ސިފައިން އަނބުރާ ގެންދަން އިންޑިއާއިން އެއްބަސްވެފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ. މުއިއްޒު ކޮޕް28 އަށް ތުރުކީ އާއި އެކުވެރި އަރަބި އިމާާރާތް (ޔޫއޭއީ)އަށް ކުރެއްވި ދަތުރުފުޅަށް ފަހު ނޫސްވެރިންނާއި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ، އިންޑިއާ ސިފައިން ރާއްޖެއިން ފޮނުވާލުމާ ގުޅޭގޮތުން އިންޑިއާއާ ރަސްމީކޮށް އިންޑިއާ ސަރުކާރަށް ދެންނެވިފައިވާނެ ކަމަށެވެ.
ދުބާއީގައި ކުރިޔަށް ދިޔަ މޫސުމާ ބެހޭ ސަމިޓް، ކޮޕް28 ގެ ހަވާސާގެ ތެރެއިން ރައީސް ވަނީ އެ ގައުމުގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައިފައެވެ.
ރައީސް ވިދާޅުވީ، ޓްރާންސިޝަން މުއްދަތުގައި އާއި އޭގެ ފަހުންވެސް އިންޑިއާ ސަފީރާއެކު 4،5 ބައްދަލުވުމެއް އެންމެ އިސް ބައްދަލުވުމެއް ބާއްވާފައިވާނެ ކަމަށާއި، ރައީސް ކަމުގެ ހުވާކުރެއްވުމަށްފަހު ޖެހިގެން އައި ދުވަހު އިންޑިއާ ސަރުކާރަށް ދިވެހި ސަރުކާރުގެ ފަރާތުން ރާއްޖޭގައި ތިބި އިންޑިއާ ސިފައިން ގެންދިއުމަށް ރަސްމީކޮށް އެދިވަޑައިގެންވި ކަމަށެވެ.
"އަދި އޭގެ ކުރިން ކުރެވުނު މަސައްކަތާއި މިއަދާއި ހަމައަށް އައިއިރު ކުރެވުނު މަަސައްްކަތާއި އިންޑިއާ ސަރުކާރުން އަޅުގަނޑުމެންނަށް އެއްބަސްވެފައި ވަނީ އިންޑިއާ ސިފައިން އަނބުރާ ގެންދަވާނެ ކަމަށް". ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ބޭނުންވަނީ ދިވެހި ގައުމާއި މަސްހަލަތު އިސް ކުރަން ކަމަށާއި، އިންޑިޔާ ސިފައިން ބޭލުމުގެ ކަންތަކުގެ ވަރަށް ފަސޭހަ ޖަވާބެއް ދެވިގެންދާނެ ކަމަށެވެ.
"ދިވެހިން އަޅުގަނޑަށް ފުރަތަމަ އަންނާނީ އެހެން ގައުމެއްގެ ރައްޔިތުންނެއް، އެހެން ގައުމެއް ނާންނާނެ އަޅުގަނޑުގެ ކުރިމަތީގައި އެހެން ގައުމެއްގެ ކުރިއަކަށް". ރައީސް ވިދާޅުވިއެވެ.
އެމަނިކުފާނު ވިދާޅުވީ އިންޑިޔާ ސިފައިން ބޭލުމުގެ މަސައްކަތްވެސް ކުރިއަށްދާނީ، އެކުލަވާލެވިފައިވާ ކޮމިޓީތަކުގައި މަޝްވަރާކޮށް، ޑިޕްލޮމެސީގެ ރިވެތި އުސޫލުން އެކަން ކުރަމުން ގޮސްފައިވާ ކަމަށް ވިދާޅުވިއެވެ.
"އަދި މިހާރު އެއްބަސްވެފައި މިވަނީ ހައި ލެވެލް ކޮމިޓީއެއް ވެސް އެކުލަވާލަން މަޝްރޫއުތައް ކުރިއަށް ގެންދިއުމުގައި ދިމާވާ މައްސަލަތައް ހައްލުކުރުމަށް، މިސާލަކަށް މާލެ ކައިރީގައި މި ހިނގާ ބްރިޖް މަޝްރޫއު އާއި އެކިއެކި ލޯންތަކުގައި މި ދިމާވާ ކަންކަމާ، ގައުމަށް މި ދިމާވެފައިވާ ބޮޑެތި މައްސަލަތަކާ."
އިންޑިއާއާ އެކު މިހާތަނަށް ބޭއްވި ހުރިހާ ބައްދަލުވުންތަކުގައި ވެސް ސިފައިންގެ މައްސަލާގައި ވާހަކަ ދެއްކެވި ކަމަށާއި ރައްޔިތުން އެދޭ ގޮތް ވަރަށް ސާފުކޮށް ދެންނެވި ކަމަށް ރައީސް ވިދާޅުވި އެވެ. އެކަން ހާސިލްކުރެއްވޭނެ ކަމުގެ ޔަގީންކަން ވެސް ލިބިވަޑައިގެންފައިވާ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި އަނގަބަހުން ކުރެވުނު މަޝްވަރާތަކަށް ފަހު، ކޯ ގްރޫޕެއް ހަދައި އެ މަސައްކަތް ކުރިއަށް ގެންދަން އޮތީ ނިންމައިފައެވެ.
