ޖޫން 2016 ގައި މަރާލި އުމުރުން 14 އަހަރުގެ އިރުޝާން ހިލްމީގެ މަރުގެ މައްސަލައިގައި ކުށް ސާބިތުވެ، ޖަލަށް ހުކުމްކޮށްފައިވާ މީހެއްގެ އަދަބު ގޭބަންދުގައި ހުރެގެން ތަންފީޒު ކުރާ ގޮތަށް، ރައީސް އިބްރާހީމް މުޙައްމަދު ޞާލިހް އެ ހުކުމަށް ލުއި ދެއްވައިފިއެވެ.
މާލޭގެ މަގެއްގެ މަތީގައި، ވަޅިން ހަމަލާދީ ހިންގި މާރަމާރީއެއްގައި، އިރުޝާން، ރަންފަރު، ކ. ކާށިދޫ، މަރުވުމާ ގުޅިގެން، އޮގަސްޓު 2016ގައި ގަސްތުގައި މިހަކު މެރި ކަމުގެ ދައުވާ، 18 އަހަރުން ދަށުގެ ތިން ކުޑަކުދިންގެ މައްޗަށް އުފުލިއެވެ.
މީޑީޔާގައި ރިޕޯޓްކޮށްފައިވާ ގޮތުގައި، އެ ތިން ކުދިންގެ ތެރެއިން، ޖުވެނައިލް ކޯޓުގައި ހިންގި ޝަރީއަތްތަކުގައި ގަސްތުގައި މީހަކު މެރި ކަމުގެ ދައުވާ ސާބިތުވެ، 15 އަހަރުގެ ކުއްޖާއަށް 16 އަހަރާއި އަށް މަސްދުވަހުގެ ޖަލު ހުކުމެއް ހުކުމް ކުރީ، ޖުވެނައިލް ކޯޓުން މާޗު 2019 ގައެވެ. އޭރު އޭނާގެ އުމުރަކީ 19 އަހަރެވެ. އެނގިފައިވާ ގޮތުގައި، ދެން ތިބި ދެ ކުޑަކުދިންގެ މައްޗަށް ކުށް ސާބިތެއް ނުވެއެވެ.
އޭރު 19 އަހަރުގެ މިހާ (މިހާރު 23 އަހަރު ފުރިފައިވާ އެ މީހާ) ޖަލު ހުކުމް ތަންފީޒު ކުރަމުންދާތާ ހަތަރު އަހަރު ވަނީ ވެފައެވެ. ބަންދުގައި ހުރި މުއްދަތު ކަނޑައި އޭނާގެ މައްޗަށް އިއްވި ހުކުމްގައި ބާކީ އަދިވެސް ނުވަ އަހަރު އެބައޮތެވެ.
މަޢުލޫމާތު ލިބޭގޮތުގައި، އިޝާންގެ މަރުގެ މައްސަލައިގައި ކުށް ސާބިތުވެ، ހުކުމް ތަންފީޒު ކުރަމުން ގެންދާ މީހާގެ ޖަލު އަދަބު ގޭބަންދަށް ބަދަލުކޮށްފައިވަނީ މިދިޔަ މަހުގެ ފަހުކޮޅު އެވެ.
އަދި އޭނާ ގޭބަންދަށް ބަދަލުކޮށްފައިވަނީ ރައީސް އޮފީހުން އަންގައިގެން ކަމަށްވެސް މަޢުލޫމާތު ލިބެއެވެ.
ރައީސް ޞާލީހް އޭނާއަށް ދެއްވި ލުޔާއެކު، އޭނާގެ ހުކުމްގައި ބާކީ އޮތް ނުވަ އަހަރުގެ މުއްދަތު ތަންފީޒު ކުރަން ޖެހޭނީ ގޭގައި ހުރެގެންނެވެ. މިކަމާ ގުޅޭ ގޮތުން ރައީސް އޮފީހުން ވަކި އެއްޗެއް ހާމަކުރައްވާފައެއް ނުވެއެވެ.
ރައީސް ޞާލިހްގެ ވެރިކަމުގެ ފަސް އަހަރުގެ ރިޔާސީ ދައުރު އަންނަ ހުކުރު ދުވަހު ނިމޭއިރު، އެމްއެމްޕީއާރުސީގެ ބޮޑު ޚިޔާނާތް ހިންގުމުގައި އިސްކޮށް އުޅުއްވި، ކުރީގެ ނައިބު ރައީސް އަޙްމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު ޒިޔަތަށް ވެސް ރައީސް ވަނީ މައާފު ދެއްވައި އެ ދެ ބޭފުޅުން މިނިވަންކުރައްވާފައެވެ. މިކަމާ ގުޅިގެން ގިނަ ބައެއްގެ ފާޑުކިޔުން ވަނީ ސަރުކާރަށާއި ރައީސް ޞާލިހަށް އަމާޒުވެފައެވެ.
ހަމައެހެންމެ، 2017ގައި ތޫނު އެއްޗަކުން ހަމާލާދީ މަރާލި މުހައްމަދު އަނަސްގެ މަރުގެ މައްސަލައިގައި ކުށް ސާބިތުވެ، 18 އަހަރުގެ ޖަލު ހުކުމެއް އިއްވާފައިވާ ކުޑަކުއްޖެއްގެ އަދަބު ވެސް ރައީސް ވަނީ ލުއިކޮށްދެއްވާފައެވެ. އެގޮތުން، ރައީސް ނިންމަވާފައި ވަނީ އެ ހުކުމް 10 އަހަރަށް ކުޑަކުރުމަށެވެ. ރައީސްގެ މި ނިންމެވުންތަކާ ގުޅިގެން އާންމުންގެ ފާޑުކިޔުން ވަރަށް ބޮޑަށް ވަނީ އަމާޒުވެފައެވެ.
