ރައްޔިތުންގެ މަޖިލީހުގެ ސަލާމަތީ ޚިދުމަތްތަކުގެ ކޮމިޓީ (241 ކޮމިޓީ)ގެ މުޤައްރިރަކަށް ރައްޔިތުންގެ މަޖިލީހުގެ ހަނިމާދޫ ދާއިރާގެ އެމްޑީޕީ މެންބަރު އަބްދުލް ޣަފޫރު މޫސާ އިންތިހާބުކޮށްފިއެވެ.
އެ ކޮމިޓީގެ މުގައްރިރަކަށް ކުރިން ހުންނެވީ މަޖިލީހުގެ މިހާރުގެ ރައީސް މުހައްމަދު އަސްލަމެވެ. ރައީސް ކަމަށް އޭނާ އިންތިޚާބު ވުމާއެކު އަސްލަމް ވަނީ އެ ކޮމިޓީގެ މެންބަރު ކަމުން ވަކިވެފައެވެ.
241 ކޮމިޓީއަށް މުގައްރިރަކު ހޮވަން މިއަދު ބޭއްވި ބައްދަލުވުމުގައި ޣަފޫރުގެ ނަން ހުށަހެޅުއްވީ ދުވާފަރު ދާއިރާގެ އެމްޑީޕީ މެންބަރު އިސްމާޢީލް އަޙްމަދެވެ. އެ ހުށަހެޅުމަށް ތާއީދުކުރެއްވީ ހޯރަފުށި ދާއިރާގެ އެމްޑީޕީ މެމްބަރު އަޙްމަދު ސަލީމެވެ. ކޮމިޓީގެ މުޤައްރިރަކަށް ޣަފޫރު އިންތިޚާބު ކުރީ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާޤުންނެވެ.
241 ކޮމިޓީއަކީ ގާނޫނު އަސާސީގެ 241 ވަނަ މާއްދާއިން ބާރުދީފައިވާ ކޮމިޓީއެވެ. އެކޮމިޓީގެ މައިގަނޑު މަސްއޫލިއްޔަތަކީ ސަލާމަތީ ޚިދުމަތްތައް ހިނގާ ނުހިނގާ ގޮތް ބެލުމާއި ގައުމީ ސަލާމަތުގެ ކަންކަން ދިރާސާކުރުމާއި ޤައުމީ ސަލާމަތުގެ ސިޔާސަތުތަކަށް ގެންނަންޖެހޭ ބަދަލެއް އޮތްނަމަ، އެކަމެއް ފާހަގަކޮށް އެކަމެއް މަޖިލީހަށް ހުށަހެޅުމެވެ،
އެ ކޮމިޓީގެ މޭންޑޭޓްގައި، ސިފައިންނާއި ފުލުހުން، ޑިފެންސް މިނިސްޓްރީ އަދި ނޭޝަނަލް ޑިޒާސްޓަ މެނޭޖްމަންޓް އޮތޯރިޓީއާ ގުޅުން ހުރި މައްސަަލަތައް ބެލުން ހިމެނެއެވެ. އެ ތަންތަނާ ގުޅޭ ބިލުތައް ދިރާސާކުރާނީ ވެސް އެ ކޮމިޓީންނެވެ. ހަމައެެހެންމެ އެތަންތަނުގެ މައްސަލަތައް ބަލައި ކަންތައްތައް އިސްލާޙް ކުރަން އެންގުމާއި އެ އިދާރާތަކަށް ފިޔަވަޅު އެޅުމުގެ ބާރު ވެސް އެކޮމިޓީއަށް އޮވެ އެވެ.
