އެމަނިކުފާނުގެ ސަރުކާރަކީ ހާމަކަން ބޮޑު ގޮތެއްގައި ހިންގަވާނެ ސަރުކާރެއްކަމަށާއި، ވެރިކަމަށް ވަޑައިގަތީ ފިއްލަވަން ނޫންކަމަށް، އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޑރ. މުޙައްމަދު މުޢިއްޒުގެ ސަރުކާރުގެ ފުރަތަމަ ސާދަ ހަފުތާގެ ތެރޭގައި ޙާސިލުކުރައްވާނެ ކަންކަމުގެ ޕްލޭން އިފްތިތާޙް ކުރުމަށް ދަރުބާރު ގޭގައި ބޭއްވި ޙަފްލާގައި ވާހަކަ ދައްކަވަމުންނެވެ.
އެމަނިކުފާނު ވިދާޅުވީ މިރޭ ހުށަހެޅިގެންދިޔައީ 14 ހަފުތާގެ ތެރޭގައި މަދުވެގެން ޙާސިލުކުރާނެ މަސައްކަތްތަކުގެ ޕްލޭންކަމަށެވެ.
14 ހަފުތާގައި ކުރާނީ މިހާރު ހަމައެކަނި ކަނޑައެޅިފައިވާ ކަންތައްތައް ނޫން ކަމަށާއި އެއަށްވުރެ ގިނަަ ކަންތައްތައްވެސް ކުރިއަށްދާނެ ކަމަށް ޑރ. މުޢިއްޒު ވިދާޅުވިއެވެ.
"ތި ފޮތް ނެރެގެން ފިލޭނެ އެއްގޮތެއްވެސް ނޯންނާނޭ ބައެއް މީހުން ބުނި. އެކަމަކު އަޅުގަނޑު މިއައީ ފިލާކަށްނޫން. ދެއްކި ހުރި ހުރިހާ ވާހަކަތަކެއް އެހެރީ. އަޅުގަނޑުމެންގެ ސަރުކާރު ވާނީ އެއްވެސް ކަމެއް ނުފޮރުވާނެ ސަރުކާރަކަށް." ޑރ. މުޢިއްޒު ވިދާޅުވިއެވެ.
ޑރ. މުޢިއްޒު ވިދާޅުވީ، ރައްޔިތުންނަށްޓަކައި ވީ ވަޢުދުތައް އިޚްލާޞްތެރިކަމާއެކު ކުރައްވާނެ ކަމަށާއި، އާމްދަނީ އިތުރުކުރެވޭ މިންވަރަކުން އަދި ޚަރަދުތައް ކުޑަކުރެވޭނެ މިންވަރަކުން ކަންތައްތައް ކުރައްވާނެ ކަމަށެވެ.
އުމުރާނީ ތަރައްޤީ މިހާރު ސޮއްސާލާފައިވާ ހިސާބުން، ކުރިއަށް ގެންދާނެ ކަމަށާއި، ރީތި އާދަކާދަތަކާ އެކީ އުފަލާއެކީ އުޅެވޭނެ އުފާވެރި ދަތުރު ފެށޭނެ ކަމަށާއި، ދިވެހި ޤައުމިއްޔަތު ކުރީގެ މާޒީގައިވާ ފަދައިން އަނބުރާ ކޮޅަށް ޖަހާނެ ކަމަށްވެސް މުޢިއްޒު ވިދާޅުވިއެވެ.
"އިރާދަކުރެއްވިއްޔާ ރައްޔިތުން އެދޭ ގޮތަށް، ރައްޔިތުންނާ ގާތުން މަސައްކަތްކޮށްދޭނަން. ދިވެހީންގެ ރާއްޖެ ދިވެހީންނަށް ހޯދައިދޭނަން." ޑރ. މުޢިއްޒު ވިދާޅުވިއެވެ.
އިޚްލާސްތެރިކަމާއެކު މަސައްކަތްކޮށް، ދީނީ އަދި ޤައުމީ މަސައްކަތްކޮށް، ނަތީޖާ ނެރެދެއްވާނެ ކަމަށާއި ރެއާއި ދުވާލު ކުރައްވާނީ އެމަސައްކަތްކަމުގައި ކަމަށްވެސް އެމަނިކުފާނު ވިދާޅުވިއެވެ.
