މާލޭގެ މޭޔަރަކު ހޮވަން ބާއްވާ ބައި-އިލެކްޝަންގައި ވާދަކުރައްވާ ކެންޑިޑޭޓުންގެ މެދުގައި ސަންގު ޓީވީން ބާއްވާ ބަހުސްގައި، އެމްޑީޕީގެ ފަރާތުން މޭޔަރު ކަމަށް ވާދަކުރައްވާ އާދަމް އާޒިމް ބައިވެރިވެވަަޑައިގަތުމަށް އިންކާރުކުރައްވައިފިއެވެ.
ސަންގު ޓީވީން ބަހުސް ބޭއްވުމަށް ހަމަޖެހިފައިވަނީ ހަތަރު އެޕިސޯޑަކަށް ބަހާލައިގެންނެވެ. އެގޮތުން ފުރަތަމަ ބަހުސް ރޭ ވަނީ ބާއްވާފައެވެ.
އެމްޑީޕީން ބުނީ ސަންގު ޓީވީ އިން އިންތިޒާމްކޮށްގެން ބޭއްވުމަށް ހަމަޖައްސާފައިވާ ބަހުސްގައި އާޒިމް ބައިވެރިނުވާނެކަން އެ ސްޓޭޝަނަށް އަންގާފައިވާނެ ކަމަށާއި ސަބަބަކީ ސަންގު ޓީވީ ބަހުސް މިނިވަން ކަމާއެކު ކުރިއަށް ގެންދިއުމަށް މިނިވަން މޮޑަރޭޓަރެއް ބަހައްޓައިދިނުމަށް އެދިފައިވުމާއެކު ވެސް އެކަމަށް އެއްވެސް އިޖާބައެއް ނުލިބުމާއި، އިންތިޚާބު އޮންނަ ދުވަސް މިހާ ކުޑަތަންވެފައިވަނިކޮށް ހަތަރު ދުވަހަށް ދިގުދެމިގެންދާ ބަހުސެއްގައި ތާށިވުމަކީ ކެމްޕޭނުގައި ދެން ކުރަން ހުންނަ ކަންތައްތަކަށް އަސަރުކުރާނެ ކަމަކަށްވާތީ ކަމަށެވެ.
ސަންގު ބަހުސް މޮޑަރޭޓް ކުރެއްވީ މިނިވަންކަމާއެކު މަސައްކަތް ކުރައްވަމުން ގެންދަވާ ސަންގު ޓީވީގެ ނޫސްވެރިޔާ، މާހަތު ހުސައިން ރަޝީދުއެވެ.
ސަންގުޓީވީގެ ނިއުސް އެންޑް ކަރަންޓު އެފެއަރޒް އެޑިޓަރު މާހަތު ހުސައިން ރަޝީދު (މާތު) އަށް “4 ވަނަ ވިމް މޯލްޑިވްސް ޕްރޮފެޝަނަލް އެންޑް ކެރިއަރ ވިމެން އެވޯޑް 2022”ގައި ނޫސްވެރިކަމުގެ ދާއިރާއިން އެވޯޑު ލިބިފައިވެއެވެ.
ސަންގު ޓީވީގެ ބަހުސްގައި ބައިވެރިނުވި ނަމަވެސް އަންނަ މަހުގެ 6 ގައި ޕީއެސްއެމް އިން ބާއްވާ ބަހުސްގައި އާޒިމް ބައިވެރިވާނެ ކަމަށް އެމްޑީޕީން ބުނެއެވެ.
މޭޔަރު އިންތިހާބުގައި ސަރުކާރު ކޯލިޝަނުގެ ފަރާތުން ވާދަކުރައްވަނީ ކުރީގެ ބަންޑާރަ ނައިބު އައިޝަތު އާޒިމާ ޝަކޫރު އެވެ. އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާޒިމް ވާދަކުރައްވާއިރު ކުރީގެ ރައީސ ޔާމީންގެ ތާއީދާއެކު ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވެސް މޭޔަރުގެ އިންތިހާބުގައި ވާދަކުރައްވަ އެވެ. މި އިންތިހާބުގައި ދެން ވާދަކުރަނީ ޑިމޮކްރެޓްސްގެ ޓިކެޓުގައި މުހައްމަދު ސައިފް ފާތިހުގެ އިތުރުން އަމިއްލަ ގޮތުން ވާދަކުރައްވާ ޝުއައިބު އަލީ (ފުރަހަނި ޝުއައިބު) އެވެ.
މާލެ ސިޓީގެ މޭޔަރުގެ އިންތިހާބު އަދި ސިޓީ ކައުންސިލުން ހުސްވެފައިވާ ދާއިރާތަކުގެ އިންތިހާބު ބޭއްވުމަށް ހަމަޖެހިފައިވަނީ ޖެނުއަރީ 13 ވަަނަ ދުވަހުއެވެ.
