ފުލުހުންގެ ކޮންސްޓަބްލަރީ ވަޒީފާއަށް ކުރިމަތިލާން ހުޅުވާލައިފިއެވެ.
އެ އިދާރާއިން ކުރި އިއުލާނުގައިވާ ގޮތުން، 14،421ރ. ގެ މުސާރަ ލިބޭ އެ ވަޒީފާއަށް އެދި ހުށަހަޅާ ފޯމާއި ކުށުގެ ރިކޯޑާއެކު، މި މަހުގެ 18 ވަނަ ދުވަހުގެ ކުރިން ހުށަހަޅަންޖެހެއެވެ.
އެ ވަޒީފާއަށް ކަނޑައަޅާފައިވާ ޝަރުތުތަކުގެ ތެރޭގައި، ގްރޭޑު 10 ނިންމާފައި ހުރުމާއި، އުމުރުން 18-39 އަހަރާ ދެމެދުގެ މީހަކަށް ވުމާއި، ފިރިހެނެއް ނަމަ އިސްކޮޅުގައި ފަސް ފޫޓު ތިން އިންޗި އަށްވުރެ ކުރު ނުވުން އަދި އަންހެނެއް ނަމަ ފަސް ފޫޓަށްވުރެ ކުރު ނުވުމާއި، އިސްލާމް ދީނުގައި ހައްދު ކަނޑައަޅާފައިވާ ކުށެއް ނުވަތަ ވައްކަން، ޓެކުން، މަކަރާ ހީލަތް، މަސްތުވާތަކެތި ބޭނުންކުރުން ނުވަތަ މަސްތުވާތަކެތީގެ ވިޔަފާރިކުރުން އަދި ހިޔާނާތް ފަދަ ކުށެއް ކުރިކަން ވޭތުވެދިޔަ ފަސް އަހަރުގެ ތެރޭގައި ޝަރީއަތަށް ސާބިތުވެފައިވާ މީހަކަށް ނުވުމާއި، މަސްތުވާއެއްޗަކުން ސަލާމަތްވުމަށް ފާއިތުވި ފަސް އަހަރުގެ ތެރޭގައި ފަރުވާ ހޯދާފައިވާ މީހަކަށް ނުވުން ހިމެނެއެވެ.
އެ މަޤާމުގެ މަސްޢޫލިއްޔަތަކީ، އައިޖީއެމްއެޗާއި ބީއެމްއެލް ފަދަ އާއްމުން ގިނައިން ހިދުމަތް ހޯދާ ތަންތަނުގެ ސެކިއުރިޓީ ބަލަހައްޓާ ބައެކެވެ. ނަމަވެސް، އާއްމު ފުލުހުން ހަދާ ޓްރެއިނިންތަކެއް އެ މަޤާމަށް ހޮވާ މީހުން ނުހަދާނެއެވެ.
