ކާމިޔާބު ދުވަހެއްގެ ފެށުމަކީ ފަތިސް ނަމާދު ކަމަށް އައްޝައިޚް އިބްރާހީމް ރަޝީދު ޙަސަން ވިދާޅުވެއްޖެއެވެ.
ޝެއިޚް އިބްރާހީމް ރަޝީދު ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ވިދާޅުވީ، ކާމިޔާބު ދުވަހެއްގެ ފެށުމަކީ ފަތިސް ނަމާދު ކަމަށެވެ.
ޝެއިޚް ވިދާޅުވީ، ފަތިސް ނަމާދަކީ ހޭލެވުނު އިރަކުން ކުރަން އޮންނަ ނަމާދެއް ނޫން ކަމަށާއި، އެންމެ ލަސްވެގެން އިރު އެރުމުގެ ކުރިން ކުރަންވާނެ ކަމުގައެވެ.
"ނަމާދަށް ފަރުވާތެރިނުވެ، ދިރިއުޅުން ބާއްޖަވެރިއެއް ނުކުރެވޭނެއެވެ!" ޝެއިޚް ވިދާޅުވިއެވެ.
ނަމާދަކީ، އިސްލާމްދީނުގެ ރުކުންތަކުގެ ތެރެއިން ރުކުނެކެވެ. އީމާންކަމުގައި ނަމާދުގެ މަޤާމަކީ، ހަށިގަނޑުގައި ބޮލުގެ މަޤާމެވެ. ކީރިތި ޤުރުއާނާއި ސުންނަތުގައި ވަނީ، ނަމާދަށް ވަރަށް ބޮޑު އަހަންމިއްޔަތެއް ދެއްވާފައެވެ. ނަމާދު ކުރުމަށް އަންގަވައި އަމުރުކުރައްވާފައިވަނީ، ވަރަށް ވެސް ގަދަ އަމުރުންނެވެ.
ނަމާދުކުރުމަށް އަންގަވައި، ނަމާދު ނުކުރާ މީހުންނަށް ވަރަށް ވަރުގަދަ އިންޒާރުން އިންޒާރު ދެއްވާފައިވެއެވެ. ފަހެ، ނަމާދަކީ، ދީނުގެ ތަނބެވެ.
