލު ޓީމަކަށް ކަން ފާހަގަކުރައްވަމުން، މުއިއްޒު ވިދާޅުވި ގޮތުގައި، މަޤާމުތަކަށް ލައްވާނީ ރައްޔިތުންނަށްޓަކައި ވީ ވައުދުތައް ރަނުން ރަނަށް ފުރިހަމަ ކޮމިޓްމެންޓާ އެކީގައި، ރެއާއި ދުވާލު ހޭލާ ހުރެގެން މަސައްކަތް ކުރަން ޖެހުނަސް ކުރެވޭ ވަރުގެ ބޭފުޅުންނެވެ.
"އަޅުގަނޑު ދެންނެވިން ބޭނުމޭ އެންމެ އެކީގައި ކުރިއަށް ދާން. ގައުމަށް ހަމަޖެހުން އަންނަން ބޭނުމޭ. ބައިބައިވުމާއި ބަދަލުހިފުމާއި އަބަދު ދެކޮޅުވެރިކަމުގެ ރޫހުގެ ތެރޭގައި އަޅުގަނޑުމެން އަބަދު ކުރިއަށް ދާކަށް ބޭނުމެއް ނޫނޭ. ކުރިއަށް ދާން ބޭނުމީ އެކުވެރިކަމުގައި، ހަމަޖެހުން އަންނަން ބޭނުންވަނީ،" މުއިއްޒު ވިދާޅުވިއެވެ.
ވީހާ ވެސް ގިނަ އަންހެނުން ބޭފުޅުންނަށް ފުރުސަތު ދިނުމުގެ ގޮތުން، ސަރުކާރު ކުންފުނިތަކުގެ ވެރިންނަށް ހަ އަންހެން ބޭފުޅުން ނަގަން ނިންމައި މިހާރު ކޮންފަމޭޝަން ވެސް ދީފައިވާ ކަމަށާއި، ކުރީގެ ސަރުކާރުތަކާ އަޅާ ބަލާއިރު ވަރަށް ގިނަ އަދަދެއްކަމަށް ވެސް އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ އެމަނިކުފާނުގެ ޓީމު މަސައްކަތްކުރައްވާނީ ހުރިހާ ކަމެއް ޙާޞިލުވާ ގޮތަށް ކަމަށެވެ.
"އަޅުގަނޑު މިފަހަރު މި އެކުލަވާލާ ޓީމްގައި މިހާރު ވެސް އަޅުގަނޑު ކޮންފަމޭޝަން ދީފައި ވާނެ ހަ ބޭފުޅުންނަށް. ސަރުކާރުގެ 100 ޕަސެންޓް ހިއްސާވާ މުހިންމު ހަ ކުންފުންޏެއް މެނޭޖުކުރާނީ ކަމަށް ގާބިލު، ހިންގުންތެރިން އަންހެން ބޭފުޅުން،" މުއިއްޒު ވިދާޅުވިއެވެ.
މުއިއްޒު ވިދާޅުވި ގޮތުގައި، ކެބިނެޓާއި ސަރުކާރުގެ ކުންފުނިތައް އެއްކޮށްލާއިރު މިހާތަނަށް އެންމެ ގިނަ އަންހެން ބޭފުޅުން ހިމެނޭ ޓޮޕް ލެވެލް މެނޭޖުމަންޓް އޮންނާނީ މި ފެށޭ ސަރުކާރުގައެވެ.
"އެއިން ކޮންމެ ބޭފުޅަކީ އަޅުގަނޑަށް އެ ބޭފުޅަކާ މެދުގައި ފުރިހަމަ ޔަގީންކަން އޮތް ބޭފުޅުން. މި ދެންނެވީ ޑެލިވަރީ، ކޮމިޓްމެންޓް، ތެދުވެރިކަން. އަޅުގަނޑު ބޭނުން އަޅުގަނޑުގެ ސަރުކާރަކީ ސާފު ސަރުކާރަކަށް ހަދަން. ކޮރަޕްޝަނަށް ހަމަ ހަގީގަތުގައި ވެސް ސަރުކާރުން ނޫނެކޭ ބުނާނަން. ކެބިނެޓްގެ ބޭފުޅެއް ވިޔަސް، އެމްޑީއެއް ވިޔަސް ކޮރަޕްޝަނަށް ފުރުސަތެއް ނުދެއްވާނެ، އަޅުގަނޑަށް ޔަގީން،" މުއިއްޒު ވިދާޅުވިއެވެ.
އެމަނިކުފާނު ވިދާޅުވީ، އެމަނިކުފާނުގެ ޓީމްގައި ހިމެނޭ އެއްވެސް ބޭފުޅަކު ނަތީޖާ ނެރުމުގައި ފެއިލްވާ ނަމަ އެކަން ވެސް ބައްލަވާނެ ކަމަށާއި އާންމުންގެ ހިޔާލައި ފާޑުކިޔުމަށް ވެސް ޖާދަ ދެއްވާނެ ކަމަށެވެ.
ކިޔުންތެރިންގެ ޚިޔާލުތައް:
މުޅިން ދޮގުހަދާ މީހެއް. މަޖިލިސް ވޯޓް އަހަރެން ދޭނީ އެމް ޑީ ޕީ އަށް.. އަަހަންނަކީ ޕީީ އެމް މީހެއް.