އިންޑިއާގެ ބޮޑުވަޒީރު ނަރޭންދްރަ މޯދީއަކީ ފެށުނީއްސުރެ ކަންކަމާ ވަރަށް ޒާތީވާ މީހެއްކަމަށް ބުނެ އެޤައުމުގެ މައި އިދިކޮޅު ޕާޓީ އިންޑިއަން ނޭޝަނަލް ކޮންގްރެސްއިން އެމަނިކުފާނަށް ފާޑުވިދާޅުވެއްޖެއެވެ.
އިންޑިޔާގެ އެންމެ ބޮޑު އެއް ސިޔާސީ ޕާޓީކަމަށްވާ އިންޑިއަން ނެޝަނަލް ކޮންގްރެސްގެ ރައީސް މައްލިކަރްޖުން ކަރްގޭ ވިދާޅުވީ، ރާއްޖެއާއި ދެމެދު ރަނގަޅު ގުޅުމެއް އޮންނަކަމަށާއި އެ ގައުމުން އަޅާ ފިޔަވަޅެއް އަޅަންވާނީ ވަގުތާއި އެއްގޮތަށްކަމަށެވެ.
ނަރޭންދްރަ މޯދިއަށް މަގާމު ލިބިވަޑައިގެންނެވި ދުވަހުން ފެށިގެންވެސް ހުރިހާ ކަމެއްވެސް ޒާތީކޮށް ކަންކަން ނަންގަވާ ކަމަށާއި، ބައިނަލްއަޤްވާމީ މައިދާނުގައި އަވައްޓެރިންނާއި ގާތް ގުޅުމެއް ބާއްވަންވާނެކަމަށާއި އެ ޤައުމުން އަމަލުކުރަންވާނީ ޒަމާނާއި އެއްގޮތަށްކަމަށްވާއިރު، އަވައްޓެރިން ބަދަލުނުކުރެވޭނެކަމަށްވެސް އޭނާ ވިދާޅުވެފައިވެއެވެ. އަދި އެ ޤައުމުގެ ޚާރިޖީ ސިޔާސަތު ތަންފީޒުކުރެއްވުމުގައި އަމިއްލަ ބައެއް ވިސްނުންތައް މޯދީ ގެންގުޅުއްވާކަމަށްވެސް ކާރްގޭ ހިއްސާކުރެއްވިއެވެ.
އޭނާ ވިދާޅުވީ، މޯދީއަކީ ހިތަށް އެރުމުން މީހުންނާއި ގުޅުން ބަދަހިކުރައްވާ ފަރާތެއްކަމަށާއި ހަމަ އެގޮތަށް ހިތަށް އެރުމުން ދެކޮޅަށްވެސް މަސައްކަތްކުރައްވާކަމަށެވެ.
