މިއީ ކުރިއަށް އޮތް ރައްޔިތުންގެ މަޖިލިހުގެ އިންތިޚާބަށް ސަރުކާރު ކޯލިޝަންގެ ޓިކެޓުގައި ވާދަކުރެއްވުމަށް ނިކުންނަވާފައިވާ މުޙައްމަދު އައްބާސްގެ ވާހަކައެެވެ. އެއީ ވެލިދޫ ފަޚްރުވެރިވާ ދަރިއެކެވެ. ސިޔާސީ މައިދާނުގައި ނަން ވިދާ ތަރިއެކެވެ. މޮޅު ވާހަކަދެއްކުންތެރިއެކެވެ.
އައްބާސްއަކީ ކާމިޔާބު ވިޔަފާރި ވެރިއެކެވެ. ބުރަ މަސައްކަތުން ހިންދެމިލައި، އަމިއްލަ ފައިމައްޗަށް ތެދުވެ، ޙަލާލު ގޮތުގައި ދިރިއުޅުމުގެ ކަންކަން ބައްޓަން ކުރަމުން ގެންދާ ހިތްހެޔޮ އިންސާނެކެވެ. އެއީ ހީވާގި މަސައްކަތްތެރިއެކެވެ. މުރާލި ކަމާއެކު އާއިލާއެއް ބިނާކުރަމުންދާ ހަރުދަނާ ބައްޕައެކެވެ.
"ނުގުޑާނެ ޢަޒުމަކާއި، ޤާބިލްކަމާއި، ހިތްވަރުން، ވެލިދޫ ދާއިރާއަށް ތަރައްޤީއާއި، ހިނިތުންވުން ގެނައުމަށް….. މިފަހަރު އައްބާސް ހޮވަމާ ހިނގާ!" މިހެން ވިދާޅުވެ ސާބިތު ކަމާއެކު ގަދަ ޢަޒުމުގައި، އޭނާ މަޖިލިސް އިންތިޚާބަށް ނިކުންނެވުމުން ގިނަ ބަޔަކު ދަނީ އޭނާއާ މެދު ސޯޝަލް މީޑިޔާގައި ޝުޢޫރުތައް ފާޅުކުރަމުންނެވެ. އޭނާގެ ރަނގަޅު ކަމުގެ ވާހަކައެވެ. ހިތްހެޔޮ ކަމާއި އެކުވެރި މިޒާޖުގެ ވާހަކައެވެ. ރަށްރަށުގައި ތަރައްޤީއަށްޓަކައި ވެދިން އެހީތެރިކަމުގެ ވާހަކައެވެ.
"މުޙައްމަދު އައްބާސްއަކީ ސަރުކާރު ކޯލިޝަންގައި ހިމެނޭ ވެލިދޫ ދާއިރާއަށް ކޮންމެހެން ވެލިދޫ ބޭފުޅަކު ހުންނާކަށް ނުޖެހޭ! އެކަމަކާ ދެބަހެއް ނުވެވޭނެ! އެކަމަކު ހަގީގަތަކީ ވެލިދޫ ފިޔަވާ ދެން އޮތް ދެރަށް ކަމަށްވާ ފޮއްދޫ އަދި ޅޮހީ އަށްވެސް ނުހަނު ގިނަ ގޮތްގޮތުން އެހީތެރިކަން ފޯރުކޮށްދީ އެ ދެރަށުގެ ތަރައްގީއާ ރައްޔިތުންގެ ކަންބޮޑުވުންތަށްވެސް އަހާ ސަރުކާރުގެ ވެރިންނާ ހިސާބަށް ގެންގޮސްދީފައި މިހާތަނަށް ހުރީ ހަމަ އައްބާސް! މަޖިލީހަށް ކުރިމަތި ނުލާ އިރުވެސް އަމިއްލަ ޖީބުންވެސް އެތަށް އެހީއެއް ވެދީފައި ވަނީ ހަމަ އައްބާސް! އައްބާސް ގެ ދުލުން މިވާހަކަތަށް ކިޔަންވެއްޖިޔާ ވަރަށް ދިގުވާނެ އަދި އައްބާސް އަކީ ބޮޑު ރަށެއް ކުޑަރަށެއް ނުބަލާ ވެލިދޫ ދާއިރާގެ މުޅި ދާއިރާގެ ތަރަށްގީއަށްޓަކާ މުޅި ހަޔާތް ހޭދަ ކުރަމުންދާ އެންމެނާ ގުޅޭ ބޭފުޅެއް! މިއަދު ރައްޔިތުން ބަލައިގަންނަން އެބަޖެހެ! ފުރުސަތު އައްބާސް އަށް ނުދޭންވި ސަބަބެއް ނެތް! ކަމެއް ކޮށްދެވޭނެ ކެނޑިޑޭޓަކީ އެއީ މިފަހަރު މި ޕްރައިމަރީގައި ވާދަ ކުރާ ބޭފުޅުންގެ ތެރެއިން! ހަސަދަ ވެރިކަމާ ނަފްރަތު ކުރުން ހުއްޓާލާފާ ދާއިރާގެ ތަރައްގީ އާއި ކުރިމަގަށް އެންމެން އެކީ އައްބާސް އަށް ވޯޓް ދެމާ." ސޯޝަލް މީޑިޔާގައި ދައުރުވަމުންދާ މެސެޖެއްގައި ވެއެވެ.
