ގަނޑުވަރުތެރޭގެ ހިތްގައިމު ދާނުގައި ނިދާލުމުގެ އުފާވެރި އިޙްސާސް ކުރެވުނެވެ. ވެރިކަމުގެ ލައްޒަތުގައި ޖެހި އަދިވެސް ފާޓުފުޅާ ކުރެވެން އޮތީ ކޮން ގޮތަކުންތޯ ކަޅިއަޅާއަޅާ އޮތެވެ. އަދި މިކަމަށްވުރެ ބޮޑު އެހެންކަމެއް ލިބުމަށް އެދުނެެވެ. އަދި އެއަށްވުރެ މާބޮޑެތި ކަންކަން ޙާޞިކުރެއެވެ. އެއް މަޤާމަށްވުރެ ގިނަ މަޤާމު ލިބުމުގެ އެދުމުގައި ފާރަލިއެވެ. މަތި މައްޗަށް އެތައް މަޤާމެއް ލިބި ކުރިއަރާ ދިޔައެވެ. ތަނަވަސް ކަމުގައި އުދުހިލާ މެދު އުޑުގައި ފިޔަ ޖަހަން ފެށީ، ބަލާންތިބި އެންމެތަކުން އަންތަރީސް ކުރުވާ މިންވަރަށެވެ. ހިންގާލައެވެ. ވައްޓަފާޅި ހުރެއެވެ. އާރާއި ބާރާއި ނުފޫޒު އޮންނަނީ މުށުތެރޭގައެވެ. އެންމެން އައިސް ވަށައި އެނބުރެން ފެށިއެވެ. ހިތުގައި އުފެދުނީ މަވެތި ކަމުގެ ނުބައި ވިހައެކެވެ. އެކަމަކުވެސް ގާތްވާ މީހުންގެ އަދަދު ދިޔައީ އިތުރުވަމުންނެވެ. އެހެނަސް ދޫކޮށްދާ މީހުންވެސް މަދެއް ނޫނެވެ.
ފައިސާގެ ދަހިވެތިކަން އޮންނަ ކަމެއް ކައިރީގައި އެނބުރޭ މީހުންނަކަށް ނުވިސްނުނެއެވެ. އެއީ ޝާހީ ކަމުގެ ތެރެއިން ވާރުތަވާ މުދާ ކަމުގައި އެމީހުން ހީކުރެއެވެ. ވިސްނައި ދެނީވެސް އެފަދައިންނެވެ. ލޯ ހުޅުވިފައިވަނީ ކިހާ މިންވަރަކަށް ކަމެއް ހަމަ ވިސްނާ ވިސްނާވެސް ނޭނގުނެވެ. ވަކި ފަރުދެއްގެ ޖާހައި ޢިއްޒަތް އެހާ މަތީގައި ހުރުމަށް އެދުވަސް މާޒީވިއެވެ. ޙިލްމުގެ ތެރެއިން ކަންކަން ވަޒަން ކުރެވޭ މީހާ އެކަމާ ދެކޮޅަށް ބަހެއް ބުނެލައެވެ. ދަމަކުން ބަޑިއެއް ޖަހާހެންނެވެ. މާ ވަރުތަކެއް އަރުވާ ކަށް ނުކެރެއެވެ.
ޝުޢޫރާއި އިހްސާސް ފާޅުކުރެވޭ މަހެފިލުތައް ދުވަހެއް ދުވަހަކަށް ގިނަވާން ފެށިއެވެ. އޮބަހައްޓައެއް ނުލެވުނެވެ. މިނިވަންކަމުގެ އަޑުތައް މާގަދަވެއްޖެއެވެ. އެކަކަށް އެހާ ބޮޑެތި ބާރުތަކެއް ޚާންދާނުގެ ތެރޭގައި އޮންނާތީ ކުރާ ޝަކުވާތައް ދިޔައީ އިތުރުވަމުންނެވެ. ނަަމަވެސް އެކަންކަމަށް މާބޮޑު ފަރުވާލެއް ނުބަހައްޓައެވެ. އެއީ ކީއްވެހެއްޔެވެ؟ ލޭގެ ގުޅުން މާ ވަރުގަދައެވެ. ހަމައެހެންމެ، ހިންގާލައެވެ. ވައްޓަފާޅި ހުރެއެވެ. ޤާބިލުކަން ހުރެއެވެ. އެކަމަކު ރުންކުރު މިޒާޖު ފިލުވައެއް ނުލެވުނެއެވެ. ހަރުބަސް ބުނުމަކީ ކަށީގައި ހަރުލާފައި ހުންނަ ކަމަކަށްވިއެވެ. ދަރުބޮނޑި ކިތަންމެ ބާރަށް ބަންނަން އުޅުނަސް ވިސްނުމާއި ފިކުރާއި ޢިލްމުގެ ދަންމަރުން އެ ދަރުބޮނޑި އައްސާފައިވާ ވަކަގަނޑު ފީކޮށްލިއެވެ. އެކަންވީ ހިނދުކޮޅަކުން ނޫނެވެ. އެކަމަށް ދުވަސްތަކެއް ނެގިއެވެ.
