މާތްވެގެންވާ އިސްލާމް ދީނަކީ ހުރިހާ ތަނަކަށާއި ހުރިހާ ޒަމާނަކަށް އެކަށީގެންވާ ގޮތުގައި މާތް ﷲ އަޅުންނަށްޓަކައި ފުރިހަމަކުރައްވައި ރުހިވޮޑިގެންފައިވާ ދިރިއުޅުމުގެ ނިޒާމެވެ. މި ނިޒާމުގައި އެންމެ އިސްކަމެއް ދެވިފައިވާ އެއްކަމަކީ، އަމަން އަމާންކަމެވެ. ހަމަޖެހުމެވެ. ސުލްޙަމަސްލަޙަތެވެ. އަބުރު ރައްކާތެރިކުރުމެވެ.
މާތް ﷲ އިންސާނުންނަށް ދެއްވާފައިވާ ނިޢުމަތްތަކުގެ ތެރެއިން އަމަން އަމާންކަމާއި، ހަމަޖެހުމާއި ސުލްޙައާ ނުލައި ޙަޔާތުގެ މަރުޙަލާތަކުގެ ތެރޭގައި އެއްވެސް އުފަލެއް އިޙްސާސެއް ނުކުރެވޭނެއެވެ.
އިސްލާމްދީނުގެ އަސާސްތަކުގައި އެންމެ މުހިއްމު އިސްކަމެއް ދެނީ، މުޖުތަމައުގެ އަމަން އަމާންކަމާއި ހަމަޖެހުމަށެވެ. އެހެންކަމުން އެކި ނަންނަމުގައި މީހުންނަށް ފުރައްސާރަކޮށް، ޣީބަބުނެ މަލާމާތްކޮށް، މީހުންގެ އަބުރާއި ޢިއްޒަތް ވެއްޔާ މޮޑެލުމަށް މަސައްކަތްކުރުމަކީ މުޖްތަމަޢުގެ ހަމަޖެހުން ނަގާލައި އަމާންއަމާން ކަމުގެ ކިއްލާ ފުނޑުފުނޑުކޮށްލުމަށް ހިންގޭ ނާތަހްޒީބު ޢަމަލުތަކެވެ. ވެރިންނަށް ކިޔަމަންގަތުމުގެ ރޫޙް ނައްތާލައި ދައުލަތުގެ ކަރާމާތް ވެއްޔާ މޮޑެލުމަށް ހިންގޭ ނުބައިވެގެންވާ ޖަރީމާތަކެވެ.
ކީރިތި ރަސޫލާ ޙަދީސް ކުރައްވާފައިވެއެވެ. މާނައީ: " އެއް މުސްލިމަކު އަނެއް މުސްލިމަކަށް ބިރުދެއްކުމަކީ ހުއްދަވެގެންވާ ކަމެއް ނޫނެވެ".
މާތްވެގެންވާ އިސްލާމް ދީނަކީ އަމަން އަމާންކަމާއި ސުލްހަވެރިކަމުގެ ދީނެވެ. ޙައްޤުތަކާއި މިނިވަންކަމުގެ އެންމެ ފުރިހަމަ އަސާސްތައް ޤާއިމުވެފައިވާ ދީނެވެ. އަހަރެމެން ތަބާވާންޖެހެނީ އިސްލާމީ ރިވެތި އުސޫލުތަކަށެވެ. މާތް ﷲ ކަނޑައަޅުއްވާފައިވާ އިސްލާމީ މަންހަޖަށެވެ. ރަސޫލާ ގެނެސް ދެެއްވި ފުރިހަމަ ނަމޫނާއަށެވެ. ފުރިހަމަ ޚުލްޤުގެ އަސާސްތަކަށެވެ. ކީރިތި ރަސޫލާގެ ތަރުބަވީ މަދުރަސާއިން ދަސްކޮށްދެއްވި ފިލާވަޅުތަަކަށެވެ. އެއަސާސްތަކާއި ފިލާވަޅުތަކާއި މަންހަޖު މުޅި މުޖްތަމަޢު އެކަތިގަނޑަކަށްވެ، އަމާންކަމާއި ސުލްޙައާއި ހަމަޖެހުމަށް ގޮވާލައްވައެވެ. އިސްލާމް ދީނުގެ ޢަދުއްވުން ބޭނުންވަނީ މިހަމަތަކާއި އުސޫލުތަކާއި މަތިވެރި ސިފަތައް އަހަރެމެންގެ މުޖްތަމަޢުން ފުހެލާށެވެ. އެހެންނަމަވެސް، އިސްލާމީ މުޖްތަމަޢުގެ ކޮންމެ އަފުރާދެއްގެ ޒިންމާއަކަށް ވާންވާނީ ރިވެތިވެގެންވާ އަސާސްތަކުގެ މަތީގައި ތިބެ ވެރިންނަށް ކިޔަމަންތެރިވާ، ޚުލުޤު ހެޔޮ ބައެއް ކަމުގައި ވުމަށެވެ.
