ރައީސް ޞާލިހް ދައުރު ހޭދަކުރެއްވީ ނަމުން ޒީރޯ ޓޮލަރެންސްގައި، ކަމުން ވައްކަމާއި ޚިޔާނާތުގަ: ޑިމޮކްރެޓްސް

ރައީސް ޞާލިޙްގެ ވެރިކަމުގެ ފަސް އަހަރުގެ މުއްދަތު މުޅިންހެން ހޭދަކުރެއްވީ ނަމުން "ޒީރޯ ޓޮލަރަންސް"ގައި ނަމަވެސް، ކަމުން ވައްކަމާއި، ޚިޔާނާތާއި، ފަސާދައިގެ ތެރޭގައި ކަމަށް ދަ ޑިމޮކްރެޓްސްއިން ވިދާޅުވެއްޖެއެވެ.

އެ ޕާޓީން މިހެން ވިދާޅުވެފައިވަނީ، ރައީސް އިބްރާހިމް މުޙައްމަދު ޞާލިޙްގެ ވެރިކަމުގެ ދައުރު ނިމޭން ދެދުވަހަށް ވެފައި ވަނިކޮށް ދިވެހިރާއްޖޭގައި ހިންގާފައިވާކަމަށް ބެލެވޭ އެންމެ ބޮޑު ޚިޔާނާތް – އެމްއެމްޕީއާރްސީ މައްސަލައިގައި ކުށް ސާބިތުވެ، ޙުކުމް ތަންފީޒުކުރަމުންދާ ކުރީގެ ނައިބް ރައީސް އަޙްމަދު އަދީބް ޢަބްދުލް ޣަފޫރާއި، އެމްއެމްޕީއާރްސީގެ މެނޭޖިންގް ޑިރެކްޓަރގެ މަޤާމު ފުރުއްވި ޒިޔަތުގެ އަދަބު ލުއިކޮށްދީ، މިނިވަންކޮށްފައިވާތީ އެ ކަން ކުށްވެރިކުރައްވައި، ދަ ޑިމޮކްރެޓްސްއިން ނެރުއްވި ބަޔާނެއްގައެވެ..

ޑިމޮކްރެޓްސްގެ ބަޔާނުގައި ވަނީ، އެމްއެމްޕީއާރްސީގެ ޚިޔާނާތަށް އިންސާފު ހޯދުމާއި، ގެއްލިފައިވާ ފައިސާ ހޯދުމަކީ ރައީސް ޞާލިޙްގެ 2018 ގެ ރިޔާސީ ވަޢުދެއްކަމުގައި ވާހިނދު، އެރޮނގުން ކުޑަވެސް ކާމިޔާބެއް ހޯއްދެވިފައި ނެތް ތާނގާއި، ރައީސް ޔާމީން ޢަބްދުލް ޤައްޔޫމްގެ ވެރިކަމުގައި އެމްއެމްޕީއާރްސީގެ ޚިޔާނާތާ ގުޅިގެން ހައްޔަރުކޮށް، ތަޙްޤީޤުކޮށް، ދައުވާ އުފުލާ، ޙުކުމް އިއްވާ، އެޙުކުމް ތަންފީޒުކުރަމުންދާ ފަރާތްތައްވެސް މިނިވަން ކުރިކަމީ ވަކިވާންމިދާ ސަރުކާރުގެ ކިބައިގައި ދިވެހި ދައުލަތާއި، ރައްޔިތުންގެ ޙައްޤުތަކަށް ކުޑަވެސް އިޙްތިރާމެއް ނެތުމުގެ ދަލީލެއް ކަމުގައެވެ.

