ޓެރަރިސްޓް އިސްރާޢީލުގެ ޔަހޫދީންނާ ދެކޮޅަށް ލުބުނާނުގެ ޙިޒްބުالله ޖަމާޢަތުން ކުރަމުންދާ ހަނގުރާމަ ހުއްޓައިނުލާނެ ކަމުގައި އެ ޖަމާޢަތުން ވިދާޅުވެއްޖެއެވެ.
އެ ޖަމާޢަތުން މިކަން ހާމަކޮށްފައިވަނީ، އޮކްޓޫބަރު 7 ވަނަ ދުވަހު ހައްދުފަހަނަ އަޅާފައިވާ ޔަހޫދީން ޣައްޒާއަށް ބޮންއަޅަން ފެށި ފަހުން ދެވަނަ ފަހަރަށް ތަޤުރީރުކުރައްވައި އެ ޖަމާޢަތުގެ އިސްވެރިޔާ ޙަސަން ނަޞްރުالله ދެެއްކެވި ވާހަކަފުޅުގައެވެ.
ލުބުނާނުގެ ދެކުނުގައިވާ ސަރަޙައްދުގައި އެ ޖަމާޢަތުގެ މުޖާހިދުން ޔަހޫދީންގެ ފައުޖުތަކާ ކުރިމަތިލަމުންދާނެ ކަން ފާހަގަކުރައްވަމުން، މި ޖިހާދު ހުއްޓައިލުމުގެ އެއްވެސް ނިޔަތެއް ނެތް ކަމަށާ ކުރިއަށް އޮތް ތަނުގައި މި ކުރިމަތިލުންތައް ހަނގުރާމައަކަށް ބަދަލުވުމުގެ ފުރުޞަތު އޮތް ކަމުގައި ވެސް އޭނާ ވިދާޅުވިއެވެ.
ހައްދުފަހަނަ އަޅާފައިވާ ޔަހޫދީންގެ ފައުޖުތަކާއި ޒަޔަނިސްޓު އިސްރާޢީލުގެ ރަށްތަކަށް އަމާޒުކޮށް ޙިޒްބުاللهއިން ދެމުންދާ ހަމަލަތައް އިތުރަށް ވަރުގަދަކޮށް، ޔަހޫދީ ފައުޖަށް އަމާޒުކޮށް ދެމުންދާ ހަމަލާތައް އިތުރު ކޮށްފައިވާއިރު، އެ ޖަމާޢަތުން ވަނީ ފަހުގެ ޒަމާނީ ހަތިޔާރުތަކުގެ ތެރޭގައި 'ބުރްކާން’ގެ ނަން ދީފައިވާ މިސައިލެއް ކަމުގައިވާ 300 އާއި 500 ކިލޯއާ ދެމެދު ޢަދަދަކަށް ގޮވާތަކެތި އުފުލުގެ ޤާބިލުކަން ލިބިފައިވާ ބާރުގަދަ ހަތިޔާރެއް ބޭނުންކުރަން ފަށާފައެވެ. މީގެއިތުރުން، ޓެރަރިސްޓް ޔަހޫދީންނަށް ހަމަލަދޭން ފުރަތަމަ ފަހަރަށް ޑްރޯނެއް ބޭނުން ކޮށްފައިވާ ކަމަށްވެސް ފާހަގަކުރެއްވިއެވެ.
ޓެރަރިސްޓް އިސްރާޢީލުގެ ދެކުނުގައި އޮންނަ ރަށެއް ކަމުގައިވާ ކިރިޔަތް ޝްމޯނޭއަށް ޙިޒްބުاللهއިން ދާދި ފަހުން ދީފައިވާ ހަމަލަތައް ވެސް އޭނާ ފާހަގަ ކުރެއްވިއެވެ. އެއީ، ޔަހޫދީންގެ ހަމަލައެއްގައި ޝަހީދު ކޮށްލާފައިވާ އަންހެނަކާއި އޭނާގެ ތިން މާމަ ދަރިންގެ މަރުގެ ބަދަލު ހިފުމުގެ ގޮތުން ޙިޒްބުاللهއިން ދީފައިވާ ހަމަލަތަކެކެވެ
އިސްލާމީ ޖަމާޢަތެއް ކަމަށްވާ ޙިޒްބުاللهއަކީ ލުބުނާނުގައި ހަރަކާތްތެރިވާ ބާރުގަދަ ޖަމާޢަތެކެވެ. ޙިޒްބުاللهއިން ދެކޭ ގޮތުގައި އެ ޖަމާޢަތުގެ އެންމެ ބޮޑު ދުޝްމަނަކީ ޒަޔަނިސްޓު އިސްރާޢީލެވެ. އޮކްޓޫބަރު 8 ވަނަ ދުވަހުން ފެށިގެން ޙިޒްބުاللهއިން ދަނީ ޔަހޫދީންގެ އަމާޒުތަކަށް ވަރުގަދަ ހަމަލަތަކެއް އަމާޒު ކުރަމުންނެވެ. އަދި، ޔަހޫދީން ވެސް ދަނީ ރައްދުގައި ލުބުނާނަށް ހަމަލަ ދެމުންނެވެ. މި ހަމަލަތަކުގައި ޙިޒްބުالله ޖަމާޢަތުގެ 70 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަދި، ޢާންމުންގެ ގިނަ ޢަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ.
ޙިޒްބުاللهއަކީ 1982 ވަނަ އަހަރު އީރާނުގެ ރިވޮލޫޝަނަރީ ގާޑްސް އަޑީގައި އޮވެގެން އުފައްދާފައިވާ ހަތިޔާރު އެޅި ޖަމާޢަތެކެވެ. އީރާނުން މިހާރު ވެސް ދަނީ އެ ޖަމާޢަތަށް ވާގިވެރިވެދެމުންނެވެ. އެ ޖަމާޢަތް އުފެއްދުމުގެ މައިގަނޑު މަޤުޞަދަކީ ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއާ ދެކޮޅަށް ހަނގުރާމަ ކުރުމެވެ.
ޔަހޫދީންނާ ދެކޮޅަށް ކުރަމުންދާ ޖިހާދު ހުއްޓައިނުލާނެ ކަމުގައި ނަޞްރުالله ވިދާޅުވެފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,078 އަށް އުފުލިފައެވެ. އޭގެ ތެރޭގައި 4,500 އަށްވުރެ ގިނަ ޢަދަދަކަށް މައުސޫމު ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 24,000 އަށް އަރައެވެ.
