އިންތިޚާބީ ރައީސް ޑރ. މުޙައްމަދު މުޢިއްޒު، ދިވެހި އެންމެހައި ނޫސްވެރިންނާ މާދަމާރޭ ބައްދަލު ކުރައްވަން ހަމަޖައްސަވައި ދަޢުވަތު ފޮނުއްވައިފިއެވެ.
އިންތިޚާބީ ރައީސްގެ އޮފީހުން ވަނީ މިހާރު އެ ބައްދަލުވުމުގައި ބައިވެރިވާން ބޭނުންވާ ހުރިހާ ނޫސްވެރިންނަށް ދައުވަތު އަރުވާފައެވެ.
އިންތިޚާބީ ރައީސް ދިވެހި ނޫސްވެރިންނާއި ބައްދަލު ކުރައްވަން ހަމަޖައްސަވާފައިވަނީ، މާދަމާ ރޭ 8:30 ގައި ސޯޝަލް ސެންޓަރުގައެވެ.
ޑރ. މުއިއްޒުގެ ކެންޕެއިނަށް އަތޮޅުތަކަށް ކުރި ދަތުރުތަކުގައި ކެންޕެއިންގެ ހަރަކާތްތައް ކަވަރކުރުމަށް ދަތުރުތަކުގައި ބައިވެރިވި ހީވާގި މުރާލި ހިތްވަރުގަދަ ޒުވާން ނޫސްވެރިންގެ ޓީމަށް މީގެކުރިންވަނީ އިންތިޚާބީ ރައީސް ޝުކުރު އަދާކުރައްވާފައެވެ.
އިންތިހާބީ ރައީސް ވިދާޅުވެފައިވަނީ، މީޑިއާތައް ކުރިއަރުވާ ތަރައްގީކުރުމަށް ސަރުކާރުގެ ތެރެއިން ގިނަ ކަންތައްތަކެއް ކޮށްދިނުމާ އެކު މީޑިއާތަކުން ބޭނުންވާ ގޮތަކަށް މަސައްކަތް ކުރުމުގައިވެސް ހުރަހެއް ކުރިމަތި ނުކުރައްވާނެ ކަމަށެވެ.
މުއިއްޒު ވަނީ ނޫސްވެރިކަމުގެ ދާއިރާއިން ކުރިއަށް ދިއުމަށް ޝައުގުވެރިވާ ދަރިވަރުންނަށް ބޭނުންވާ ތައުލީމާއި ތަޖުރިބާގެ ފުރުސަތުތައް ހޯދައިދިނުމުގައި ސަރުކާރުގެ އެހީތެރިކަމާއި އެއްބާރުލުން ލިބޭނެ ކަމުގައިވެސް ވިދާޅުވެފައެވެ. ހަަމައެހެންމެ، ރިޔާސީ އިންތިޚާބުގެ ކެމްޕޭންގައި މުއިއްޒު ވަނީ ދައުލަތުގެ ބަޖެޓުން ވަކި އަދަދެއް ނޫސްތަކަށް ހަމަޖައްސަވާނެ ކަމަށް ވިދާޅުވެ އެކަމަށް ވައުދުވެވަޑައިގެންފައެވެ.
އިންތިޚާބީ ރައީސް ޑރ.މުއިއްޒު ރައީސް ކަމުގެ ހުވާ ކުރެއްވުމަށް ހަމަޖެހިފައި ވަނީ އަންނަ ހުކުރު ދުވަހުއެވެ. އެމަނިކުފާނު ވެގެން ދާނީ ފެހި ގާނޫނުއަސާސީގެ ދަށުން ވެރިކަން ކުރައްވާނެ ފަސް ވަނަ ރައީސަށެވެ.
