މުޅި ޑިޒާސްޓަރ މެނޭޖްމަންޓް ނިޒާމު ހަރުދަނާކުރައްވައި ކުރިޔަށް އޮތްތަނުގައި މިފަދަ ހާދިސާތަކުގައި މާލެއާ ރާއްޖޭގެ ރަށްތަކުގެ އާންމުންގެ ގެތަކާއި މުދަލާއި ވިޔަފާރިތަކާ އަދި އެނޫންތަންތަނަށް ލިބޭ ގެއްލުންތައް ކުޑަވާނެގޮތަށް ދާއިމީ ޙައްލެއް ލިބޭގޮތަށް ސަރުކާރުން ކަންކަން އިންތިޒާމު ކުރައްވާނެކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އިއްޔެ ކުރަމުންދިޔަ ވިއްސާރައިގައި މާލެ ސިޓީން ގެއްލުން ލިބުނު ބައެއް ގޭގެއަށް ޒިޔާރަތްކުރެއްވުމަށްފަހު ޕީއެސްއެމް ނިއުސްއަށް ދެއްވި އިންޓަރވިއުއެއްގައި ރައީސް ރައީސުލްޖުމްހޫރިއްޔާ ވިދާޅުވީ ސްޓޯމް ވޯޓަރ ނިޒާމް އަޕްގްރޭޑް ކުރުމަށް މަސައްކަތް ކުރެވެމުންދާ ކަމަށެވެ. ނަމަވެސް އެމަޝްރޫއަކީވެސް އެކަށީގެންވާ ކަމެއްކަމަށް ދެކެވަޑައި ނުގަންނަވާކަމަށާއި، އެހެންކަމުން މާލޭގެ ހުރިހާ މަގެއް ރަނގަޅު ފެންވަރަކަށް ހަދާ ނިމޭއިރު އަޑީގަ ވަރުގަދަ ސްޓޯމް ވޯޓަރ ނިޒާމެއް ޤާއިމްކުރުމަށް ނިންމަވާފައިވާ ކަމަށް ރައީސް ވިދާޅުވިއެވެ.
"އަޅުގަނޑުމެން މިވިސްނަނީ ވިސްނުމެއް ނޫން ނިންމާފަވެސް އޮތް ކަމަކީ މާލޭގެ މަގުތައް ރަނގަޅު ފެންވަރަކަށް ހުރިހާ މަގެއް ހެދުން. ހުރިހާ މަގެއް ހަދާއިރު އަޑީގަ ވަރަށް ވަރުގަދަ ސްޓޯމް ވޯޓަރ ނިޒާމެއް ގާއިމްކުރަން ވަރަށް ފަލަ ހޮޅިތަލެއް ލާފަ ވަރަށް ވަރުގަދަ ޕަމްޕިން ނިޒާމެއް ލާފަ. އޭރުން އިރާދަކުރެއްވިއްޔާ މިފަދަ ސިޗުއޭޝަނެއްގައިވެސް ގެތައް ސަލާމަތްވެ މީހުންގެ މުދަލާއި ފުރާނައާއި ދިރިއުޅުމަށް ކުރާ މަސައްކަތްތަކާއި ވިޔަފާރިތައް އިރާދަކުރެއްވިއްޔާ ސަލާމަތް ކުރެވޭނެ" ރައީސުލްޖުމްހޫރިއްޔާ ވިދާޅުވިއެވެ.
މުޅި ޑިޒާސްޓަރ މެނޭޖްމަންޓް ނިޒާމް ވަރުގަދަކުރުންވެސް ކުރިއަށް ގެންދަވާނެ ކަމަށާއި، މާލަސްތަކެއް ނުވެ ވަރަށް އަވަސް ރަނގަޅު ފިޔަވަޅުތަކެއް އެޅިގެންދާނެ ކަން ފާހަގަކުރައްވަމުން، ރައީސުލްޖުމްހޫރިއްޔާ ވިދާޅުވީ މިފަދަ ކާރިސާއެއްގައި އެކަށީގެންވާ ގޮތެއްގައި ރައްޔިތުންގެ މުދަލާއި ފުރާނައާއި ވިޔަފާރިތަކާއި ހުރިހާ ކަމެއް ރައްކާތެރި ކޮށްދެވޭނެފަދަ ގޮތަކަށް ސަރުކާރުން ކަންތައްތައް ބައްޓަން ކޮށްދެއްވާނެ ކަމަށެވެ.
ވިއްސާރައިގައި މިއަދު ލިބުނު ގެއްލުމުގެ ސަބަބުން މީހުންނަށް އެހީވުމުގެ ކަންތައް ކަމާގުޅޭ ހުރިހާ ވުޒާރާތަކާއި، މާލެ ސިޓީކައުންސިލާއި، ސިފައިންނާއި ފުލުހުންވެސް ހުރިހާ ފަރާތްތައް ބައިވެރިވެގެން ވަރަށް ބާރުމިނުގައި ކުރިއަށްދާ ކަމަށާއި، މިރެއިން މިރެއަށް މީހުން ބަދަލު ކުރަންޖެހޭ ގެތަކުން މީހުން ބަދަލުކުރުމުގެ މަސައްކަތްވެސް ކުރިއަށް ގެންދަވާނެ ކަމަށް ރައީސް ފާހަގަކުރެއްވިއެވެ.
ވިއްސާރައިގައި ފެންވަދެ ގެއްލުން ލިބުނު މާލޭ ސިޓީގެ ބައެއް ގެތަކަށް ރައީސުލްޖުމްހޫރިއްޔާ ކުރެއްވި ޒިޔާރަތުގައި އެގެތަކުގެ ހާލަތުވަނީ ބައްލަވާލައްވާފައެވެ. މިޒިޔާރަތުގައި އެމަނިކުފާނުގެ އަރިހުގައި ނައިބު ރައީސް އަލްއުސްތާޛް ހުސައިން މުހައްމަދު ލަތީފާއި ކެބިނެޓްގެ ބައެއް ވަޒީރުން ވަޑައިގެންނެވިއެވެ.
ފެންހިއްކުމުގެ މަސައްކަތްތަކާއި އަދި ފެނުގެ ސަބަބުން ގެއްލުން ލިބުނު ގެތަކަށް އެހީތެރިވުމުގައި މާލޭ ސިޓީކައުންސިލާއި ފުލުހުންނާއި ސިފައިން އަދި ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ އޮފް މޯލްޑިވްސްއާ ސަރުކާރުގެ އެކި އިދާރާތަކާއި އެކިއެކި ޖަމިއްޔާތަކުންނާއި، އަމިއްލަ ފަރާތްތަކުން ގުޅިގެން އަންނަނީ ހަރަކާތްތެރިވަމުންނެވެ. އަދި މި ވިއްސާރައިގައި ރާއްޖޭގެ އެކި ކަންކޮޅުތަކުގެ ރައްޔިތުންގެ މުދަލާ ތަކެއްޗަށް ލިބޭ ގެއްލުންތައް ކުޑަކުރުމާއި އެފަރާތްތަކަށް އެހީތެރިވުމަށް ރައީސުލްޖުމްހޫރިއްޔާގެ އިރުޝާދުގެ ދަށުން ސަރުކާރުގެ ކަމާގުޅޭ ހުރިހާ އިދާރާތައް ގުޅިގެން ދަނީ މަސައްކަތްކުރަމުންނެވެ