ދެބަސްވެވެގެން ނެތް ޙަޤީޤަތަކީ، ޤައުމާއި މުޖުތަމަޢުގެ އަމަން އަމާންކަމާއި ހަމަޖެހުން ދެމެހެއްޓުމަކީ ޤައުމުގެ ކޮންމެ މުވާޠިނެއްގެ ޒިންމާއެކެވެ. ދެބަސްވުންތަކާއި ޚިޔާލު ތަފާތުވުމުގެ ސަބަބުން އުފެދޭ ހޫނާއި އަލިފާނަށް ދަރުއަޅައި ރޯކުރުމަކީ އެއްވެސް ފަރުދެއްގެ ޒިންމާ ކަމުގައި ހަދައިގެން ނުވާނެއެވެ. އެއްބައެއްވަންތަ އެއްބައިވަންތަ އަޚުވަންތަކަމާއި އެކުވެރި ސުލްހަވެރި ހިތްހަމަޖެހޭ އިޙްތިރާމް ކުރާ މުޖްތަމައެއްގެ ރޯޝަންކަން ލިބޭނީ، އަމަން އަމާންކަމާއި ހަމަޖެހުމަކީ އަހަރެމެންގެ މެދުގައި އޮންނަ ލޯތްބާއި އެކުވެރިކަމާއި، އަޅާލުމުގެ ފަލްސަފާ ކަމުގައި ހަދައިގެންނެވެ. އެމަތިވެރި މަންހަޖުގެ ދޯދިތަކުން އާރޯކަން ލިބިގެންނެވެ.
ބޭކާރު ބަސްތައް ބުނެ ހަޖޫޖަހައި މަލާމާތްކޮށް ހެދުމަކީ މުޖްތަމަޢު ބަލިކަށި ކުރުވާނެ ކަންކަމެވެ. ހަމައެހެންމެ ދިވެހި އިސްލާމީ މުޖުތަމައުގެ އަމަން އަމާންކަމާއި ހަމަޖެހުން ދެމެހެއްޓުމަށް ކުރަންވީ އަނެއްކަމަކީ ހެޔޮކަންތައް ގިނަކޮށް ނުބައިކަންތަކާއި ދުރުހެލިވުމެވެ. ފާފަތަކަށް އަރައިގަތުމަކީ ނުބައިކަން ފެތުރި އަމަން އަމާންކަމާއި ހަމަޖެހުން ނެތިދާ ކަމެކެވެ. އެހެނީ ހެޔޮ ޢަމަލު ކުރުމަކީ ދެދުނިޔޭގެ ބާއްޖަވެރިކަމާއި ހަމަޖެހުން ލިބޭނެ ކަމެކެވެ.
ހަމަޖެހުމާއި އަމަން އަމާން ތަނެއްގެ ގޮތުގައި އޮންނާނީ، ދުލުގެ އާފާތްތަކުން ސަލާމަތް ވެގެންނެވެ. އިދިކީލި ފިކުރުތަކުން ދުރުވެގެންނެވެ. ހަމައެހެންމެ އާޑަ ފުރައްސާރަ ކުރުމާއި، ނެތިމޮށުމާއި، ކަލަގޮވުމާއި، ޖަދަލުކުރުމާއި، ދެބައޮޑުވުމާއި، ޣީބާބުނުމާއި، މަލާމާތްކުރުން ފަދަ ނުބައިވެގެންވާ، މުޖްތަމަޢު ޚަރާބުކުރާ ބަލިތަކާއި ޢަމަލުތަކާ ދުރުހެލިވެގެންނެވެ. މާތްވެގެންވާ އިސްލާމް ދީނުގެ އަސާސަކީ މިފަދަ އާފާތްތަކުންނާއި ބަލިމަޑުކަމުން މީސްތަކުން ސަލާމަތްކުރުމެވެ.
