ފުޓްބޯލް އެސޯސިއޭޝަން އޮފް މޯލްޑިވްސް، އެފްއޭއެމްގެ ރައީސް ބައްސާމް އަދީލް ޖަލީލް, ރާއްޖެއިން ބޭރަށް ފުރުން މަނާކޮށް އަންގާރަ ދުވަހު އޭނާގެ ޕާސްޕޯޓް ހިފަހައްޓައިފިއެވެ.
ބައްސާމްގެ ޕާސްޕޯޓް ހިފެހެއްޓިކަން ކަށަވަރުކުރެވިފައިވީނަމަވެސް، އިމިގްރޭޝަނުން އެކަން މީޑިޔާއަށް އެކަން ކަށަވަރުކޮށް ދީފައެއް ނުވެއެވެ.
އޭނާގެ ޕާސްޕޯޓް ހިފެހެއްޓީ، އެފްއޭއެމް އަށް ބޭރުގެ އިދާރާތަކުން ދޭ ފައިސާއަށް ހިޔާނާތްތެރިވާ ކަމުގެ ތުހުމަތުގައި އެ މައްސަލަ ދިވެހި ފުލުހުން ތަހުޤީޤު ކުރަމުންދާ ދަނޑިވަޅެއްގައެވެ. އަދި ޕީޖީގެ އަމުރަށް ފުލުހުން އެފްއޭއެމް އަށް ވަދެ އެތަން ބަލާ ތަހުގީގަށް ބޭނުންވާ މައުލޫމާތު ހޯދާފައިވެއެވެ.
މިހާތަނަށް ހާމަކޮށްފައިވާ މައުލޫމާތަށް ބަލާއިރު، ބައިނަލްއަޤްވާމީ އިދާރާތަކުން އެފްއޭއެމް އަށް ފޮނުވާ ފައިސާ އެ އިދާރާގެ ވެރިންނާއި އެ އިދާރާގެ ވެރިންނާ ގުޅުން އޮންނަ ފަރާތްތަކުގެ އެކައުންޓަށް ޖަމާކުރާ ކަމަށް ވެސް ތުހުމަތު ކުރެއެވެ. މައްސަލަ ތަހުގީގު ކުރަނީ އެ ފައިސާ ނަހަމަ ގޮތުގައި ބޭނުން ކުރާކަމުގެ ތުހުމަތަށެވެ. އެހެންނަމަވެސް، ތުހުމަތުތަކަށް ބައްސާމު އެ ތުހުމަތުތަކަށް އިންކާރު ކުރައްވައެވެ.
ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވީ އެފްއޭއެމްގެ ރައީސް ހިމެނޭ ގޮތަށް އެ އިދާރާގެ ވެރިންގެ މައްޗަށް ދައުވާކުރެވޭނެ ހެކި ލިބިފައިވާ ކަމަށެވެ. އެ ތަހުގީގުގައި އެންމެ އިސް ތުހުމަތު ކުރެވެނީ އެ އިދާރާގެ ރައީސް ބައްސާމް އަދީލް ޖަލީލްގެ މައްޗަށް ކަމަށް ޕީޖީ ވިދާޅުވިއެވެ.
