ފަނޑިޔާރުކަން ކުރުމަކީ ހިތް ބަލި މީހަކަށް ކުރެވޭ ކަމެއް ނޫން ކަމަށް އުއްތަމަ ފަނޑިޔާރު އަހުމަދު މުއުތަސިމް އަދުނާނު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޝަރުއީ ދާއިރާއަށް ޒުވާނުންގެ ޝައުގުވެރިކަން އިތުރުކޮށް އެ ދާއިރާއަށް ނުކުންނަ ޒުވާނުންގެ އަދަދު އިތުރުކުރުމަށް ކުރިއަށްގެންދިޔަ "ޖުޑީޝަރީ ފޯރ ޖޫނިއާސް" ޕްރޮގްރާމް ނިންމުމުގެ ރަސްމިއްޔާތުގައި ވާހަކަދައްކަވަމުންނެވެ.
އުއްތަމަ ފަނޑިޔާރު ވިދާޅުވީ ބޭއިންސާފުން ކަމެއް ގޮސްފިނަމަ އިންސާފުގެ ހުރި މުހިންމުކަން އެނގިގެންދާނެ ކަމަށާއި، ފަނޑިޔާރުކަން ކުރުމަކީ ވަރަށް ވިސްނުންތެރިކަމާއި ހިކުމަތްތެރިކަމާއެކު ޤާނޫނު ނަގަހައްޓާ އިންސާފުވެރިކޮށް ކުރާ މަސައްކަތެއް ކަމަށެވެ. ހަމައެހެންމެ، އަޚްލާޤަކީ ވަރަށް މުހިންމު އެއްޗެއް ކަމަށާއި ދާއިރާގައި އުޅޭއިރު މީހުންނަށް އިހްތިރާމް ކުރަންޖެހޭނެ ކަމަށް ވެސް ވިދާޅުވިއެވެ.
"ޖުޑީޝަރީ ފޯރ ޖޫނިއާސް" ޕްރޮގްރާމަކީ ޖޭއެސްސީ އާއި ޔޫއެންޑީޕީ ގުޅިގެން ހިންގާ ޕްރޮމްރާމެކެވެ. ޕްރޮގްރާމް ހާއްސަކޮށްފައި ވަނީ އުމުރުން 15-20 އަހަރާ ދެމެދުގެ ޒުވާނުންނަށެވެ.
