ޣައްޒާގައި 50،000 މާބަނޑު އަންހެނުން އެބަތިބި؛ ޙާލަތަކީ އަލަށް އުފަންވާ ކުދިން ފުރަތަމަ ނޭވާލުމުގެ ކުރިން ޝަހީދުވުން ނުވަތަ ޔަތީމުވުން

ޔަހޫދީ އިސްރާއީލުގެ ހަމަލަތައް އަމާޒުކޮށްފައިވާ ޣައްޒާގައި 50،000 މާބަނޑު އަންހެނުން ތިބިއިރު އެތަނުގެ ޙާލަތަކީ އަލަށް އުފަންވާ ކުދިން ފުރަތަމަ ނޭވާލުމުގެ ކުރިން ޝަހީދުވެފައި ނުވަތަ ޔަތީމުވެފައި ތިބުމެވެ.

އަނިޔާވެރިކަމުގައި ހައްދުފަހަނަ އަޅާފައިވާ ޔަހޫދީން ޣައްޒާއަށް ބޮންއަޅާ ސުންނާފަތިކުރަމުންދާއިރު، އަންހެނުންނާއި ކުޑަކުދިންނަށް ބެލުމެއްނެތެވެ. ވިހަންވެފައި ތިބި މާބަނޑު އަންހެނުންނަށް ބެލުމެއް ނެތެވެ.

މާ ބަނޑު ގިނަ އަންހެނުން މިހާރު ތިބީ އެބައިމީހުންގެ ދަރިން ފުރަތަމަ ނޭވައި ލުމުގެ ކުރިންވެސް މަރުވެދާނެ ކަމަށް ބަލައިގެންނެވެ. ދިރިތިބެވޭނެ ކަމުގެ އެއްވެސް އުއްމީދެއް ނެތެވެ.

ދަތި ޙާލުގައި އުޅެ ދަރިފުޅު އުފަންވިކަމުގައިވިޔަސް، އުފަންވާ ތަނުން ބޮން އަޅައި ޝަހީދުކޮށްލަފާނެ ކަމުގެ ބިރު އެބައޮތެވެ. ހޮސްޕިޓަލުތައް ފަނާކޮށްފިއެވެ. ޞިއްޙީ ޚިދުމަތް ދޭ ތަންތަން ސުންނާފަތިކޮށްފިއެވެ.

ޣައްޒާގައި ދަރިން ލިބޭ އުުމުރުގައި ތިބި އަންހެނުންގެ އަދަދަކީ 540،000 އެވެ. އޭގެ ތެރެއިން 50،000 އަންހެނުންނަކީ ހަނގުރާމައިގެ ބިރުވެރިކަމުގެ ތެރޭގައި ވިހަން ތައްޔާރުވެފައިވާ އަންހެނުންނެވެ. އަދި އޭގެތެރެއިން 5،500 މީހުންނަކީ މި ނޮވެންބަރު މަހަށް، ދުވަސް ފުރޭ މީހުންނެވެ. ވިހަން ތައްޔާރުވެ، ވިހޭނެ ގޮތެއް އޮތީ ކޮން ގޮތަކަށްތޯ ބަލަމުންދާ އަންހެނުންނެވެ.

އަލްޝިފާ ހޮސްޕިޓަލުގައި މިދިޔަ ހޯމަ ދުވަހު ވިހެއި ހަ ކުއްޖަކު ވަނީ ވިހެއި ތަނުން ޝަހީދުވެފައެވެ. ކަރަންޓު ނުލިމުގެ ސަަބަބުން އިންކިއުބޭޓަރަށް ނުލެވިގެންނެވެ. އަލަށް އުފަންވި 36 ކުއްޖަކު ތިބީ ނާޒުކު ޙާލަތެއްގައެވެ.

ޣައްޒާގައި ކޮންމެ ދުވަހަކީވެސް ހިތްދަތިކަމުގެ ތެރޭގައިވާ ދުވަހެކެވެ. ފުރަތަމަ ނޭވާގެ ކުރިން ދުނިޔެ ދޫކޮށްދާންޖެހިދާނެ ކަމުގައި ދެކިގެން ތިބޭއިރު ބޮމާއި ދުމާއި އަލިފާނުންވަނީ ޣައްޒާ ވަށާލެވިފައެވެ.

ޣައްޒާގައި ވަނީ ހިތްފަޅައިގެންދާ ފަދަ ޙާލަތެއް މެދުވެރިވެފައެވެ. ކުއްލި ޙާލަތުގައި ފަރުވާ ދެވޭނެ ގޮތެއް ބައިނަލްއަޤްވާމީ މުޖްތަމަޢުން ފޯރުކޮށް ނުދެވިއްޖެނަމަ އެތައް ފުރާނައެއް ނެތިގެންދާފަދަ ޙާލަތެއްގައެވެ.

އެހެންނަމަވެސް، އެމައިން ދައްކަމުންދަނީ ހިތްވަރެވެ. ސާބިތުކަމެވެ. އީމާންތެރިކަމުގެ ފުރިހަމަ ނަމޫނާއެވެ.

އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް ދެމުންދާ ރަޙުމު ކުޑަ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,240 އަށް އުފުލިފައެވެ. އޭގެ ތެރޭގައި 4,630 އަށްވުރެ ގިނަ ޢަދަދަކަށް މައުސޫމް ކުޑަކުދިން ވެސް ހިމެނެއެވެ. އޭގެ ތެރޭގައި 3،130 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 27،490 އަށްވުރެ މައްޗަށް އުފުލިފައެވެ. ޒަޚަމުވެފައިވާ މީހުންގެ ތެރޭގައި 8،663 ކުޑަކުދިން ހިމެނެއެވެ.