ޖުމްހޫރީ ޕާޓީ، ޖޭޕީގެ ޓިކެޓުގައި ކުރިއަށް އޮތް ރައްޔިތުންގެ މަޖިލިސް އިންތިޚާބުގައި ހުރިހާ ދާއިރާއަކުން ވާދަކުރުމަށް ފުރުޞަތު ހުޅުވާލައިފިއެވެ.
ޖުމްހޫރީ ޕާޓީއިން ނެރުނު އިޢުލާނެއްގައި ވަނީ، އެ ޕާޓީގެ އަސާސީ ޤަވާއިދުގެ 51 ވަނަ މާއްދާގައިވާ ބަޔާންކޮށްފައިވާ ފަދައިން 2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް ޝައުގުވެރިވާ އަދި އެކަމުގެ ޤާބިލުކަން ހުރި އަދި ރައްޔިތުންގެ މަޖިލީހުގެ މެމްބަރުންކަމުގެ ޝަރުތު ފުރިހަމަވާ ފަރާތްތަކަށް އެ ފުރުޞަތު ހުޅުވާލައިފައިވާކަމަށެވެ.
މިކަމަށް ޝަޢުގުވެރިވާ ފަރާތްތަކުން އެ ދުވަހުގެ މެންދުރު 14:00 ގެ ކުރިން އެކަމަށް ޚާއްސަކޮށްފައިވާ ފޯމު ފުރުމަށްފަހު، އެ ފަރާތެއްގެ ވަނަވަރާއި، ތަޢުލީމީ ސެޓްފިކެޓްތަކުގެ ކޮޕީ އަދި ދިވެހި ރައްޔިތެއްކަން އަންގައިދޭ ކާޑުގެ ކޮޕީ ހުށަހެޅުމަށް ޖޭޕީއިން ވަނީ އެދިފައެވެ. ޖޭޕީގެ ޓިކެޓުގައި މަޖިލީހަށް ވާދަކުރުމަށް ޝަޢުގުވެރިވާ ފަރާތްތަކަށް މި ފުރުޞަތު ހުޅުވާލާފައިވަނީ މިމަހުގެ 26 ވަނަ ދުވަހާއި ހަމައަށެވެ.
އަންނަ އަހަރުގެ ކުރީކޮޅު އޮންނަ މަޖިލިސް އިންތިޚާބުގައި ވާދަކުރުމަށް އެދި ހުށަހަޅާ ފަރާތްތަކުގެ މަޢުލޫމާތުގެ ޞައްޙަކަމާއި ޤާބިލުކަން ބެލުމަށްފަހު އެ ފަރާތްތަކުގެ ކެންޑިޑެސީ ކަށަވަރު ވާނީ ޕާޓީގެ ކައުންސިލުން ނުވަތަ އެކަމަށްޓަކާ ކައުންސިލުން ކަނޑައަޅާ ކޮމިޓީއަކުން ވަޒަންކޮށް ބެލުމަށްފަހު ކަމަށް ޖޭޕީއިން ވިދާޅުވެއެވެ.
19 ވަނަ މަޖިލީހުގައި ޖުމްހޫރީ ޕާޓީ ތަމްޞީލު ކުރާ ތިއްބެވީ އެންމެ 2 މެންބަރުންނެއެވެ. އެއީ އެޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމާއި، ކެންދޫ ދާއިރާގެ މެންބަރު ޢަލީ ޙުސައިނެވެ.
މަޖިލިސް އިންތިޚާބުގައި ވާދަކުރުމަށް ޖޭޕީން މީގެ ކުރިން ވަނީ ސިޔާސީ ޕާޓީތަކާއެކު މަޝްވަރާ ބައްދަލުވުންތަކެއް ބާއްވާފައެވެ. ވެރިކަން ކުރާ ޕީޕީއެމް ޕީއެންސީއާއި، އިދިކޮޅު އެމްޑީޕީއާއެކުވެސް މަޝްވަރާ ބައްދަލުވުމެއް ބޭއްވިއެވެ.
