ދައުލަތުގެ ހުރިހާ ޕްރޮކިޔުމެންޓްގެ ކަންކަން ބެލެހެއްޓުމުގެ ޒިންމާ އޮންނަ ޓެންޑަރ ބޯޑް އަލުން އެކުލަވައިލައިފިއެވެ.
މިއީ ރައީސް ޑރ. މުޙައްމަދު މުއިއްޒުގެ ވެރިކަމުގައި އެކުލަވާލި ފުރަތަމަ ޓެންޑަރ ބޯޑެވެ.
ފިނޭސް މިނިސްޓްރީން ވިދާޅުވި ގޮތުގައި، ނެޝަނަލް ޓެންޑަރ ބޯޑުގެ ޗެއާޕާސަން އަކަށް ހަމަޖެއްސީ އަޙްމަދު ސާއިދެވެ. އޭނާގެ އިތުރުން މެމްބަރުންގެ ގޮތުގައި ތިއްބެވީ
- ޢަބްދުﷲ އިމްރާން (ވައިސް ޗެއާޕާސަން)
- މުމްތާޒް އަބްދުލްރަޝީދު
- ފާތިމަތު މުޙައްމަދު ދީދީ
- އާމިނަތު ޒީނިޔާ
- އާދަމް ބަދްރުﷲ
- މުޙައްމަދު ސަމްނޫން ފުއާދު
ޑެންޑަރ ބޯޑުގެ އުސޫލު ބުނާގޮތުން. އެ އުސޫލުގެ މަގުސަދަކީ، ނޭޝަނަލް ޓެންޑަރ ބޯޑުން އެވޯޑްކުރާ މަސައްކަތްތައް ވީހާވެސް ގިނަ ފަރާތްތަކަށް ލިބުމަށް މަގުފަހިކުރުމެވެ. އަދި ނޭޝަނަލް ޓެންޑަރ ބޯޑުން ބީލަންވެރީންނަށް އެވޯޑްކުރާ މަސައްކަތްތައް، ކަނޑައެޅިފައިވާ މުއްދަތަށް ނިންމުމަށް ބާރުއަޅައި ޓެންޑަރ ބޯޑުން ބީލަންވެރިއަކަށް އެއްފަހަރާ ހަވާލުކުރެވޭނެ މަސައްކަތްތަކުގެ އަދަދު ކަނޑައެޅުމެވެ. މީގެ އިތުރުން އުސޫލުގައި ބަޔާންކޮށްފައިވާ ދާއިރާތަކުގެ މަސައްކަތްތަކަށް ކުރިމަތިލެވޭ ފަރާތްތައް ކަނޑައަޅައި މަސައްކަތްތަކުގެ ބީލަންތަކަށް ކުރިމަތިލެވޭ ގްރޭޑްތަކުގެ ވިޔަފާރިތައް ކަނޑައެޅުމަކީ ވެސް މި އުސޫލުގެ މަގުސަދެކެވެ. ނޭޝަނަލް ޓެންޑަރ ބޯޑުގެ ޒިންމާ ތަކުގެ ތެރޭގައި ފަސް މިލިއަން ރުފިޔާ އަށްވުރެ މަތީގެ މުދަލާއި ހިދުމަތާއި މަސައްކަތްތަކާއި ކޮންސަލްޓެންސީ ހިދުމަތްތައް ހޯދުމަށް ކުރާ އާންމު ޓެންޑާތައް ރެގިއުލޭޓްކޮށް ހިންގުން ހިމެނެ އެވެ. އަދި އެ މަރުހަލާ ކުރިއަށް ދަނީ އިންސާފުވެރި، ހާމަކަން ބޮޑު ގޮތަށްކަން މި ބޯޑުން ކަށަވަރު ކުރަން ޖެހެއެވެ.
