ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބަދަލުގެ ގޮތުގައި ގިނަ އަދަދެއްގެ ފައިސާ ދީފައިވާކަމަށް ފަތުރާ ވާހަކައަކީ ދޮގު ވާހަކައެއްކަމަށް މާލީ ވުޒާރާއިން ވިދާޅުވެއްޖެއެވެ.
މިކަން ދޮގުކުރެއްވީ، ރާއްޖޭގެ ނޫހެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ފުރަތަމަ ދެ ހަފުތާ ތެރޭގައި ބަދަލުގެ ގޮތުގައި 101.7 މިލިއަން ރުފިޔާ ދޫކޮށްފައިވާ ކަމަށް ބުނެ ޚަބަރު ފެތުރުމާއި ގުޅިގެންނެވެ.
މާލީ ވުޒާރާއިން އެކްސްގައި ކުރި ޕޯސްޓެއްގައި ވަނީ އެއްވެސް ފަރާތަކަށް ބަދަލު ދިނުމަށް އައު ޕޭމަންޓެއް މި ސަރުކާރު ހަދާފައިނުވާނެ ކަމަށެވެ.
އަދި ބަދަލު ދިނުމާ ގުޅޭ ގޮތުން ފަތުރަމުންދާ ޚަބަރާ ގުޅިގެން ކަންކަން އިތުރަށް ސާފުކުރުމަށް ވަރަށް އަވަހަށް މިނިސްޓްރީން ނޫސްބަޔާނެއް ނެރޭނެ ކަމަށެވެ.
މި ސަރުކާރުން ބަދަލުގެ ގޮތުގައި ގިނަ އަދަދެއްގެ ފައިސާ ދޫކުރިކަމަށް މީޑިއާއަކުން ޚަބަރު ފަތުރާފައިވާއިރު، ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލު ދިނުމަށް އުފައްދާފައިވާ ސެޓްލްމަންޓް ކޮމެޓީ އުވާލާފައިވަނީ ވެސް މި ސަރުކާރުންނެވެ.
