ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ 20 އަހަރުގެ ޕްލޭން ތަންފީޒުކުރުމުގައި މޭޔަރުގެ ދައުރު އަދާކޮށް، މައްސަލަތަކަށް ހައްލު ހޯދަވައިދެއްވުމަށް، ޕީޕީއެމް ޕީއެންސީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާ އައިޝަތު އާޒިމާ ޝަކޫރު ވިދާޅުވެއްޖެއެވެ.
މާލޭގެ މޭޔަރުކަމަށް ވާދަ ކުރައްވާ ކެންޑިޑޭޓުންގެ މެދުގައި ސިލްސިލާކޮށް ބޭއްވުމަށް ހަމަޖެހިފައިވާ “ސަންގު ބަހުސް” ގެ ފުރަތަމަ ޕްރޮގްރާމްގައި ވާހަކަދައްކަވަމުން އާޒިމާ މިހެން ވިދާޅުވީ މި ޕްރޮގްރާމްއަށް ހާއްސަކޮށްފައިވާ މަޢުޟޫޢު، ބޯހިޔާވަހިކަމާއި ގުޅޭ ގޮތުން ވާހަކަދައްކަވަމުންނެވެ.
ފުށިދިއްގަރު ފަޅު ހިއްކައި، އެތަނުގައި ތަރައްޤީ ކުރުމަށް މަސައްކަތް ފަށާފައިވާ “ރަސްމާލެ” އަށް އިޝާރާތް ކުރައްވަމުން، ގުޅީފަޅާއި، ގިރާވަރުފަޅުގެ މަޝްރޫއަށް މި ސަރުކާރުން އިތުރުކުރުމަށް ނިންމާފައިވާ ބައިތައް ފާހަގަކޮށް، އެއީ ޕީޕިއެ ޕީއެންސީގެ ބޯހިޔާވަހިކަމުގެ ސިޔާސަތު ހާމަކޮށްދޭ މަޝްރޫއެއްކަމަށް އާޒިމާ ވިދާޅުވިއެވެ. އޭނާގެ އަމާޒަކީ އެއްވެސް ދަތިކަމެއް ނެތް، ހިތްހަމަޖެހިލައިގެން ދިރިއުޅެވޭނެ މިންވަރަށް ބޯހިޔާވަހިކަން ފޯރުކޮށްދިނުންކަމަށް ފާހަގަކުރައްވާ އާޒިމާ ވިދާޅުވީ މި މައްސަލަތަކަށް ހައްލު ހޯދޭނީ ގައުމީ ޕްލޭންއެއްގެ ތެރެއިންކަމަށެވެ.
ބޯހިޔާވެހިކަމުގެ މަޝްރޫއުތައް ކުރިއަށް ގެންދާއިރު، އެކަމުގެ ރައްކާތެރިކަން ކަށަވަރުކުރުމަކީ މުހިންމުކަމެއްގެ ގޮތުގައި ފާހަގަކުރައްވަމުން، އޭނާއަށް މޭޔަރުކަން ލިބިއްޖެނަމަ މާލޭގެ ދިރިއުޅުމުގެ ރައްކާތެރިކަމަށްޓަކައި ވަކި އުސޫލީ މުވައްސަސާއެއް ގާއިމްކުރެއްވުމަށާއި، ދިރިއުމާއި ގެދޮރުގެ ރައްކާތެރިކަން ބެލެހެއްޓުމަށް އޮނިގަނޑެއް ފަރުމާ ކުރައްވާނެ ކަމަށް އާޒިމާ ވިދާޅުވިއެވެ.
މި ސަރުކާރުން އިއުލާންކޮށްފައިވާ 20 އަހަރުގެ ޕްލޭން ތަންފީޒުކުރުމަށްޓަކައި، މާލޭގެ މޭޔަރެއްގެ ހައިސިއްޔަތުން ކުރަން ޖެހޭ މަސައްކަތްތަކުގައި އެއް ބާރުލުން ދެއްވާނެކަމަށް އާޒިމާ ވިދާޅުވިއެވެ. އަދި މި މަގުން މަސައްކަތްކޮށް ހުރިހާ މައްސަލައަކަށް ހައްލު ހޯދޭނެކަމަށް ވިދާޅުވިއެވެ.
ޕީޕީއެމް ޕީއެންސީއިން މަސައްކަތް ކުރަމުން އަންނަނީ އަދި ޕާޓީގެ ސިޔާސަތަކީ ބޯހިޔާވަހިކަން ދުސްތޫރީ އަދި އަސާސީ ހައްގެއްގެ ގޮތުގައި ކަށަވަރުކޮށްދިނުންކަމަށް ކުރީގެ ބަންޑާރަ ނައިބުކަންވެސް ކުރައްވާފައިވާ އާޒިމާ ވިދާޅުވިއެވެ. މިއީ އިންސާފުވެރިކަމާއިއެކު ފޯރުކޮށްދެން ޖެހޭ ހިދުމަތެއްގެ ގޮތުގައި އާޒިމާ ވަނީ ސިފަ ކުރައްވާފައެވެ.
ބޯހިޔާވަހިކަމަށް ކުރާ ޑިމާންޑަށް ނިމުމެއް ނާންނަކަމަށް ފާހަގަކޮށް ކުރި ސުވާލަށް ޖަވާބުދެއްވަމުން އާޒިމާ ވިދާޅުވީ އެ ޑިމާންޑު ކުޑަ ކުރުމަށް މަސައްކަތް ކުރުމުގެ ބަދަލުގައި މަސައްކަތް ކުރަންޖެހޭނީ އެ ޑިމާންޑަށް ކޭޓާރ ކުރެވޭނެ ނިޒާމެއް ހޯދައި ގާއިމްކުރުމަށްކަމަށެވެ.
ހަމައެހެންމެ، އާޒިމާ ވަނީ ރައްޔިތުންނާއި ހަމައަށް ތަސައްވުރު ހާމަކޮށްދީ، ޖަވާބުދާރީވުމުގެ މުހިންމުކަންވެސް ފާހަގަކުރައްވާފައެވެ. އަދި ވަކި ބަޔަކު ފަށާފައި ހުރި މަޝްރޫއުތައް ހުއްތާލާނެކަމަށް ބުނެ ދެކެވޭ ވާހަކަތާއި ގުޅިގެން ކަންބޮޑުވުން ފާޅު ކުރައްވާ އާޒިމާ ވިދާޅުވީ، މިއީ ޒާތީކަމެއްގެ ގޮތުގައި ދެކި ވާހަކަދައްކަންޖެހޭ އެއްވެސް ސަބަބެއް ނެތްކަމަށެވެ.
