ދަރިވަރުންތަކަކަށް ޖިންސީ ގޯނާކުރި ކަމުގެ ތުހުމަތުގައި ދައުވާ އުފުލި، ޤުރުއާން ޓީޗަރުގެ މައްޗަށް އުފުލި ތިން ދައުވާ ވެސް ސާބިތު ނުވާ ކަމަށް ކްރިމިނަލް ކޯޓުން ހުކުމް ކޮށްފިއެވެ.
28 އަހަރުގެ ޓީޗަރު ހައްޔަރުކުރީ އޭނާ ކައިރިއަށް ޤުރުއާން ކިޔަވަންދާ ދަރިވަރުންނަށް ޖިންސީ ގޯނާ ކުރަމުންދާ ކަމަށް ތުހުމަތުކޮށްފައެވެ. މިއީ މީގެ ތިން އަހަރު ކުރީގެ ކަމެކެެވެ. ތުހުމަތުކޮށްފައިވަނީ، އޭނާގެ ޝިކާރައަކަށް ވި ކުދިންގެ ތެރޭގައި އުމުރުން 12 އަހަރާއި 16 އަހަރާ ދެމެދުގެ ފިރިހެން ކުދިން ހިމެނޭ ކަމަށެވެ.
އޭނަ ގެ މައްޗަށް އުފުލާފައިވަނީ، ކުޑަކުއްޖަކު އިތުބާރުކުރަންޖެހޭ މަޤާމެއްގައި ހުރި މީހަކު، އެ ކުޑަކުއްޖަކާ އެކު ޖިންސީ އަމަލެއް ހިންގުމުގެ ކުށުގެ ތިން ދައުވާ ކަމަށްވިޔަސް، އެ ތިން ދައުވާ އެކަށީގެންވާ މިންވަރެއްގެ ޝައްކެއް ނެތި ދައުލަތަށް ސާވިތުކޮށްދެވިފައި ނުވާ ކަމަށް ކަނޑައަޅައި ކްރިމިނަލް ކޯޓުން ވަނީ އެ މައްސަލައިގައި ޙުކުމްކޮށްފައެވެ.
ކުޑަކުދިންނާ ގުޅޭ ޖިންސީ އަނިޔާގެ މައްސަލަތަކުގައި، އެ ކުދިންގެ ވަނަވަރު އެނގޭނެ ފަދަ އެއްވެސް މައުލޫމާތެއް ހާމަކުރުމަކީ ޤާނޫނީ ކުށެއްކަމުން، މި މައްސަލައިގެ ހުކުމް ކްރިމިނަލް ކޯޓުގެ ވެބްސައިޓްގައި އާންމުކޮށްފައެއް ނުވެއެވެ.
މި މައްސަލައިގައި ދައުވާކުރި މީހާއަކީ އެ ރަށު މިސްކިތުގައި އިމާމުވެ ނަމާދުކުރާ އަދި ހުތުބާ ވެސް ދޭ މީހެއް ކަމުން މިފަދަ ތުހުމަތުތަކެއްގައި އެ ޒުވާނާ ހައްޔަރުކުރުމުން ގިނަ ބަޔަކަށް ސިހުން ލިބުނެވެ.
އޭނާ ހައްޔަރުކޮށް ޝަރީއަތް ނިމެންދެން ބަންދުކުރިނަމަވެސް، 2021 ވަނަ އަހަރުގެ ތެރޭގައި އޭނާ ބަންދުން ދޫކޮށްލަން އަމުރުކުރިއެވެ. އަދި ދުވަސްތަކެއް ފަހުން ހައި ކޯޓުން ވަނީ އެ އަމުރު ބާތިލްކޮށް، އަލުން ބަންދު ކުރަން އަމުރުކުރި ކަމަށް މަޢުލޫމާތު ލިބެއެވެ.
