ރައީސް ޑރ.މުޙައްމަދު މުޢިއްޒުގެ ސަރުކާރުން ހަތަރު ހަފުތާތެރޭގައި އިސްލާމީ ދާއިިރާއިން އިންޤިލާބީ ކާމިޔާބެއް ހޯދާފައިވާ ކަމަށް އިސްލާމިކް މިނިސްޓަރު ޑރ.މުޙައްމަދު ޝަހީމް ޢަލީ ސަޢީދު މިއަދު ވިދާޅުވެއްޖެއެވެ.
މި ސަރުކާރުގެ "ހަފުތާ 14″ ގެ ފުރަތަމަ 4 ހަފުތާގައި ހާސިލްކުރުމަށް އަމާޒުހިފި ހުރިހާކަމެއް ސައްތައިން ސައްތަ ފުރިހަމަކޮށްފައިވާކަން ސަރުކާރުން އިއްޔެ ވަނީ ހާމަކޮށްފައެވެ. އެ ގޮތުން ސަރުކާރަށް ހަތަރު ހަފުތާ ފާއިތުވިއިރު، ޖުމްލަ 17 ކަމެއް ވަނީ ފުރިހަމަކޮށްފައެވެ.
ސަރުކާރުން ޙާސިލުކުރެއްވި ކާމިޔާބާ ބެހޭ ގޮތުން ޑރ.ޝަހީމް ވިދާޅުވީ މި ވޭތުވެދިޔަ މުއްދަތުގައި 1000 ފަގީރުންނަށް ހިލޭ ހައްޖަށް ދެވޭނެ ފުރުސަތު ފަހިކޮށްދީ ޒަކާތާ ބެހޭ މުސްތަގިއްލު އިދާރާއެއް އުފައްދައި އިސްލާމިކް ޔުނިވަރސިޓީގެ ކެމްޕަސް ރާއްޖޭގެ އުތުރާއި ދެކުނުގައި ގާއިމުކޮށް މިސްކިތްތަކާބެހޭ މަޖިލީހާއި ވަގުފުގެ ގިނަ މަޝްރޫއުތައް ގާއިމުކުރުމަށް އަމާޒު ހިފާފައިވާ ކަމަށެވެ.
"މިސްކިތްތަކުގެ އާބާތުރަ ފިލުވައި ރީތިކޮށް ބެލެހެއްޓުމަށް ޓަކައި ކޮންމެ އަހަރަކު ދައުލަތުގެ ބަޖެޓުން ކުރެވޭ ޚަރަދު މިހާރަށްވުރެ ތިންގުނައަށް އިތުރުކުރެއްވުމަށް ރައީސް ޑރ. މުއިއްޒު ވެ ވަޑައިގެންނެވި ވައުދު ފުއްދަވައިފި. މިހާރުވަނީ އެކަމަށް 15 މިލިއަން ހަމަޖައްސަވައިދެއްވާފަ". މިނިސްޓަރ ވިދާޅުވިއެވެ.
ރައީސް ޑރ.މުޢިއްޒުގެ ސަރުކާރުން ވަނީ 17 ނޮވެމްބަރުން 15 ޑިސެމްބަރަށް އިންގިލާބީ ކާމިޔާބު އިސްލާމީ ދާއިރާއިން ގެނެސްފައި މިނިސްޓަރ ޑރ. ޝަހީމް ހައްޖަށް ދާން ބޭނުންވާ ފަރާތްތަކުގެ ތެރެއިން ކުރިއަށް އޮތް 5 އަހަރުދުވަހުގެ ތެރޭގައި 1000 ފަގީރުންނަށް ހިލޭ ދެވޭނެ ގޮތަށް ހަމަޖެއްސެވުމަކީ ރައީސްގެ ރިޔާސީ ވައުދުފުޅަކަށްވާއިރު މި މަސައްކަތް ފެށްޓެވުމުގެ ގޮތުން މިއަހަރު ފުރަތަމަ 50 މީހުން ފޮނުވާ ގޮތަށް ވަނީ ހަމަޖައްސަވައިފައެވެ.
ހަމައެހެންމެ، މަޝްހޫރު ދީނީ އިލްމުވެރިޔާ ޑރ.އަފްރާޝީމް ޢަލީގެ ހަނދާނުގައި ބިނާކޮށްފައިވާ ރ.އުނގޫފާރު އިސްލާމީ މަރުކަޒާއި ތިނަދޫގައި ހުންނަ އިސްލާމީ މަރުކަޒު ވަނީ އިސްލާމިކް ޔުނިވަރސިޓީ ކެމްޕަސް ހިންގުމަށް އެ ޔުނިވަރސިޓީއާ ހަވާލުކޮށްފައެވެ.
އެ މިނިސްޓްރިގެ ދަށުން ވަކި އިދާރާއެއްގެ ގޮތުގައި "މޯލްޑިވްސް ޒަކާތު ހައުސް" ގެ ނަމުގައި ގާއިމުކުރާ އިދާރާގެ މަގުސަދުތަކުގެ ތެރޭގައި ރާއްޖޭގެ ޒަކާތުގެ ނިޒާމު ހަރުދަނާކޮށް، ޒަކާތު ސެކްޝަނުން މިހާރު ކުރަމުންގެންދާ މަސައްކަތްތަކާއި ޒަކާތުގެ ނަފާ ބެހެނިވެރިންނަށް ފުޅާ ދާއިރާއެއްގައި ލިބޭނެ ގޮތަށް ޒަކާތުން ބައެއް ޝަރީއާ ހުއްދަކުރާ ދާއިރާތަކުގައި އިންވެސްޓްކޮށް، ޒަކާތު ފަންޑު ތަރައްގީކުރުމަށް ކުރަންޖެހޭ ހުރިހާ މަސައްކަތެއް ކުރުން ހިމެނެއެވެ.
"ރައީސް ޑރ. މުޢިއްޒުގެ މެނިފެސްޓޯގައިވާ އިސްލާމީ ވައުދުތަކުގެ ތެރެއިން ވަޤުފު، ހައްޖުފަންޑު. ޒަކާތު ފަންޑު ކުރިއެރުވުމަށް، ރާއްޖޭގެ އިސްލާމީ މާލީ އިދާރާތަކުގެ ޚިޔާލު ހޯދުމުގެ ފޯރަމެއް ބުރާސްފަތި ދުވަހު އޮންނާނެ. މި ފޯރަމްގައި އެތަންތަނުގެ ވެރިން ބައިވެރިވެވަޑައިގަންނަވާނެ." މިމަހުގެ 13 ވަނަ ދުވަހު އިސްލާމިކް މިނިސްޓްރީން ވިދާޅުވެފައިވެއެވެ. އެގޮތުން އެ ފޯރަމުވެސް މިހާރު ވަނީ ބާއްވަވާފައެވެ.
"ރައީސް ޑރ މުއިއްޒުގެ މެނިފެސްޓޯގައި ބަޔާންވެފައިވާ ޒަކާތު ހައުސް، ޙައްޖު ފަންޑު، އަދި ވަޤުފު ތަރައްޤީ ކުރުމުގައި އިސްލާމީ މާލީ އިދާރާތަކުގެ މަޝްވަރާއާއި ޚިޔާލު ހޯދުމަށް ކުރިއަށް ގެންދާ އިސްލާމިކް ސޯޝަލް އިކްނޮމިކް ފޯރަމްގެ މިއަދު ފަށައިފި." މިމަހުގެ 14 ވަނަ ދުވަހު އެމަނިކުފާނު ވިދާޅުވިއެވެ.
