މުސާރަ ބޮޑުކުރަން ނިންމީ، މެމްބަރުން މާލޭގައި ދިރިއުޅެންޖެހޭ ދަތި ހާލުގެ ސަބަބުން: އެމްޑީޕީ ޕީޖީ ލީޑަރު

ރައްޔިތުންގެ މަޖިލީހުގެ މެންބަރަކަށް މުސާރައިގެ ގޮތުގައި މަހަކު އެއް ލައްކަ ރުފިޔާ ލިބޭގޮތަށް މުސާރަ ބޮޑުކުރަން އެމްޑީޕީގެ މެޖޯރިޓީ އޮންނަ މާލިއްޔަތު ކޮމިޓީން ނިންމީ، ރައްޔިތުންގެ މަޖިލީހުގެ އިއްޒަތްތެރި މެމްބަރުން މާލޭގައި ދިރިއުޅެންޖެހޭ ދަތި ހާލުގެ ސަބަބުންކަމަށް އެމްޑީޕީގެ ޕީޖީ ލީޑަރު، މުހައްމަދު ރަޝީދު ހުސެއިން (ބިގޭ) ވިދާޅުވެއްޖެއެވެ. މެމްބަރު މިފަދައިން ވިދާޅުވީ، ދައުލަތުގެ މުސާރަ ކަނޑައަޅާ ފަރާތްތަކުގެ މުސާރަ މުރާޖާ ކުރުމާ ގުޅޭގޮތުން މައުލޫމާތު ދިނުމަށް އެމްޑީޕީގެ ޕީޖީ ގުރޫޕުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

ނޫސްވެރިންގެ ބައްދަލުވުމުގައި ނޫސްވެރިން ވަނީ، ރާއްޖޭގެ މާލީ ހާލަތު ގޯސްވެ، އިގްތިސާދީގޮތުން ބޮޑެތި ގޮންޖެހުންތަކަކާ ކުރިމަތިވެފައިވާ މި ދަނޑިވަޅުގައި، ދައުލަތުގެ މުސާރަ ކަނޑައަޅާ ފަރާތްތަކުގެ މުސާރަ މުރާޖައާކުރިއިރު، މަޖިލީހުގެ މެމްބަރުންގެ މުސާރަ އެއްލައްކަ ރުފިޔާ ލިބޭގޮތަށް ބޮޑުކުރުން މިއީ އެންމެ ރަނގަޅުގޮތްތޯ ސުވާލުކޮށްފައެވެ.

"… އެ ހުރިހާ ކަންތައްތަކެއް އެހާ ދަތިކޮށް މާލޭގައި ގިނަ ޚަރަދުތަކެއް ކުރައްވައިގެން އުޅެންޖެހުމުގެ އިތުރުން، މަޖިލީހުގެ މެމްބަރުންނަށް ލިބޭ ރިސެސް ވަގުތުގައި، އަދި އެއަށްވުރެ ވެސް ގިނައިން ރައްޔިތުންގެ ގާތަށް ރައްޔިތުންގެ މަންދޫބުން ވަޑައިގަންނަވަން ޖެހޭ. އެ ކުރާ ކޮންމެ ދަތުރަކީ ވެސް އިންތިހާއަށް ހޭދަކުރަންޖެހޭ ޚަރަދުތައް. އެހެންވީމަ މި ހުރިހާ ކަމަކަށް ބަލާއިރު، ރައްޔިތުންގެ މަޖިލީހުގެ ގިނަ މެމްބަރުންގެ ވާހަކަތަކުން އަޅުގަނޑަށް އެނގެނީ، އަޅުގަނޑުގެ ވެސް އަމިއްލަ ތަޖުރިބާއިން އެނގެނީ، އެމަހެއްގައި ލިބޭ މުސާރައަށްވުރެ ބޮޑު ހޭދައެއް ރައްޔިތުންގެ ހައްގުގައި ކުރަންޖެހޭކަން". މުހައްމަދު ރަޝީދު ހުސައިން (ބިގޭ) ވިދާޅުވިއެވެ.

މަޖިލީހުގެ މެމްބަރުންގެ މުސާރަ، އެ މެމްބަރުން އަމިއްލައަށް ބޮޑުކުރުމަކީ ފާޑުކިޔުންތައް އަމާޒުވާނެކަމެއްކަމަށް ގަބޫލުކުރައްވާ ކަމަށާއި، އެހެންނަމަވެސް ގާނޫނުގައި އެކަންކުރަން އޮންނަނީ އެގޮތަށްކަމަށް އޭނާ ވިދާޅުވިއެވެ.

