މާލޭ ސިޓީއަށް މޭޔަރަކު ހޮވުމަށް ބާއްވާ ބައި އިލެކްޝަންގައި ވާދަކުރައްވާ ކެންޑިޑޭޓުންގެ މެދުގައި މިއަދު ގުރުއަތު ނަގައި، ނަންތައް ތަރުތީބު ކޮށްފިއެވެ.
ގުރުއަތު ތަރުތީބުކޮށްފައިވަނީ، މޭޔަރު ކަމަށް ވާދަކުރައްވާ ބޭފުޅުންގެ ނަންތައް ތަރުތީބު ކުރަން މިއަދު އިލެކްޝަންސް ކޮމިޝަން (އީސީ) ގައި ބޭއްވި ރަސްމިއްޔާތެއްގައެވެ.
މޭޔަރުކަމުގެ އިތުރުން މާލެ ސިޓީ ކައުންސިލުން ހުސްވެފައިވާ ތިން ދާއިރާ ކަމަށްވާ ހެންވޭރު ދެކުނާއި، މާފަންނު ދެކުނުގެ އިތުރުން މެދު ހެންވޭރު ގޮނޑިއަށް ވާދަކުރައްވާ ކެންޑިޑޭޓުންގެ ނަންތައް ވެސް މިއަދު ވަނީ ތަރުތީބު ކޮށްފަ އެވެ.
މާލޭ މޭޔަރުކަމަށް ވާދަކުރައްވާ ކެންޑިޑޭޓުންގެ ނަންތައް ތަރުތީބުކުރި ގޮތް
– ކެންޑިޑޭޓް ނަމްބަރު 1: ޝުއައިބު އަލީ (އަމިއްލަ ގޮތުން)
– ކެންޑިޑޭޓް ނަމްބަރު 2: ހުސައިން ވަހީދު (އަމިއްލަ ގޮތުން)
– ކެންޑިޑޭޓް ނަމްބަރު 3: އާއިޝަތު އާޒިމާ ޝަކޫރު (ޕީއެންސީ)
– ކެންޑިޑޭޓް ނަމްބަރު 4: އާދަމް އާޒިމް (އެމްޑީޕީ)
– ކެންޑިޑޭޓް ނަމްބަރު 5: ސައިފް ފާތިހު (ޑިމޮކްރެޓްސް)
އެ މަޤާމުގައި ކުރިން ހުންނެވީ މިހާރުގެ ރައީސް ޑރ. މުޙައްމަދު މުޢިއްޒުއެވެ. މާލޭގެ މޭޔަރުގެ މަގާމު ހުސްވީ އެ މަގާމުގައި ކުރިން ހުންނެވި ހުންނެވި މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރައްވައި ރައީސްކަމާ ހަވާލުވެވަޑައިގަތުމުންނެވެ. ކައުންސިލްގެ އެހެން ބައެއް ގޮނޑިތައް ހުސްވީ އާ ސަރުކާރުގެ އެކި މަގާމުތަކަށް ކައުންސިލްގެ ބައެއް މެމްބަރުން ވަޑައިގަތުމުންނެވެ.
އީސީން ނިންމަވާފައި ވަނީ މޭޔަރުގެ ގޮނޑިއަށް އާ ބޭފުޅަކު އިންތިހާބުކުރުމަށް ބައި އިލެކްޝަން އަންނަ މަހުގެ 13 ގައި ބޭއްވުމަށެވެ.
