ޕްރައިވެޓް ކާރަށް އެރީ ވިދާ ގުގުރާ ވިއްސާރަވުމުން ހާސްކަމުގެ ތެރޭގައި، "އެހެން ނަހަދާ!"

މޫސުމީ އެލާާޓް ނެރުނެވެ. ދުވަހުގެ ހެނދުނެވެ. އެދުވަހުގެ މޫސުމީ އެ ބުލެޓިންގައި ބުނެފައިވާގޮތުގައި އުތުރާއި މެދުރާއްޖޭގެ ބައެއް ރަށްތަކަށް ގުގުރުމާއެކު ވިއްސާރަކުރާނެއެވެ. އަދި މެދު ރާއްޖެއާއި އުތުރުގެ ބައެއް ރަށްތަކަށް ބޯކޮށް ވާރޭވެހުން އެކަށީގެންވެއެވެ. ދެކުނުގެ އަތޮޅުތަކަށްވެސް ކެރީގެ އަސަރު ފޯރާނެކަމަށް ބުނެފައިވެއެވެ.

ކަނޑުތައްވެސް ގަދަވާނެކަމަށް ބުނެފައިވާއިރު ރާޅުގެ އުސްމިން ހުންނާނެކަމަށް ލަފާކޮށްފައިވަނީ ހަތަރު ފޫޓާއި ހަތް ފޫޓާއި ދެމެދުގައެވެ. މެޓުން އިލްމާސްކުރީ ކަނޑު ދަތުރުކުރައްވާ ފަރާތްތަކުން މޫސުމަށް ސަމާލުވުމަށެވެ.

"ބާއްޖަވެރި ހެނދުނު" ގައި ރޭޑިއޯއިން އެކަން އިޢުލާންކުރަމުން ދިޔައެވެ.

ވަޒީފާއަށް ނިކުތީ އެ އެލާޓް ނެރެފައިވަނިކޮށެވެ. އެއީ ހުޅުމާލެއެވެ. ދިރިއުޅެނީ ހުޅުމާލޭ ފޭސް 2 ގެ ފުލެޓެއްގައެވެ. ވަޒީފާ އަދާކުރާ ތަން ހުންނަނީ ހުޅުމާލޭ ފޭސް 1 ގައެވެ.

ވަޒީފާއަށް ނިކުތް އިރުވެސް ބޯކޮށް ވާރޭ ވެހެއެވެ. ފޭސް 2 ގެ ބަސް ސްޓޭޝަނަށް ދެވުނީވެސް ކުޑަކޮށް ތެމިގެންނެވެ. ނަމަވެސް ވަޒީފާއަށް ނިކުތީ ސަލާމަތުން ގެއަށް އާދެވޭނެ ކަމުގެ އުއްމީދުގައެވެ.

ދުވަހަކީ އޮފީހުގެ އަހަރީ ދުވަހަށް ތައްޔާރު ވަމުން ދިޔަ ދުވަހެވެ. އޮފީހުގެ މަސައްކަތްތައްވަނީ އެދުވަހަށްޓަކައި ރާވާލެވިފައެވެ. އެއީ ބިޒީ ޝެޑިއުލެކެވެ. ރޭގަނޑު ދިހައެއް ޖަހަންދެން ނުނިމިހުރި މަސައްކަތްތައް ނިންމުމަށް ހުރިހާ މުވައްޒަފުންވެސް މަސްޢޫލުވިއެވެ. އޮފީހުގެ އަހަރީ ދުވަަހަކީ އޮފީހުގައި މަސައްކަތްކުރާ ކޮންމެ މުވައްޒަފަކަށްވެސް އެންމެ ޝަރަފުވެރި ދުވަހެއެވެ. ހުރިހާ މުވައްޒަފުންވެސް މަސައްކަތްކުރަމުން ދިޔައީ އެ ރޫޙުގައެވެ.

