މަޖިލިސް މެންބަރުންގެ މުސާރަ ބޮޑުކުރުމާ ޑިމޮކްރެޓުން ދެކޮޅު، "ގައުމު މިދަނީ ބަނގުރޫޓު ވުމާ ދިމާލާށް!"

ރައްޔިތުންގެ މަޖިލިސް މެންބަރުން މުސާރަ ބޮޑުކުރުމާ ޑިމޮކްރެޓުން ދެކޮޅުކަމަށް މެދު ހެންވޭރު ދާއިރާގެ މެންބަރު އަދި މައިނޯރިޓީ ލީޑަރ ޢަލީ އާޒިމް ހާމަކުރައްވައިފިއެވެ.

އީސާއި ނައިބު ރައީސާއި ދައުލަތުގެ އިސް މަގާމުތައް ހިމެނޭހެން ރައްޔިތުންގެ މަޖިލީހުން މުސާރަ ކަނޑައަޅާ މަގާމުތަކުގެ މުސާރަ ބޮޑުކުރަން މާލިއްޔަތު ކޮމިޓީން ކުުރި ޚަބަރަށް އިޝާރަތްކުރައްވައި، ޢަލީ އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ، މަޖިލިސް މެންބަރުންގެ މުސާރަ ބޮޑުކުރުމަކީ ޑިމޮކްރެޓްސް ޕާޓީގެ މެމްބަރުން ގަބޫލުކުރާނެ ކަމެއްނޫން ކަމަށެވެ.

"މިފަދަ ދަނޑިވަޅެއްގައި ތިޔަކަންކަން ކޮށްގެން ނުވާނެ. ތިކަމެއް ނުކުރެވޭނެ. ވިޔަކަ ނުދޭނަން. ގައުމު މިދަނީ ބަނގުރޫޓު ވުމާ ދިމާލާށް!" ޢަލީ އާޒިމް ވިދާޅުވިއެވެ.

މިފަދަ ދަނޑިވަޅެއްގައި ތިޔަކަންކަން ކޮށްގެން ނުވާނެ.

ތިކަމެއް ނުކުރެވޭނެ. ވިޔަކަ ނުދޭނަން.

ގައުމު މިދަނީ ބަނގުރޫޓު ވުމާ ދިމާލާށް! https://t.co/ucbJrrYdcW

— 𝐀𝐥𝐢 𝐀𝐳𝐢𝐦 (@aliaazim) December 19, 2023

ރައީސާއި ނައިބު ރައީސާއި ދައުލަތުގެ އިސް މަގާމުތައް ހިމެނޭހެން ރައްޔިތުންގެ މަޖިލީހުން މުސާރަ ކަނޑައަޅާ މަގާމުތަކުގެ މުސާރަ ބޮޑުކުރަން މާލިއްޔަތު ކޮމިޓީން އިއްޔެ ފާސްކޮށްފައެވެ.

މަޖިލިސް ރައީސާއި ނައިބު ރައީސް އަދި މިނިސްޓަރުންނާއި މޭޔަރުންނާއި ކައުންސިލަރުން ވެސް ހިމެނޭ ގޮތަށް މި މަގާމުތަކަށް މުސާރަ ބޮޑުކުރަން އަންނަ އަހަރަށް ލަފާކޮށް ފާސްކުރި ބަޖެޓުގައި ވަނީ ހިމަނައިފައެވެ.

މުސާރަ ބޮޑުކުރާނެ ގޮތަކާ މެދު މަޝްވަރާކުރުމަށް ފަހު މާލިއްޔަތު ކޮމިޓީން ނިންމީ ހުރިހާ މަގާމުތަކަށް ވެސް މުސާރަ ބޮޑުކުރާށެވެ. މި ބަދަލުތައް ކޮމިޓީގެ އިއްތިފާގުން ވަނީ ފާސްކޮށްފަ އެވެ.

ކޮމިޓީން ބޮޑުކުރަން ފާސްކުރި ގޮތް

• ރައީސުލްޖުމްހޫރިއްޔާގެ މުސާރަ 120،000ރ.
• ރައީސުލްޖުމްހޫރިއްޔާގެ ނައިބު – 93،000ރ.
• މިނިސްޓަރުން – 72،000ރ.
• ރައްޔިތުންގެ މަޖިލިސް މެންބަރުން – 80،000ރ.
• މަޖިލީހުގެ ރައީސް – 90،000ރ.
• މަޖިލީހުގެ ނައިބު ރައީސް – 88،000ރ.
• އުއްތަމަ ފަނޑިޔާރު – 91،000ރ.
• އެމްއެމްއޭ ގަވަރުނަރު – 74،000ރ.
• އޮޑިޓާ ޖެނެރަލް – 74،000ރ.
• ޕްރޮސެކިއުޓާ ޖެނެރަލް – 74،000ރ.

މީގެ އިތުރުން ކޯޓުތަކުގެ ފަނޑިޔާރުންނާއި ގާޒީންނާއި މެޖިސްޓްރޭޓުންނާއި މިނިވަން މުވައްސަސާތަކުގެ މެންބަރުންނާއި އިދާރާތަކުގެ ޑިރެކްޓަރުންނާއި ބޯޑު މެންބަރުންނާއި ސިޓީ އަދި ރަށު ކައުންސިލަރުންގެ މުސާރަ ބޮޑުކުރުމަށް ވެސް ވަނީ ފާސްކޮށްފައެވެ.

ކައުންސިލަރުންގެ އާ މުސާރަ:

• މޭޔަރު – 46،000ރ.
• ޑެޕިއުޓީ މޭޔަރު- 40،500ރ.
• ސިޓީ ކައުންސިލް މެންބަރުން 35،000ރ.
• އަތޮޅު ކައުންސިލް ރައީސް 33،000ރ.
• ރަށު ކައުންސިލް ރައީސް 25،500ރ.
• ރަށު ކައުންސިލް ނައިބުން 20،000ރ.
• ރަށު ކައުންސިލަރުން 18،000ރ.

ކޮމިޓީން މި ބަދަލު ގެނައި ނަމަވެސް ރައީސާއި ނައިބު ރައީސްގެ މުސާރައިގެ އަދަދު ވަކި ގޮތަކަށް ގާނޫނު އަސާސީގައި ބަޔާންކޮށްފައިވާތީ އެކަމަށް އިސްލާހު ގެނައުމަށް ލަފާދިނުމަށް ވެސް ކޮމިޓީން ވަނީ ނިންމައިފައެވެ.