މިއަދު ބާއްވަން ނިންމާފައިވާ މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގައި ވޯޓުލާ ވަގުތު އިތުރުކޮށްފިއެވެ.
އިލެކްޝަންސް ކޮމިޝަނުން ބުނީ، މުޅި ރާއްޖޭގެ މޫސުން ގޯސްވެ، ވިއްސާރަވެ ވައިގަދަވެ އަދި ކަނޑުގަދަވުމުގެ ސަބަބުން ޢާންމު ދަތުރުފަތުރަށް ބުރޫއަރައި ވޯޓުލުމަށް މީހުން ނިކުތުމަށް ދަތިވާނެތީ އިންތިޚާބުގައި ވޯޓުލުމުގެ ވަގުތު އެއް ގަޑިއިރު އިތުރުކޮށްފައިވާކަމަށެވެ.
މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގައި ވޯޓުލުން ފެށޭނީ މިއަދު ހެނދުނު 8:00 ގައެވެ. އަދި ވޯޓުލުން ނިމި، ވޯޓުފޮށިތައް ބަންދުކުރާނީ ހަވީރު 05:00 ގައެވެ.
މިއަދު ބައި-އިލެކްޝަން ބާއްވަނީ މާލެ ސިޓީ ކައުންސިލްގެ މޭޔަރު، މާލެ ސިޓީ ކައުންސިލްގެ މާފަންނު ދެކުނު ދާއިރާ، މެދުހެންވޭރު ދާއިރާ، ހެންވޭރު ދެކުނު ދާއިރާގެ މެންބަރު އަދި މ. މުލަކު އަންހެނުންގެ ތަރައްޤީއަށް މަސައްކަތްކުރާ ކޮމިޓީ މެންބަރު އިންތިޚާބު ކުރުމަށެވެ.
މާލެއަށް މޭޔަރުކަމަށް ފަސް ކެންޑިޑޭޓަކު ވާދަކުރައްވާއިރު، އެއީ ޕީއެންސީގެ ފަރާތުން ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު، އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް، ޕީއެންއެފްގެ ފަރާތުން ކުރީގެ ޕޮލިސް ކޮމިޝަނަރު ހުސައިން ވަހީދު އަދި ދަ ޑިމޮކްރެޓްސްގެ ފަރާތުން ސައިފް ފާތިހުގެ އިތުރުން އަމިއްލަ ގޮތުން ވާދަކުރައްވާ ޝުއައިބު ޢަލީއެވެ.