އެހާ ހިސާބަށް އައިއިރު ވަތްގަނޑުތައް ފުރިއްޖެއެވެ. އެކަން ކުރީ އަމިއްލަ ދެއަތުން މަސައްކަތްކޮށްގެން ކަމަށް ބުނަމުން ގެންދިޔައެވެ. ނަމަވެސް ސުވާލު އުފައްދާ މީހުން ސުވާލު އުފައްދައެވެ. އަމިއްލަ އޮޑި ބާލައި ކަނޑަށް ހެޔޮ ކުރިއެވެ. އިތުރު އެހެންކަމެއް ނެތަސް އުޅުމުގެ ޤާބިލުކަން ހޯދިއެވެ. މަޤާމުތަކާއި ޢިއްޒަތުގެ ހާރުތައް ދޫކޮށްލިއެވެ. އެއީ އިތުރު ސުވާލެއް އޮތް ކަމެއް ނޫނެވެ. ވަށައި އެނބުރޭނެ މީހުންކޮޅެއްވެސް އެބަތިއްބެވެ. އެމީހުންގެ ވާހަކަތައް މުހިއްމު ވިޔަސް ނުވިއަސް ކުރާން ބޭނުންވާ ކޮންމެ ކަމެއް ހާސިލުކުރުމުގެ ކުޅަދާނަކަން އެބަހުއްޓެވެ.
އެތައް ދުވަހެއް ވަންދެން ބިނާ ކުރި ކިއްލާގައިވެސް ދުވަސްތަކެއް ފަހުން ރެނދުލައި ކުދި ކުދިވާން ފެށިތައް ފެނުނު ހިނދު އެހީތެރިކަމުގެ އަތެއް ފޯރުކޮށްދިނުމަށް އަނެއްކާވެސް ކޮނޑު ވިއްދިއެވެ. ނަމަވެސް އެއަށްވުރެ ބޮޑަށްވަނީ ރެނދުލައި ބަލިކަށިވެފައެވެ. ލައްޒަތުގެ ކޯރުން ފެން ބުއި މާޒީ ފަސްދީ ހިނގައްޖެއެވެ.
ބީވި އެއްޗެއް ބީވީއެވެ. ހަމަ އަނެއްކާވެސް އަމާޒު ހިފީ އެންމެ ދޯޅުވާ ދިމާއަށެވެ. މުގޫ އޮތީ އެހެން މީހެއްގެ އަތުގައެވެ. ވަލުގައި ހަމަ ބާރަށް ހިފައިފިއެވެ. އެ ކަރާމާތާއި އެޝަރަފް ހިފަހައްޓައިދޭނެ ކަމަށް ވަޢުދުވަމުންނެވެ. އެ ޢިއްޒަތާއި ނަންފުޅު ފަނޑުވުމެއް ނެތް ގޮތެއްގައި ހިފަހައްޓައި ދޭނެ ކަމުގެ ޖަޒުބާތުގެ އޮއިވަރެއް އުފެެއްދިއެވެ. އެންމެ އުސް ކިއްލާއަށް ވާޞިލުުވުމުގައި އެ ޖަޒުބާތުގެ އޮއިވަރު ކުޅުނު ދައުރު ނުހަނު ބޮޑެވެ. ނިޔަތުގެ ލަގަން ކޮންޓްރޯލުކުރަނީ ކާކު ކަން އެންމެންނަށްވެސް އެނގޭހާ ވަރުވެއެވެ.
އެ ނަމާއި ޝަރަފުގެ ވިންދުން ޤާއިމުކުރި ދައުރު ފެށިއްޖެއެވެ. ދުރުވުމެއް ނެތް ގޮތެއްގައި ކަންކަން ބައްޓަންކުރުމުގެ ވަޢުދާއެކުގައެވެ. ދުވަހެއްގައިވެސް ބިކަކޮށް ނުލައި، އަޅާލަނެ ކަމުގެ ފުރިހަމަ އިތުބާރާއެކުގައެވެ. އެހެނަސް ވިދުވަރުގައި އެހެން ކުލައެއް ޖަހަން ފެށިކަން އެނގުނީ ހަމަ ކުއްލިއަކަށެވެ. ތިލައަކަށް އެރިފަދައެވެ. ލޮޅުންތައް އެހާމެ ގިނައެވެ. ވާސިލުކޮށްދިނީ ކާކުތޯ ބެލުމުގެ ޝައުޤެއް ނެތެވެ. ބޭކާރު އަނގަ ތަޅާތީ ނުރުހޭ ކަމަށް ބުނާ އަޑުތައް ފެތުރެން ފެށިއެވެ. އުސްކުރިބޯށީގެ ޒަމާނެއް ފެށުނު ފަދައެވެ. ގިނަ ބަޔަކު އޮޅުވެއްޖެއެވެ. މެދުވެރިވި ސަބަބު މާ މުހިއްމެއް ނުވިއެވެ. މަސްދުވާނީ ފެން އޮންނަ ދިމާއަށެވެ. ގެއިން ނެރެ އެއްލާލާކަށްވެސް ފަސްނުޖެހުނުތާއެވެ.
