ތިލަފުށީ ފަޅު ހިއްކުމުގެ މަސައްކަތް ކުރުމަށް ހަމަޖެހިފައިވާތީ އެ ސަރަހައްދުގައި ހުރި އުޅަނދުތައް ނެގުމަށް އާބަންކޯއިން އަންގަވައިފިއެވެ.
އާބަންކޯއިން ކުރި އިއުލާނެއްގައި ވިދާޅުވެފައި ވަނީ ތިލަފުށީގެ އޭރިއާ އީ ހިއްކުމުގެ މަސައްކަތް އަންނަ މަހު 18 ގައި ފެށުމަށް ހަމަޖެހިފައިވާކަމަށެވެ.
ބިން ހިއްކުމަށް ހަމަޖެހިފައިވާ ސަރަހައްދުގެ ވަށައިގެން ހުރި ބިންތަކުގައި އުޅަނދުތައް މަރާމާތުކުރުމުގެ މަސައްކަތްވެސް ކުރަމުންދާކަމަށް އާބަންކޯއިން ވިދާޅުވެފައިވެއެވެ. އެ ސަރަހައްދުގައި ހުރި ހުރިހާ އުޅަނދެއް ހަތް ދުވަހުގެ ތެރޭގައި ނެގުމަށް އެ ކުންފުނިން ވަނީ އަންގަވާފައެވެ.
އާބަންކޯއިން ދީފައިވާ މުއްދަތުގެ ތެރޭގައި އުޅަނދުތައް ނުނަގައިފިނަމަ އެ ކުންފުނީގެ އުސޫލުގެ ދަށުން އަމަލު ކުރާނެކަމަށް އާބަންކޯއިން ވިދާޅުވެއެވެ.
ތިލަފުށީގެ މާސްޓާ ޕްލޭނާ އެއްގޮތަށް ތިލަފުށި ތަރައްގީ ކުރުމަކީ ރާއްޖޭގެ އިގްތިސާދާ ވަރަށް ބޮޑަށް ގުޅިފައިވާ ކަމެއް ކަމަށާއި، އެހެންވެ، މާސްޓާ ޕްލޭނާ އެއްގޮތަށް، ހިއްކަން ޖެހޭ ތަންތަން އަވަސް މުއްދަތެއްގެ ތެރޭގައި ނިންމަން މަސައްކަތް ކުރަމުން އަންނަ ކަމަށް އެ ކުންފުނިން ހާމަކުރައްވައެވެ.
