ރާއްޖޭއަކީ ވަރަށް ގިނަ ބިދޭސީ މަސައްކަތްތެރިން މަސައްކަތްކުރާ ޤައުމަކަށްވުމާއެކު، މާލޭގެ ކޮންމެވެސް އެއް މިސްކިތެއްގައި އިނގިރޭސި ބަހުން ޚުތުބާ ކިޔުމާއިމެދު އިސްލާމިކް މިނިސްޓަރު ޑރ. މުހައްމަދު ޝަހީމް އާއްމުންގެ ޚިޔާލަށް ހުޅުވާލައްވައިފިއެވެ.
މިއަދު މިނިސްޓަރު ކުރެއްވި ޕޯސްޓެއްގައި ވިދާޅުވެފައިވަނީ، ރާއްޖޭއަކީ ވަރަށް ގިނަ ބިދޭސީ މަސައްކަތްތެރިން މަސައްކަތްކުރާ ޤައުމަކަށްވެފައި އަމުދުން މާލޭ ސިޓީ ސަރަހައްދުގައި ގިނަ އަދަދަކަށް މުސްލިމު މަސައްކަތްތެރިން އުޅެމުން އަންނައިރު މާލޭ ސިޓީގެ ކޮންމެވެސް އެއް މިސްކިތެއްގައި އިނގިރޭސިން ޚުތުބާ ކިޔުމާއިމެދު ރައްޔިތުންގެ ޚިޔާލު ބަލައިލަން ބޭނުންކަމަށެވެ."މިހެން މި ދެންނެވީ މަސައްކަތްތެރިންގެ ސްލޫކާއި އަޚްލާޤު އަދި ދީންވެރިކަން އިތުރުވުމުގައި އެމީހުން ދަންނަ ބަހަކުން އިއްވޭ ޚުތުބާގެ ދައުރު މުހިންމުކަމަށް ފެންނާތީ" މިނިސްޓަރު ވިދާޅުވެފައިވެއެވެ.
މިނިސްޓަރު އިތުރަށް ވިދާޅުވެފައިވަނީ އެއީ ހަމައެކަނި ޚިޔާލެއް ހޯދާލުމުފެ މަޤްޞަދުގައި ކުރެއްވި ޕޯސްޓެއް ކަމަށެވެ.
މީގެ ކުރިންވެސް އިސްލާމިކް މިނިސްޓަރ ކަން ކުރެއްވ، ޑރ. ޝަހީމް، ޑރ. މުޙައްމަދު މުޢިއްޒުގެ ސަރުކާރުގެ އިސްލާމިކް މިނިސްޓަރ ކަމާ ޙަވާލުވެވަޑައިގެންނެވިފަހުން، އަނެއްކާވެސް ރާއްޖޭގައި އިސްލާމީ ކަންތައްތައް ފުޅާކޮށް އިސްލާމީ ތަޢުލީމު ފެތުރުމަށް ގިނަ މަސައްކަތްތަކެއް ފައްޓަވާފައިވާކަން ފާހަގަކުރެއްވެއެވެ.
