ކުރީގެ ރައީސް އަދި އެމްޑީޕީގެ ވަގުތީ ރައީސް އިބްރާހީމް މުޙައްމަދު ޞާލިޙް، އެ ޕާޓީގެ ޕާލިމެންޓްރީ ގްރޫޕްގެ މެންބަރުންނާ އިއްޔެ ބައްދަލުކުރައްވައިފިއެވެ.
ރައީސް ޞާލިހު އެމްޑީޕީގެ ޕީޖީ ގްރޫޕްގެ މެންބަރުންނާ ބައްދަލުކުރައްވާފައި މިވަނީ އަންނަ އަހަރަށް ލަފާކުރާ ދައުލަތުގެ ބަޖެޓާއި އާ ސަރުކާރުގެ ވަޒީރުންނަށް ރުހުން ދިނުމުގެ މައްސަލަ މަޖިލީހަށް ހުށަހެޅިފައިވަނިކޮށެވެ.
މި ބައްދަލުކުރެއްވުމުގައި އެމްޑީޕީގެ ޗެއާޕާސަން ފައްޔާޒް އިސްމާއީލްވެސް ބައިވެރިވެވަޑައިގެންނެވިއެވެ. އެހެންނަމަވެސް، މި ބައްދަލުކުރެއްވުމުގެ ތަފުސީލެއް އެމްޑީޕީން އަދި ހާމައެއް ނުކުރެއެވެ.
ރިޔާސީ އިންތިޚާބު، އެމްޑީޕީގެ ރިޔާސީ ކެންޑިޑޭޓް ރައީސް ޞާލިޙަށް ބީވުމުން، ވަރުގަދަ އިދިކޮޅު ޕާޓީއެއްގެ ގޮތުގައި އެމްޑީޕީ ރުކުވާލުމަށް ރައީސް ޞާލިހު ވަނީ އެމްޑީޕީގެ ބައެއް ކޮމިޓީތަކުގެ މެންބަރުންނާވެސް މިމަހު ބައްދަލުކުރައްވާފައެވެ. އެމްޑީޕީން ދަނީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށްވެސް ތައްޔާރުވަމުންނެވެ.
