އިސްލާމީ ދާއިރާގައި އަންހެން ބޭފުޅުންގެ ލީޑަރޝިޕް ފެނިގެން ދިއުމަކީ ވަރަށް މުހިންމުކަމެއް ކަމަށް، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އިސްލާމީ ކަންތައްތަކާ ބެހޭ ވުޒާރާގެ ނައިބެއްގެ ގޮތުގައި އުސްތާޛާ ޙައްވާލަޠީފް، ރައީސުލްޖުމްހޫރިއްޔާ ޢައްޔަނުކުރެއްވުމާ ގުޅިގެން އެކްސްގައި ކުރެއްވި ޕޯސްޓެއްގައެވެ.
ވަޒީރު ވިދާޅުވީ، އިސްލާމިކް މިނިސްޓަރގެ ނައިބަކަށް އަންހެންބޭފުޅެއް ހަމަޖެއްސެވިކަމަށްޓަކައި ރައީސް ޑރ މުއިއްޒަށް ޝުކުރު ދަންނަވާ ކަމަށެވެ. އަދި އުސްތާޛާ ޙައްވާލަޠީފަކީ އަލްއަޒުހަރު ޔުނިވަރސިޓީއިން ތައުލީމު ޙާޞިލްކުރެެއްވި ބޭފުޅެއް ކަމަށް އެ މަނިކުފާނު ވިދާޅުވިއެވެ.
އެކަމަނާ ކުރިން ހުންނެވީ އިސްލާމީ ޔުނިވަރސިޓީގެ ޑެޕިއުޓީ ވައިސްޗާންސެލަރގެ މަޤާމުގައެވެ. އެކަމަނާ އިސްލާމީ ކަންތައްތަކާބެހޭ ވުޒާރާގެ ނައިބެއްގެ ގޮތުގައި ހަމަޖެއްސެވިކަން ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވަނީ އިއްޔެގެ ވަގުތެއްގައެވެ.
