އަނގޮޅި: ކުރީގެ ތިން ރައީސުން ގުޅިގެން ބަގާވާތަށް!

އެކުވެރިޔަކާއެކު ކޮފީއެއް ބޯލަން ދިއައީމެވެ. އެއީ މީގެ ހަފުތާއެއްހާ ދުވަސްކުރިއެވެ. އެކުވެރިޔާއަކީ ސިޔާސީ ކަންކަމުގައި ވަރަށް ހަރަކާތްތެރި ސިއާސީ ބޭފުޅެކެވެ. ދެކެވުނީވެސް ސިޔާސީ ވާހަކައެވެ.
ޕީއެންއެފްއަށް ސޮއިކުރިވާހަކައާއި އެޕާޓީގެ އިސް ސަފުގައި މަސައްކަތް ކުރާ ވާހަކައިން ފެށިގެން ދެކެވުނު ވާހަކަތަކުން އަޅައިގަތް އެއް ވާހަކައަކީ މިވެރިކަން މާގިނަދުވަހު ނޯންނާނެ ކަމަށް ބުނި ވާހަކައެވެ. އެވާހަކަ އިތުރަށް ތަފުސީލުކޮށްވެސް ދިނެވެ.
މިއަދު މިވަނީ މަޖިލިސްތެރޭ ގަވާއިދަށް ގެނައި ބަދަލާއެކު ރައީސް މަގާމުން ދުރުކުރަން ރާވަމުން އެކަމަށް މަގުފަހިކުރަމުން ދާކަން ރައްޔިތުންނާ ހަމައަށް ތިލަވެފައެވެ.
ރައީސް މަގާމުން ދުރުކުރުމަށް މަޖިލިސް ތެރެއިން ޑިމޮކްރެޓްސް އާއި އެމްޑީޕީ ގުޅިގެން ކަންކަން އިންތިޒާމުކޮށް ތަރުތީބު ކުރަމުންދާއިރު އުފެއްދުމުގެ މަސައްކަތްކުރާ ޕީއެންއެފް އޮތީ އަތްގުޅާލައިގެންނެވެ.
ޕީއެންއެފް ތަމްސީލުކުރާ މެމްބަރަކު ނުވަތަ ރައީސް ޔާމީނަށް ތާއީދުކުރާ މެމްބަރަކު މަޖިލިހުގައި ނެތުމުން މަޖިލިސްތެރެއިން އެކަމުގައި ބައިވެރިވެވޭނެ ފުރުސަތުނެތީއެވެ. އެފުރުސަތު އޮތްނަމަ ތިން ވެރިން ތަމްސީލުކުރާ މެމްބަރުން ތިބޭނީ މަސްވަރާ މޭޒު ދަށުގައި އަތުގުޅާލައިގެންނެވެ.
ފަރުދާގެ ފުރަގަހުގައި ރައީސް ޔާމީނު ހުރިނަމަވެސް އެމަނިކުފާނަށް ތާއީދުކުރާ މީހުންގެ ވާހަކައާ ސޯސަލް މީޑިއާގައި ކުރާޕޯސްޓްތަކާއި ކުރާ ކޮމެންޓްތައް މިއަދު މަޖިލިސްތެރޭ މިހިނގާ ކަންކަމާ ގުޅުވާލެވެއެވެ.
ޕީއެންއެފް ނުވަތަ ރައީސް ޔާމީނަށް ނިސްބަތްވާ ގޮތަށް ފާޑުކިޔާ ކޮށްފައި ހުންނަ ޕޯސްޓްތަކަށް އެއްރާގަކަށް ރައީސް ޔާމީނުގެ ސަޕޯޓަރުން ރައްދުގައި ކޮށްފައި ހުންނަ ކޮމެންޓްތައް ގޮސް ހުއްޓެނީ މިއަދު މަޖިލީހުގައި މިހިނގާ ކަންކަމާ ހިސާބަށެވެ. "މަސްދުވަސް ފަހުން ވާގޮތެއް ބަލަން ހުންނާށޭ،، ބުނެ ކޮށްފަ ހުންނަ ކޮމެޓްތަކެވެ." މަޖިލިސް އިންތިހާބު ނިމުނީމަ ވާގޮތް ބަލަން ހުންނާށޭ، ބުނެ ކޮށްފައިވާ ކޮމެންޓްތަކެވެ.
ފެންނަފަށުގައި ރައީސް ޔާމީނު ނެތްނަމަވެސް ހިންގަން މިއުޅޭ ބަގާވާތުގެ އެއްބައިވެރިއަކީ ކުރީގެ ރައީސް ޔާމީނެވެ.
ރައީސް ނަސީދު ނުގަބޫލުކަމެއް ޑިމޮކްރެޓުން ނުކުރާނެއެވެ. ރައީސް އިބުރާހިމް ހިތްޕުޅާ ނުވާކަމެއް އެމްޑީޕީން ނުކުރާނެއެވެ. ރައީސް ޔާމީނު ނޭދޭގޮތަކަށް ޕީއެންއެފްގެ މެމްބަރެއް ފިޔަވަޅެއްނާޅާނެއެވެ.
ލީޑަރުންކަމަށް ބުނާ ބަޔަކުގެ އަމިއްލައެދުމާ މަންފާއަށް ރާވަމުން ހިންގަމުން ދާކަންކަމުގަ އެމީހުނަށް ތާއީދުކުރާބަޔަކުވެސް އެތިބީ ލޯމަރާލައިގެން އެމީހުން ބުނާހާކަމެއް ކުރަން ތައްޔާރަށެވެ. އިއްޔެ އެއްބަޔަކު އަނެއްބަޔަކަށް ގޮވިއެއްޗެހި ހަނދާން ނައްތާލާފަ ލީޑަރު ދެކެވާ ލޯބިން ބަގާވާތައް ވެސް އެތިބީ ރުހި ގަބޫލު ވެގެންނެވެ.
ބީވެދިއަވެރިކަން ހޯދަން ކޮންމެކަމެއް ކުރަންވެސް ތިން ރައީސުން އެތިބީ ފޫގަޅާލާފައެވެ.
މަޖިލިސްތެރޭން ހިންގަން މިއުޅޭ ބަގާވާތުގެ މުގުލުގައި ތިބީ ކުރީގެ ތިން ރައީސުންނެވެ. މިއީ ތިން ރައީސުން ގުޅިގެން ހިންގާ ބަގާވާތެކެވެ.

ނޯޓު: އަނގޮޅީގައި ލިޔާނީ މިދާމަގުމަތިން އިވޭއަޑާ ފެންނަކަންކަމެވެ. ކަންކަން މަތިން އިވޭއަޑާ ފެންނަ ކަންކަމެވެ. ވަދެލެވޭ ހޮޓާ ކެފޭތަކުން ފެންނަ ކަންކަމާ އިވޭއަޑެވެ. އިށީނދެލެވޭ ހޮޅުއަށިތަކާ ވަދެލެވޭ މައިޒާންތަކުން އިވޭއަޑާ ފެންނަ ކަންކަމެވެ. އަނގޮޅީގައި ލިޔާނީ ލިޔެވޭނީ މަށަށް ފެންނަ ކަންކަމާ މަންޒަރާ އިވޭ އަޑެވެ. އަނގޮޅި ކިޔާ މީހުންނަށް ފެންނަ ކަންކަމާ އިވޭއަޑު ތަފާތު ވެދާނެއެވެ.