"ރައްޔިތުންގެ މަޖިލީހުގެ މެމްބަރުންނަކީ ޝަރުތުތަކެއް ކަނޑައެޅިފައި ނެތަސްވެސް، ގިނަ ރައްޔިތުންތަކެއްގެ ވޯޓުން އިންތިޚާބުކުރެވޭ ބައެއް. އެހެންވީމާ ރައްޔިތުން ވިސްނާ. ރައްޔިތުންގެ މަޖިލީހަށް ކުރިމަތިލައްވާ މެމްބަރުން އިންތިޚާބުވެވަޑައިގަތުމަށްޓަކައި އެކުރައްވާ މަސައްކަތުގެ ތެރޭގައި މިއީ ކޮން ފެންވަރެއްގެ ކާކުތޯ. ކިހާވަރަކަށް ރައްޔިތުންގެ ހައްގުގައި ވަކާލާތު ކުރެވިދާނެތޯ. މި ހުރިހާ ކަމަކަށް ބައްލަވާފައި، ރައްޔިތުންގެ ވޯޓަކުން އިންތިޚާބުވެވަޑައިގަންނަވާ ބޭފުޅުން މަޖިލީހުގެ މެމްބަރުންނަކީ. އެހެންވީމަ އަޅުގަނޑު ދެކޭ ގޮތުގައި، އަޅުގަނޑުމެން އިންތިޚާބު ކޮށްފައި މި ތިބެނީ، އަޅުގަނޑުމެންނަކީ ކޮންބައެއްކަން އަދި އަޅުގަނޑުމެންނަކީ ރައްޔިތުންނަށްޓަކައި ކޮންކޮން ކަންތައްތަކެއް ކޮށްދެވޭ ބައެއްކަން އެ ދާއިރާއަކަށް ނިސްބަތްވާ ރައްޔިތުން ވިސްނާވަޑައިގެންފައި ރައްޔިތުން އިންތިޚާބުކުރައްވަނީ. އެހެންވީމަ އަޅުގަނޑު، ތި ޝަރުތާ ދޭތެރޭގައި އެއްޗެއް ދަންނަވަން ދޫކޮށްލާނީ ރައްޔިތުންނަށް".  މުހައްމަދު ރަޝީދު ހުސައިން (ބިގޭ) ވިދާޅުވިއެވެ.

ރައްޔިތުންގެ މަޖިލީހުން ދައުލަތުގެ މުސާރަ ކަނޑައަޅާ ފަރާތްތަކުގެ މުސާރަ މުރާޖާ ކުރުމަށް އެ ކޮމިޓީއަށް ހުށަހަޅާފައިވާ މައްސަލައިގައި ކޮމިޓީން ނިންމާފައި ވަނީ ކޮމިޓީ އެލަވަންސަށް ދޭ 20،000 ރުފިޔާ އާއެކު މެންބަރުންނަށް މުސާރައިގެ ގޮތުގައި މަހަކު 100،000 ރުފިޔާ ކަނޑައެޅުމަށެވެ.

މިހާރު، ކޮމިޓީ އެލަވަންސާއެކު މަޖިލިސް މެންބަރުންނަށް ލިބެނީ މަހަކު 82،000 ރުފިޔާއެވެ. މީގެއިތުރުން މެންބަރުންގެ މުސާރައަށް ގެންނަ ބަދަލާއެކު މަޖިލީހުގެ ރައީސަށް މުސާރައިގެ ގޮތުގައި 90،000 ރުފިޔާ އަދި ނައިބު ރައީސަށް މުސާރައިގެ ގޮތުގައި 88،000 ރުފިޔާ ލިބޭނެއެވެ.

މަޖިލީހުގެ ރައީސަށް މުސާރައިގެ ގޮތުގައި މިހާރު ލިބެނީ 73،125 ރުފިޔާއެވެ. މަޖިލީހުގެ ނައިބު ރައީސަށް މުސާރައިގެ ގޮތުގައި މިހާރު ލިބެނީ 71،000 ރުފިޔާއެވެ.

މި ބަދަލުތަކަށް އަމަލު ކުރާނީ، މަޖިލީހުގެ ތަޅުމުން ކޮމިޓީ ރިޕޯޓު ފާސްކުރުމުންނެވެ. މި މުސާރަތައް ތަޅުން ފާސްވުމާއެކު، އަންނަ ޖެނުއަރީ މަހުން ފެށިގެން 19 ވަނަ މަޖިލީހުގެ ބާކީ އޮތް މުއްދަތަށް ހިނގާނީ ބޮޑުކުރި މުސާރައެވެ.

ރައީސް މުއިއްޒު ވަކިކުރުމުގެ ވިސްނުން ގެންގުޅެންތޯ ނޫސްވެރިން ސުވާލުކުރުމުން އެކަމަށް ބިގޭ ސީދާ ޖަވާބެއް ނުދެއްވިއެވެ. ބިގޭ ވިދާޅުވީ ސަރުކާރުން އެންމެ ޒިންމާދާރު ގޮތެއްގައި ކަންކަން ކުރާ ކަމަކަށް ޕީޖީގެ ގިނަ މެންބަރުން ޤަބޫލު ނުކުރައްވާ ކަމަށެވެ.

މި ސަރުކާރުގެ ވަޒީރުން މަޖިލީހަށް ހާޒިރުކޮށް ޖަވާބުދާރީ ކުރުވުމުގެ މަސައްކަތް މިހާރުވެސް ހިނގާކަމަށާއި، ކުރިޔަށް އޮތް ތަނުގައި ވެސް އެ މަސައްކަތް އެގޮތަށް ކުރައްވާނެ ކަމަށާއި ހާލަތަށް ބަލާފައި ފިޔަވަޅު އަޅުއްވާނެ ކަމަށް އޭނާ ވިދާޅުވިއެވެ.

މަޖިލީހުގެ މެޖޯރިޓީ  އެމްޑީޕީއަށް އޮތްއިރު، ޕާޓީން އަދިވެސް ސަރުކާރުގެ އެއްވެސް ވަޒީރަކަށް ރުހުން ދޭކަށް ނުނިންމައެވެ. އަދި ބައެއް ވަޒީރުންނަށް ރުހުން ނުދޭނެ ކަމުގެ އިންޒާރު ވެސް ބައެއް މެންބަރުން އަންނަނީ ދެމުންނެވެ.