"އަޙްމަދު ބެންބެ"ގެ ނަމުގައި ސޯޝަލް މީޑިޔާގައި ޙިއްސާކޮށްފައިވާ ޕޯސްޓެއްގައި ވަނީ، "ވެލިދޫ ދާއިރާގައި ހިމެނޭ ތިން ރަށް ކަމަށްވާ ނ. ވެލިދޫ، ނ. ފޮއްދޫ އަދި ނ. ޅޮހީގައި އެންމެ ގިނައިން ފައިހަރުލައިގެން ހުރެ ވެލިދޫ ދާއިރާގެ ތަރައްގީގެ މަޝްރޫ ތަކާއި އަދި ވެލިދޫ ދާއިރާއަށް އެންމެ ބޭނުން ޖެހިފައިވާ ކަންކަން އެންމެ ގާތުން އެނގޭނެ އެކަކީ މުހައްމަދު އައްބާސް ކަން ދާއިރާގެ ރައްޔިތުންނަކަށް ނޯޅޭނެ! ވެލިދޫ ދާއިރާޔާ ދުރު ރަށްފުށުގައި ގިނަ ވަގުތު ހޭދަ ނުކުރައްވާ ބޭފުޅުންނަކަށް ދާއިރާގެ ހަގީގަތެއް ނޭނގޭނެ! އެކި ބޭފުޅުން ދެކެފިން ! އެކި ބޭފުޅުން މި ދާއިރާގެ މަޖިލިސް ގޮނޑިއަށް ޓެސްޓު ކުރެވިއްޖެ! މިފަހަރު މީ އަސްލު ކަންކުރަން ކެރިގެން މަޖިލީހުގެ ތަޅުމުގައި ވެލިދޫ ދާއިރާގެ ތަރައްގީއާ ކަންބޮޑުވުންތަކަށް އަޑު އުފުލާ ހައްލު ގެނެއުމަށް އައްބާސް އަށް ވޯޓުލާންވި ފަހަރު! މިފަހަރު ވެލިދޫ ދާއިރާއަށް އެންމެ އެކަށީގެންވާ ކެނޑިޑޭޓަކީ މުހައްމަދު އައްބާސް." ކަމަށެވެ.
"ރައީސް ޑރ.މުއިއްޒުގެ ސަރުކާރަށް ވަފާތެރިވެ، ރައްޔިތުންނަށް ޚިދުމަތް ކުރުމުގައި ދެމިހުންނާނެކަމާ މެދު ސުވާލެއް ނުއުފެއްދޭނެ ހަމައެކަނި ކެނޑިޑޭޓަކީ އައްބާސް!" ޅޮހީ ކައުންސިލުގެ ރައީސް ކަން ކުރެއްވި މުޙައްމަދު އިރުފާން ބުނުއްވިއެވެ.
އައްބާސްއާ މެދު ފާޅުކުރަމުންދަނީ ހިތްހެޔޮ ކަމުގެ ޝުޢޫރެވެ. ގާތްކަމާއި އެކުވެރިކަމުގެ ޝުޢޫރެވެ. އޭނާގެ ޓްރެކް ރިކޯޑުން ފެންނާން އޮތީ އިޖުތިމާޢި ރޫހުގައި އަތޮޅުގެ ރަށްރަށަށް ކޮށްދީފައިވާ ޚިދުމަތުގެ ޞަފްޙާތަކުގެ ވާހަކައެވެ. އެރަށްރަށުގެ ތަރައްޤީއަށްޓަކައި އަދާކުރެއްވި އިސް ދައުރެވެ. އެ ރިކޯޑުން ފެންނާން އޮތީ އެހީތެރިކަން ބޭނުންވި އެތައް ބަޔަކަށް ދިއްކޮށްލި އޯގާތެރިކަމުގެ އަތެވެ. އޭނާގެ ހިތުގައި ވަނީ ކުލުނާއި އޯގާތެރިކަމާއި އަޅާލުމުގެ ޝުޢޫރެވެ.
އޭނާ ސަރުކާރު ކޯލިޝަންގެ ޕްރައިމަރީން ކާމިޔާބުކޮށް، ރައްޔިތުންގެ މަޖިލިހުގެ އިންތިޚާބުގައި ވާދަކޮށް، ކާމިޔާބު ލިބިގެން ދިއުމަކީ ގިނަ ބައެއްގެ ދުޢާއެވެ.
