މާލޭގައި ފެންބޮޑުވުން ހައްލު ކުރަން ކުޅި އާއި ވެވުތައް އަލުން ހެދުމަށް ކުރީގެ ރައީސް މުޙައްމަދު ނަޝީދު ލަފާފެއްވައިފިއެވެ.
ރައީސް ނަޝީދު މިފަދައިން ވިދާޅުވީ ހޮނިހިރު ދުވަހު ރާއްޖެއަށް ކުރި ވިއްސާރައިގައި މާލެއާއި އަތޮޅުތަކުގެ ގިނަ ރަށްތަކެއްގައި ފެންބޮޑުވުމުގެ ސަބަބުން ކަންބޮޑުވުން ފާޅުކުރައްވައި އެކްސްގައި ކުރެއްވި ޕޯސްޓެއްގައެވެ. އެމަނިކުފާނު ވިދާޅުވި ގޮތުގައި މާލޭގައި ފެންބޮޑުވަނީ މިހާރު ހުރި ކޮންކްރީޓް ފެންހިންދާ ނިޒާމު ފެއިލްވެފައިވާތީއެވެ.
މާލޭގައި ފެންބޮޑުވުމުގެ މައްސަލަ ހައްލުކުރަން ގުދުރަތީ ކަންކަން ހިމެނޭހެން އައު ޑިޒައިންތަކުގެ ފެންހިންދާ ނިޒާމު ބޭނުންވާ ކަމަށް ނަޝީދު ވިދާޅުވިއެވެ. އެގޮތުން، ކުޅިތަކާއި ވެވުތައް މާލެއަށް ގެނައުމަކީ ކުރެވިދާނެ ކަމެއްކަން އެމަނިކުފާނު ފާހަގަކުރެއްވިއެވެ.
Heavy rains have flooded Male' and other islands. Existing concrete storm drains have failed and will likely keep failing in future. We need new designs, making use of nature: we should explore, for example, bringing back the Male' mangroves (Kulhi) and bathing tanks (Vevu).
— Mohamed Nasheed (@MohamedNasheed) January 2, 2024
ރައީސް ނަޝީދު ކަންބޮޑުވުން ފާޅުކުރައްވާފައިވާއިރު މާލޭގައި ފެންބޮޑުވާ މައްސަލަ ހައްލުކުރުމުގެ މަސައްކަތް ސަރުކާރުގެ ކަމާ ގުޅުންހުރި އިދާރާތަކާ ގުޅިގެން ފަށާފައިވާ ކަމަށް އެމްޑަބްލިއުއެސްސީން ދާދިފަހުން ވަނީ ބުނެފައެވެ.
ހޮނިހިރު ދުވަހު، ރާއްޖެއަށް ކުރި ވިއްސާރައިގައި ފެންބޮޑުވުމުގެ ސަބަބުން މާލެއާއި އަތޮޅުތަކުގެ ބައެއް ރަށްތަކުގެ ގެތަކަށް ފެންވަދެ އެކިވަރުގެ ގެއްލުންވެސް ވަނީ ވެފައެވެ. މާލެއަށް ވަނީ 118.2 މިލިމީޓަރުގެ ވާރޭ ވެހިފައެވެ. އަދި ހުޅުލެއަށް ވަނީ 179.7 މިލިލީޓަރުގެ ވާރޭ ވެހިފައެވެ. މިއީ ފަހުގެ ތާރީޚެއްގައި މާލޭ ސަރަޙައްދަށް މިހާ ބޯކޮށް ވާރޭވެހުނުކަމަށް ރިކޯޑް ކުރެވުނު ދުވަހެއްގެގޮތުގައި މޫސުމާބެހޭ ޤައުމީ އިދާރާއިން ފާހަގަކުރައްވާފައިވެއެވެ.
