ޕަބްލިކް ސާވިސް މީޑިއާގެ ނިއުސްރޫމް ހިންގުން ވަގުތީގޮތުން ސީނިއާ ޖާނަލިސްޓް ހުސެއިން އަމީންއާ ހަވާލުކޮށްފިއެވެ.
މެނޭޖިންގ ޑިރެކްޓަރ ޒީނާ ޒާހިރު ނެރުއްވި މެމޯގައި ބުނަނީ ކުންފުނީގެ ނިއުސް ޑިޕާޓްމަންޓް މިހާރުން ފެށިގެން ވަގުތީ ގޮތުން ހިންގުން ސީނިއާ ޖާނަލިސްޓް ހުސައިން އަމީނާއި ހަވާލު ކުރައްވާ ކަމަށެވެ. އަދި އޭނާގެ އެހީތެރިންގެ ގޮތުގައި ދެން ތިއްބަވާނީ ސީނިއާ އެޑިޓަރު އަހުމަދު ޖަދުއާނާއި ސީނިއާ އެޑިޓަރު މުހައްމަދު ޖިނާހް އަލީ ކަމަށެވެ.
އަދި އެ މެމޯގައި ބުނަނީ މަސްއޫލިއްޔަތުން ދުރުކުރި ޑިރެކްޓަރު ނިއުސް އެންޑް ކަރަންޓް އެފެއާޒް، އަފްސަލް ވަގުތީ ގޮތުން "ދެން ކުރާނީ މެނޭޖިން ޑިރެކްޓަރު ޒީނާ ޒާހިރު އެންގެވި ކަމެއް" ކަމަށެވެ.
ދައުލަތުގެ މީޑިއާ ޕީއެސްއެމްގެ ނިއުސްހެޑުގެ މަޤާމަށް ބަދަލު ގެނެސްފައިވަނީ ކުންފުނީގެ ހިންގުމަށް ތަނުގެ އެމްޑީއަށް ގެންނަން ފެންނަ ބަދަލުގެ ތެރެއިން ފުރަތަމަ ގެނައި ބަދަލެއްގެ ގޮތުގައެވެ.
އެމްޑީ ޒީނާ ވަނީ ތަނުގެ ހިންގުން ހަރުދަނާކޮށް އޮތް ބޮޑު ދަރަނިން ސަލާމަތް ކުރުމަށް މުހިންމު މަސައްކަތްތަކެއް ފަށާފައެވެ. އެގޮތުން ތަނުގެ ހިންގުމަށް ގެންނަންޖެހޭ ބަދަލުތަކާއި، އެނޫންވެސް ގިނަ ބަދަލުތަކެއް ތަނަށް ގެނައުމަށް އެމްޑީ ޒީނާ ވަނީ ނިންމަވާފައެވެ.
