ޕީޕީއެމް ޕީއެންސީގެ ލީޑަރަކަށް މީގެ ކުރިން ހުންނެވި ކުރީގެ ރައީސް ޔާމީން ޢަބްދުލްޤައްޔޫމް ޕާޓީން ވަކިވެވަޑައިގަތުމާ ގުޅިގެން އެ ކޯލިޝަންގެ ލީޑަރަކަށް، ރައީސް، މުޙައްމަދު މުއިއްޒު އިންތިޚާބުކޮށްފިއެވެ.
އެމަނިކުފާނު އެ ކޯލިޝަންގެ ލީޑަރަކަށް އިންތިހާބު ކުރައްވާފައިވަނީ މިރޭ ބޭއްވި ޕްރޮގްރެސިވް ކޮންގްރެސް ކޯލިޝަންގެ ޖޮއިންޓް ސެނެޓްގެ 6 ވަނަ ބައްދަލުވުމުގައި ބައިވެރިވި 103 ސެނެޓަރުންގެ އިއްތިފާޤުންނެވެ. އެމަނިކުފާނު ކޯލިޝަންގެ ލީޑަރަކަށް އިންތިޚާބު ކުރައްވާފައިވާއިރު، އެމަނިކުފާނަކީ ޕީއެންސީގެ ރައީސް ވެސްމެއެވެ.
ޕީޕީއެމް ޕީއެންސީގެ ލީޑަރަކަށް މީގެ ކުރިން ހުންނެވި ކުރީގެ ރައީސް، ޔާމީން އަބްދުލްޤައްޔޫމް މިހާރު ވަނީ އެޕާޓީން ވަކިވެވަޑައިގެން ޕީޕަލްސް ނެޝަނަލް ފްރޮންޓް (ޕީއެންއެފް)ގެ ނަމުގައި އުފައްދަވާފައެވެ.
ރައީސް ޔަމީން އުފައްދަވާ ޕީއެންއެފް ރަޖިސްޓްރީ ކުރުމަށް މާދަމާ އިލެކްޝަންސް ކޮމިޝަނަށް ހުށަހެޅުމުގެ މަސައްކަތް، އެ ޕާޓީ އުފެއްދުމަށް ޙަރަކާތްތެރިވަމުންދާ ފަރާތްތަކުން ދަނީ ކުރަމުންނެވެ.
އެ ޕާޓީ އުފެއްދެވުމުގެ ހުއްދަ އީސީން ދީފައިވަނީ މިދިޔަ މަހުގެ 29 ވަނަ ދުވަހުއެވެ. މި ހުއްދަ ދިނުމާއި އެކީ 3،000 މެމްބަރުން ހަމަކޮށް، އިލެކްޝަނަށް ހުށަހެޅުމުން ޗެކްކުރުމަށްފަހު، ޕާޓީއެއްގެ ގޮތުގައި ރަޖިސްޓްރީ ކުރެވިގެންދާނެއެވެ.