އޭރުވެސް ބޯކޮަށް ވާރޭ ވެހެމުން ދިޔައެވެ. ނަމަވެސް އޮފީސް ތެރޭގައި ކުރަންޖެހޭ މަސައްކަތްތަކެއް ކަމުން، އެ ކަމަށް އެއްވެސް މުވައްޒަފަކު ސަމާލުކަމެއް ނުދެއެވެ.

އަހަރީ ދުވަހުގެ އެންމެހައި ތައްޔާރީތައް ނިންމާލެވުނީ ކަނޑައެޅި ވަގުތު ފަހަނައަޅައި ދިޔަ ފަހުންނެވެ. މެންދަމުން އަލިވެ އެކެއް ޖަހަނީއެވެ. އޭރުވެސް ބޯކޮށް ވާރޭވެހެއެވެ. ވިދާ ގުގުރައެވެ. ވައިބާރެވެ. ސައިކަލެއްގެ ފަހަތަށް އަރައިގެން ދެވޭ ވަރެއް ނޫނެވެ. އެހެން މުވައްޒަފުންވެސް މަޑުކޮށްލައިގެން ތިއްބެވެ. ފަހުން، އެމީހުންގެ ފިރިންނާއެކު މަޑު މަޑުން ގެއަށް ދަމުން ދިޔައެވެ. އެއްބަޔަކު ތެމިގެންނެވެ. އަނެއް ބަޔަކު ވިއްސާރަ ކޯޓު ލައިގެންނެވެ. ކުޑަ ނަގައިގެން ދެވޭ ވަރަށްވުރެ ވައި ބާރެވެ.

އެންމެން ގޮސް ނިމެއްޖެއެވެ. އެންމެ ފަހަށް މަޑުކުރި މުވައްޒަފު ދިއުމުގެ ކުރިން މަޑުކުރަންވީހޭ އޭނާގެ ގާތު އެހިއެވެ. ނަމަވެސް އެ އަންހެން މުވައްޒަފު ބުނީ ކާރެއް އަންނަންދެން މަޑުކޮށްލާނެ ކަމަށެވެ. ގެއަށްދާނީ ކާރެއްގައި ކަމަށެވެ.

އޮފީސް ކުރިމަތީގައި އެތައް އިރެއްގައި ހުއްޓައި ކާރެއް އައިސް މަޑުކޮށްލިއެވެ. އޭނާ ހަނާ އަޅާ ތަން ފެނިގެންނެވެ. މާ ގިނަ ސުވާލުތަކެއް ނުކޮށް ކާރަށް އަރާށޭ ޑްރަައިވަރު ބުންޏެވެ. އެތައް އިރެއްްގައި ބޭރުގައި މަޑުކޮށްގެން ހުރުމުން ހީކަރުވައިގެނެގެން ތުރުތުރު ލައެވެ. ވައިގަދަ ވިއްސާރަ ރެއެއްގައި ވާނީވެސް އެހެންތާއެވެ.

ކާރަށް އަރައި ނައްޓާލިއެވެ. ކޮންތާކަށްހޭ ދަނީ އެހުމުން ފޭސް 2 ގެ ފުލެޓް ނަންބަރު…. އަށް ކަމަށް ބުންޏެވެ. ނަމަވެސް ޑްރައިވަރު ކާރު ދުއްވަމުން ދިޔައީ ހުޅުމާލޭ ފޭސް 2 ގެ ފުލެޓްތަކާ ދިމާއަކަށް ނޫނެވެ. އެކަން އޭނާއަށް އެނގުމުން، ދަތުރު ކުރަމުން ދަނީ ގޯސް ދިިމާއަކަށް ކަމަށް ބުންޏެވެ. ނަމަވެސް ޑްރައިވަރު ކުއްލިއަަކަށް ހުށަހެޅުމެއް ހުށަހެޅިއެވެ. ޝަޙުވަތްތެރިކަމުގެ އެދުމެކެވެ. ނަމަވެސް އެ އަންހެން ކުއްޖާ އެކަމަށް އިންކާރު ކުރިއެވެ. ދެން ދިމާވީ ޤަބޫލުކުރަން ދަތިކަމެކެވެ. ހިތް ކަތިލި ފަދަ ކަމެކެވެ. ޑްރައިވަރު ކާރުގެ ދޮރު ތަޅުލައިފިއެވެ. ހިތުގެ ވިންދު އަވަސްވެ އެ އަންހެން ކުއްޖާގެ ހާސްކަން ދިޔައީ ބޮޑުވަމުންނެވެ.

