އެކްޓިން ޕޮލިސް ކޮމިޝަނަރަކަށް، މިހާރުގެ ޑެޕިއުޓީ ކޮމިޝަނަރ އޮފް ޕޮލިސްގެ މަޤާމުގައި ހުންނެވި ޢަބްދުލްމަންނާން ޔޫސުފް ހަމަޖައްސަވައިފިއެވެ.
ފުލުހުންގެ ޚިދުމަތުގައި މަސައްކަތް ކުރައްވާތާ 29 އަހަރު ވެފައިވާ މަންނާނު މި މަޤާމަށް ހަމަޖައްސަވާފައި މިވަނީ ކޮމިޝަނަރ އޮފް ޕޮލިސް މުޙައްމަދު ޙަމީދު ފުލުހުންގެ ޚިދުމަތުން ޝަރަފުވެރިކަމާއެކު ރިޓަޔަރކުރެއްވުމާއި ގުޅިގެންނެވެ.
ފުލުހުން ވިދާޅުވީ، ކޮމިޝަނަރ އޮފް ޕޮލިސްގެ މަޤާމުން މުޙައްމަދު ޙަމީދު ޝަރަފުވެރިކަމާއެކު ރިޓަޔަރ ކުރައްވާފައިވާތީ ދިވެހި ފުލުހުންގެ ޚިދުމަތުގެ ޤާނޫނުގެ 58 ވަނަ މާއްދާގެ (ނ) ގައިވާ ގޮތުގެ މަތިން ކޮމިޝަނަރެއް އައްޔަނުކުރެވެންދެން ކޮމިޝަނަރ އޮފް ޕޮލިސްގެ މަސްއޫލިއްޔަތުތައް އަދާކުރައްވާނެ ފަރާތަކީ، ޑެޕިއުޓީ ކޮމިޝަނަރ އޮފް ޕޮލިސް ޢަބްދުލްމަންނާން ޔޫސުފް ކަމުގައި ހޯމް މިނިސްޓަރ ޢިމްރާން ކަނޑައަޅުއްވާފައިވާކަމަށެވެ.
އޭނާ ވަނީ އިންޑިއަން ނޭޝަނަލް ޕޮލިސް އެކަޑަމީއިން ތަޢުލީމު ޙާޞިލުކުރެއްވުމަށް، އިނގިރޭސިވިލާތުން މާސްޓަރސް ޑިގްރީ ޙާޞިލުކުރައްވާފައެވެ.
އޭނާ ޚާއްސަވެފައިވާ ދާއިރާތަކުގެ ތެރޭގައި ޗައިލްޑް އެންޑް ފެމިލީ ޕްރޮޓެކްޝަން އަދި ޔޫތު ކްރިމިނަލް ޖަސްޓިސްގެ ދާއިރާ ފާހަގަކޮށްލެވެއެވެ.
