ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގައި މަައްސަލަތަކެއް ހުރުމުން ދިވެހި ފުލުހުން ފެށި ތަހްޤީޤާ ގުޅިގެން، އެ އެސޯސިއޭޝަން ހިންގުމަށާއި، އަދި މުބާރާތްތައް ކުރިއަށް ގެންދިޔުމަށް އެއްވެސް ހުރަހެއް ނޯންނާނެ ކަމަށް ފުލުހުން ވިދާޅުވެއްޖެއެވެ.
މިކަން ހާމަކުރައްވައި، ފުލުހުން މިހެން ވިދާޅުވެފައިވަނީ، އެފްއޭއެމްގެ މައްސަލައިގައި މީޑިއާ ތަަކަށް ފޮނުވި މެސެޖެއްގައެވެ.
އެ މައްސަލައިގައި ފުލުހުން އެފްއޭއެމަށް ވަދެ، އެ އިދާރާ ބަަލައި ފާސްކުރުމާ ގުޅިގެން އެފްއޭއެމްއިން އޭރު ނެރުނު ނޫސް ބަޔާނުގައިވަނީ، ތަހްޤީޤުގައި ފުލުހުން ބައެއް ސާމާނު ގެންގޮސްފައިވާ ކަމަށާއި، އޭގެ ތެރޭގައި ދުވަހުން ދުވަހަށް އެފްއޭއެމްގައި ކުރަން ޖެހޭ މަސައްކަތަށް ބޭނުންވާ ސާމާނު ހިމެނޭ ކަމަށެވެ. ހަމައެހެންމެ، އެކަމުގެ ސަބަބުން ދިވެހި ޕްރިމިއާ ލީގާއި، ކުރިއަށް ރާވާފައިވާ އެހެން މުބާރާތްތައް ވެސް ފެށުން ލަސްވާނެ ކަމަށް ބަޔާންކޮށް، ލީގުގެ ފެށުންވެސް މަޑުޖައްސާލިއެވެ.
ފުލުހުން އިތުރަށް ވިދާޅުވެފައިވަނީ، އެ ތަހްޤީޤަކީ މާލީ މުޢާމަލާތްތަކުގެ ކިތާބީ ހެކިތަކުގެ މައްޗަށް ހިންގާ ތަޙްޤީޤެއް ކަމަށެވެ. އެއީ ޒާތީ ކަމެއްގެ ގޮތުގައި ސިފަކުރަން ޖެހޭ އެއްވެސް ސަބަބެއް ނެތް ކަމަށް ފުލުހުން ވަނީ ވިދާޅުވެފައެވެ.
