ހިޔާ ފްލެޓްތަކުގެ ކުލީގެ ތެރެއިން ލައްކައެއްހާ ރުފިޔާ މަޢާފްކޮށްދީފައިވާކަމަށް ހައުސިްގ ޑިވެލޮޕްމަންޓް ކޯޕަރޭޝަން، އެޗްޑީސީން ހާމަކޮށްފިއެވެ. މި ކަން ހާމަކުރައްވާފައިވަނި އެޗްޑީސީން މިހާރު ކުރިއަށްގެންދާ ޕްރެސް ކޮންފަރެންސްގައި ވާހަކަ ދައްކަވަމުން، އެކުންފުނީގެ މެނޭޖިންގ ޑިރެކްޓަރ އިބްރާހީމް ފަޟުލް ރަޝީދެވެ.
ނޫސްވެރިންގެ ބައްދަލުވުމުގައި ފަޟުލް ވިދާޅުވީ، މައާފްކުރި ފައިސާއަކީ ފްލެޓްތަކުގެ ކުލި ކުޑަކުރުމުގެ އިތުރުން ސަރުކާރުން ދެއްވާ ލުޔެއްކަމަށެވެ. ސަރުކާރުން ދެއްވި ލުޔާއެކު ހިޔާ ފްލެޓްތަކުގެ ކުލި ދެއްކުމަށް އޮތް މުއްދަތު 27 އަހަރުން 26 އަހަރަށް ކުޑަވެގެންދާނެކަމަށްވެސް އެޗްޑީސީގެ މެނޭޖިންގ ޑިރެކްޓަރ ފަޟުލް ރަޝީދު ވިދާޅުވިއެވެ.
އިއްޔެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހިޔާ ފްލެޓްތައް މަރާމާތު ކުރުމަށް ރައްޔިތުންގެ އަތުން ދިޔަ ޚަރަދުތަކަށްވާ ދެލައްކަ ރުފިޔާގެ ފައިސާ 7 އަހަރަށް ބަހާލައިގެން ކުލިން ކުޑަ ކުރާ ގޮތަށް ނިންމަވާފައެވެ. އެގޮތުން އެމަނިކުފާނު ވިދާޅުވީ ހިޔާ ފްލެޓްތަކުން މަހުން މަހަށް ދައްކާ ކުލި 3984 ރުފިޔާއަށް ކުޑަކުރައްވަން ނިންމަވާފައިވާ ކަމަށެވެ.
ހަމައެހެންމެ، ބައެއް ފަރާތްތަކުން ވަނީ ކުޑަކުރި ކުލީގެ އަދަދުން 7 އަހަރު ދުވަހުގެ މުއްދަތަކަށް ކުޑަވަނީ އެއްލައްކަ ރުފިޔާކަން ފާހަގަކޮށްފައެވެ. ރައީސްގެ ވަޢުދުފުޅުގައި ވަނީ ހިޔާ ފްލެޓުގެ ފިނިޝިންއަށް ދިޔަ ޚަރަދުގެ އެވްރެޖް އަގެއްގޮތުގައި 200000 (ދެލައްކަ) ރުފިޔާ ކަނޑައިދެއްވާނެކަމަށެވެ.