ވައްކަމާއި ޚިޔާނާތުގެ ކުށަށް އެކަށީގެންވާ އަދަބެއް ނުލިބޭނޭކަން ސިޔާސީންނަށް ޔަޤީންކޮށްދެއްވުމަށް ދިވެހި ރައްޔިތުންގެ ޤައުމީ މަޞްލަޙަތުތަކާ ދިމާ އިދިކޮޅަށް އަޅުއްވާފައިވާ މި ފިޔަވަޅަކީ ރައީސުލްޖުމްހޫރިއްޔާއަށް ލިބިވަޑައިންނަވާ ޤާނޫނީ އިޚްތިޔާރުތަކާއި، ބާރުތަކުގެ ބޭނުން ނަހަމަގޮތުގައި ހިއްޕެވުން ކަމުގައި އެ ޕާޓީއިން ދެކޭ ކަމުގައި ވެސް ވިދާޅުވެފައިވެއެވެ.

ރައީސް ޞާލިޙްގެ ވެރިކަމުގެ ފަސް އަހަރުގެ މުއްދަތު މުޅިންހެން ހޭދަކުރެއްވީ ނަމުން "ޒީރޯ ޓޮލަރަންސް"ގައި ނަމަވެސް، ކަމުން ވައްކަމާއި، ޚިޔާނާތާއި، ފަސާދައިގެ ތެރޭގައި ކަމަށް ފާހަގަކުރައްވަމުން، ދައުލަތުގެ މުވައްސަސާތަކާއި، ކުންފުނިތައް މެދުވެރިކޮށްގެން ވާގިވެރިންނާއި، ގާތްތިމާގެ ޢާއިލީ ބޭބޭފުޅުންނާއި، އަމިއްލަފުޅު ޖީބަށް ބަރުކުރެއްވުމުގައި ކަމަށާއި، ގޮތެއްފޮތެއް ބެލުމެއްނެތި ރިޝްވަތާއި ވައްކަމުން ކެމްޕޭނަށް ފައިސާ ހޯއްދެވުމާއި، ޚަރަދުކުރެއްވުމުގައި ކަމަށާއި، ޖަވާބުދާރީވުމާއި ޢަދުލުވެރިކަމުގެ ސިފަތައް ދިވެހި ދައުލަތުން ނައްތާލެއްވުމުގައި ކަމަށް ވެސް އެޕާޓީން ވިދާޅުވެފައިވެއެވެ.

ދަ ޑިމޮކްރެޓްސްއިން ވިދާޅުވީ، ކަންމިހެން ހުރިއިރު، ދެވަނަ ދައުރެއް ހޯއްދެވުމުގެ ބޭނުންފުޅުގައި ހިންގެވި ޖަރީމާތަކުގެ ތެރޭގައި އެމްއެމްޕީއާރްސީގެ ޚިޔާނާތުގެ ފައިސާ ކެމްޕޭނަށް ހޯއްދެވުމުގެ ޑީލެއްގެ ދަށުން ކުރީގެ ނައިބް ރައީސްއާ މުޢާމަލާތްކުރައްވާފައިވާ ކަމުގެ ތުހުމަތު އުފުލިފައިވާ ކަމަށާއި، ކުރީގެ ނައިބް ރައީސް މިނިވަންކުރުމަކީ މި ތުހުމަތަށް ބާރުދޭ، އަލިކުރާ ޤަރީނާއެއް ކަމަށެވެ.

އެހެންވެ، ރައީސް ޞާލިޙްގެ މިނިންމެވުމުގެ ފަހަތުގައި އެމްއެމްޕީއާރްސީގެ ޚިޔާނާތުގެ ފައިސާ ވާ މިންވަރެއް ބެލުމަށާއި، ދިވެހިރާއްޖޭގެ މަޞްލަޙަތުގެ މައްޗަށް ދެ މުޖުރިމަކަށް އެންމެ ލުއިގޮތް އިސްކުރުމުގައި ހިންގާފައިވާކަމަށް ތުހުމަތުކުރެވޭ ނުފޫޒާއި ބާރު، ފައިސާއާއި މަޤާމުގެ މުޢާމަލާތްތައް ތަޙްޤީޤުކޮށް ފިޔަވަޅު އެޅުމަށް ވެރިކަމާ ޙަވާލުވާންދާ ޕްރޮގްރެސިވް ކޯލިޝަނަށް އެ ޕާޓީ ގޮވާލައްވާފައިވެއެވެ.