ދަރިވަރުންގެ ޔުނީފޯމް ބަދަލުކުރުމާ ގުޅޭ އެއްވެސް މަސައްކަތެއް ނުކުރާކަމަށް ތަޢުލީމާ ބެހޭ ވަޒީރު ޑރ. އިސްމާޢީލް ޝަފީއު ރޭ ވިދާޅުވެއްޖެއެވެ.
ބުރުގާ އެޅުން ލާޒިމްވާ ގޮތަށް ސްކޫލު ޔުނީފޯމް ބަދަލުކުރަން އުޅޭ ކަމަށް ސޯޝަލް މީޑިއާގައި ދައްކަމުންދާ ވާހަކަތަކާ ގުޅިގެން ވަޒީރު ވިދާޅުވެފައިވަނީ ދަރިވަރުންގެ ޔުނީފޯމް ބަދަލުކުރަންޖެހޭ އެއްވެސް ސަބަބެއް ނެތް ކަމަށް ކަމަށާއި، އެއީ އެއްވެސް ހަގީގަތެއް ނެތް ވާހަކައެއް ކަމަަށެވެ.
ވަޒީރު މިހެން ވިދާޅުވީ، ސްކޫލުތަކުގައި ބުރުގާ އެޅުން މަޖުބޫރުކުރުމަށް ކެބިނެޓަށް ހުށަހެޅުމަށް އެޑިއުކޭޝަނުން ޕޭޕަރެއް ތައްޔާރުކުރަމުން އަންނަ ކަމަށް ބުނެ ސޯޝަލް މީޑިޔާގައި ދައުރުވަމުންދާ ޕޯސްޓަކާ ގުޅިގެންނެވެ.
އެ ވުޒާރާއިން ތައްޔާރު ކުރައްވަމުންދާ ލިޔުމެއް ކަމަށް ބުނެ ދައުރުވަމުންދާ ލިޔުމުގައި ވަނީ، ސްކޫލުތަކަށް ދާއިރު ބުރުގާ އެޅުން ލާޒިމްވާނީ އަންނަ އަހަރުގެ މާޗު 1 ވަނަ ދުވަހުން ފެށިގެން ކަމުގައެވެ.
ވަޒީރު ވިދާޅުވީ، ދަރިވަރުންނާ ގުޅޭ މިފަދަ ޚާއްސާސީ ވާހަކަތަކުގެ ހަގީގަތް ނުބަލައި ނުފެތުރުމަށާއި އޭގެ ސަބަބުން ދަރިވަރުންނަށް ނަފްސާނީ ގެއްލުންތައް ލިބޭ ކަމަށެވެ.