ޖަޒުބާތުން އުފަންވާން ފެށި އާދަޔާ ޚިލާފު އަސަރުތަކުން އެ ފުށް މިފުށަށްޖެހި، ހަރުކަށިކަމާއި ގޮތް ދޫނުކުރުމުގެ ނަތީޖާއަކީ، ހޯދި ފޮނި މީރުކަން ހިތި ޒަހަރަކަށް ވެގެންދިއުމެވެ. ބޭނުންވި ކިއްލާ ފަސްދީފިއެވެ، ދެން އަތުޖެހޭ ގޮތެއް ނުވިއެވެ. ބީވެއްޖެއެވެ. އާރާއި ބާރުވެގެން ދިޔައީ ބުރައިގެން ދިޔަ ކުނޑިތަކެއްފަދަ އެއްޗަކަށެވެ.
ދުވަސްތަކަކަށް ލައްޒަތުގެ ފޮނިކަން ބީވެއްޖެއެވެ. އަނެއްކާވެސް އެ ލައްޒަތުގެ ކޯރުން ފެން ބޮވޭނެ ހުރިހާ ކަންވާރެއް ތައްޔާރުކުރާން ފެށިއެވެ. އެހެނަސް ދިމާވީ ހުރަސްތަކެވެ. ބަނދެވިއްޖެއެވެ. ބާރުތައް ނެތިގޮސް ތޯލާފުޅިއަކަށް ލެވިއްޖެއެވެ. ނުކުމެވޭނެ ކަމުގެ އިންތިޒާރުގައި، ގަޑީގެ ކަށި، ބުރުޖަހާ ވަރު ބަލަން ނަޒަރު ހުއްޓިއެވެ. މަޅިފަތި ޖެހިއެވެ. މަންތިރިތައް އެނބުރިއެވެ. ޖަހަންޖެހޭ ހުރިހާ މޮހޮރެއް ޖެހިއެވެ. ކުރާނެ ކަމެއް ނެތެވެ. އޮބަހައްޓައެއް ނުލެވުނެވެ.
މުށުން ދޫވެއްޖެއެވެ. ކިއްލާގެ ދާނުން ލައްޒަތު ލިބޭން ފެށީ ހީވެސް ނުކުރާ މޮހޮަނަކަށެެވެ. އެތައް މަޅިއެއް ޖެހިޔަސް އެ މަޅީގައި އެ މޮހޮނު ބެދޭ ގޮތެއް ނުވިއެވެ. ލަގޮނޑި ހިފަހައްޓާލެވޭ ގޮތެއް ނުވިއެވެ. އެ ދާނުގެ އަރާމު ނިދި މަތިން ހަނދާން ވަނީ މާ ބޮޑަށެވެ. އެ ޢިއްޒަތާއި އެލަގަބު، ހިތުގައި ތަޅަން ފެށީ ކިހިނަކުން ކަމެއް ނޭނގުނެވެ. ދިފާޢުކޮށްދޭނެ ކަމަށް އަހުދުވެއެވެ. އަނެއް ދުވަހު އެ ވަޢުދު އުވާލައެވެ. ފާޑުފާޑުގެ ކުޅިވަރެއް ނުކުޅޭނެއޭ ބުނެއެވެ. އެކަމަކު އަނެއް ދުވަހު ކުޅެނީ ހަމަ އެކުޅިވަރެވެ. ކެތްކުރެވޭނީ ވަކި ވަރަކަށެވެ. ބަޑި ފަޅައިގެން ގޮސްފިއެވެ. އެފެންނަ މަންޒަރުތަކުން ހިތުގައި ޖަހަން ފެށީ ވިހައިގެ ވިއްދުކަމުގައި ވެއްޖެއެވެ. ވެޑުވިފައި އެއިންނަނީ މޮހޮނެކެވެ. ދުވަސްތަކުގެ އަދަދު އިނގިލިން ގުނާ ލެވޭ ވަރަށް ވުރެވެސް މަދެވެ. ބީވީއެވެ. ބީވީއެވެ. އަބަދަށްޓަކައި ބީވީއެވެ. އެ ވަސްވާސްތައް އަންނާން ފެށީ މާ ބާރު މިނުގައެވެ. އެއީ ކީއްވެހެއްޔެވެ؟ ބީވި އެއްޗެއްގެ ބޮޑުކަމުން ތޯއްޗެކެވެ!