އެއީ ކަނު އަނދިރިއެކެވެ. ވާރޭ ވެހެމުން ދިޔައެވެ. ކާރު މަޑުކޮށް ޑްރައިވަރު ކާރުން ފައިބައިފިއެވެ. ހިޔާކޮށްފައި ހުރި ތަނަކަށް ވަނުމަށް ޑްރައިވަރު އެ އަންހެން ކުއްޖާގެ ކިބައިން އެދުނެވެ.

ތުރުތުރުލާ ޙާލުގައި، އަންހެން ކުއްޖާ ބުންޏެވެ. "އަހަރެންނަކީ އެކަހަލަ މީހެއް ނޫން. ތިހެން ނަހަދާ. އަހަރެން ފުލެޓަށް ލައިދީ."

ނަމަވެސް އެ އަންހެން ކުއްޖާ ވެގެން ދިޔައީ އެ ޑްރައިވަރުގެ އަނިޔާގެ ޝިކާރައަކަށެވެ. ގަދަކަމުން ކާރުން ނެރެގެން ގެންގޮސް ގަދަކަމުން އޭނާގެ ގަޔަށް އަތްލައި، ޖިންސީ ގޯނާގެ ޢަމަލުތަކެއް ހިންގިއެވެ. އެއީ އަންހެން ކުއްޖާގެ ޙަޔާތުގައި ކުރިމަތިވި އެންމެ ބިރުވެރި އެންމެ ނާމާން ޙާދިސާއެވެ. އެންމެ ކަޅު އަނދިރި ރެއެވެ.

އެކަމުގެ ސަބަބުން އޭނާއަށް ވަނީ ނަފުސާނީ އެތައް މައްސަލަތަކެއް ތަހައްމަލުކުރަންޖެހިފައެވެ.

ގަދަކަމުން އެ އަމަލު ހިންގުމަށްފަހު އެ ޑްރައިވަރު އޭނާގެ ފުލެޓަށް ގެންދިޔައެވެ. އޭރުވެސް ބޯކޮށް ވާރޭ ވެހެމުން ދިޔައެވެ.

އެއީ ހިތް ދަތި އިޙްސާސެކެެވެ. އަންހެން ކުއްޖެއްގެ ޙަޔާތުގައި ދިމާވި އެންމެ ނާމާން ބިރުވެރި ރެއެވެ. ވިހަގަދަ އަތެއްގެ ކުލުނެއް ނެތް އަނިޔާއެވެ.

ނަމަވެސް، އެ މައްސަލަ ހުށަހެޅޭނެ އެއްވެސް މަގެއް އެ އަންހެން ކުއްޖާއަކަށް ނުފެނުނެވެ. އެއީ ޕްރައިވެޓް ކާރެކެވެ. ކާރު ރެޖިސްޓްރީ ނަންބަރެއް ނޭނގެއެވެ. އެއީ ކާކު ކަމެއް ނޭނގެއެވެ.

މިއީ ސަމާލުވާންވީ ކަމެކެވެ. މިފަދަ ކާރުތަކަށް އެރުމުގައި މިހާރަށްވުރެ ބޮޑަށް ސަމާލުކަން ދިނުމަކީ ބުއްދިވެރިކަމެކެވެ.